Prezident İlham Əliyevin və birinci xanım Mehriban Əliyevanın iştirakı ilə avqustun 11-də açılan Əmək və Əhalinin Sosial Müdafiəsi Nazirliyinin tabeliyində DOST Agentliyinin Naxçıvan Regional DOST Mərkəzi fəaliyyətini uğurla davam etdirir. Mərkəzdə hazırda əhaliyə 164 sosial xidmət göstərilir. Burada 117 əməkdaş və 50 könüllü çalışır. Gün ərzində orta hesabla 500-600 vətəndaşın qəbul edilməsi nəzərdə tutulur.
Naxçıvan sakinləri sosial təminat, məşğulluq və əlilliklə bağlı müraciətlərini daha operativ, rahat və şəffaf şəkildə həyata keçirirlər. Müasir texnoloji infrastruktura malik olan müəssisədə vətəndaş məmnunluğunun yüksək səviyyədə saxlanılması üçün həm peşəkar kadr heyətindən, həm də gənclərin potensialından səmərəli istifadə olunur. Bu addım regionda sosial xidmətlərin əlçatanlığını artırmaqla yanaşı, əhalinin rifahının yüksəldilməsinə və sosial müdafiə sisteminin müasirləşdirilməsinə mühüm töhfə verir.
“Bir pəncərə” prinsipi xidmətlərin əlçatanlığını artırır
Mərkəzin direktor müavini, direktor vəzifəsini icra edən Şamil Əliyev AZƏRTAC-ın bölgə müxbirinə bildirib ki, Naxçıvan Regional DOST Mərkəzində DOST konsepsiyasının əsas prinsiplərindən olan “bir pəncərə” sistemi tətbiq edilir. Mərkəzin fəaliyyətində diqqət çəkən əsas məqamlardan biri xidmətlərdən yararlanmaq üçün vətəndaşların yaşayış və ya qeydiyyat yerinə görə məhdudlaşdırılmamasıdır. Bu isə Naxçıvan şəhəri ilə yanaşı, muxtar respublikanın digər rayonlarında qeydiyyatda olan vətəndaşların da mərkəzin xidmətlərindən yararlanmasına imkan verir.
Şamil Əliyevin sözlərinə görə, fəaliyyətin ilk günlərində ən çox müraciətlər pensiya, sosial müavinətlər və əmək məşğulluğu istiqamətləri üzrə qeydə alınıb. Xüsusilə əmək məşğulluğu sahəsinə maraq yüksəkdir. İlk günlərdə pensiya və əmək məşğulluğu istiqamətləri üzrə ümumilikdə 200-dən çox müraciət daxil olub.
Bu göstəricilər yeni mərkəzin fəaliyyətə başladığı ilk gündən vətəndaşların sosial xidmətlərə çıxışının asanlaşdırılmasında mühüm rol oynadığını göstərir.
Diqqətli və nəzakətli münasibət əsas xidmət prinsipidir
Mərkəzin övladlığa götürmə, əlillik və sosial xidmətlər üzrə sosial agenti Həsən Hüseynovun sözlərinə görə, vətəndaşlarla ünsiyyətdə diqqətli və nəzakətli münasibət əsas prinsiplərdən biridir. “Vətəndaş müraciətlərini diqqətlə və operativ şəkildə dinləyir, onların suallarını cavablandırır və qanunvericiliyin tələbləri çərçivəsində müraciətlərin həllinə çalışırıq. Əsas məqsədimiz vətəndaş məmnuniyyətini təmin etməkdir”, – deyə o bildirib.
Onun sözlərinə görə, mərkəzdə bütün müraciətlər ayrı-seçkiliyə yol verilmədən qəbul edilir, mümkün qədər operativ şəkildə araşdırılır və aidiyyəti üzrə həllinə çalışılır. Hər bir vətəndaşa fərdi yanaşılır, onun hüquq və mənafelərinin qorunmasına xüsusi diqqət yetirilir.
Həsən Hüseynov qeyd edib ki, müraciəti ilə bağlı çətinlik yaşayan və ya narazı olan vətəndaşlarla ünsiyyət zamanı səbirli və anlayışlı davranmaq da xidmət prosesinin mühüm hissəsidir. Belə müraciətlər diqqətlə araşdırılır, zəruri hallarda aidiyyəti üzrə yönləndirilir və qanunvericiliyin tələblərinə uyğun həll olunmasına çalışılır.
Vətəndaş: “Göstərilən xidmətdən razı qaldım”
Mərkəzə müraciət edən Turanə İbrahimova isə burada qarşılaşdığı münasibətdən razı qaldığını bildirib. “Bu gün mərkəzdə iş üçün müraciət etdim. Müraciətim əməkdaşlar tərəfindən çox diqqətli, gülərüz və səmimi şəkildə qarşılandı. Mənə müraciətimlə bağlı ən qısa zamanda geridönüş ediləcəyi bildirildi”, – deyə o qeyd edib.
Turanə İbrahimova göstərilən xidmətdən razı qaldığını, əməkdaşların peşəkar və nəzakətli münasibətinin, eləcə də xidmət prosesində müasir və innovativ texnologiyalardan istifadənin onda müsbət təəssürat yaratdığını vurğulayıb. “Ümid edirəm ki, müraciətimlə bağlı ən qısa zamanda mənə müsbət geridönüş ediləcək. DOST Agentliyinə və əməkdaşlarına göstərdikləri diqqət və yüksək xidmət səviyyəsinə görə təşəkkür edirəm”, – deyə vətəndaş bildirib.
Naxçıvan Regional DOST Mərkəzinin fəaliyyətə başlaması muxtar respublikada sosial xidmətlərin vahid mərkəzdə, müasir standartlar əsasında və daha əlçatan formada təqdim edilməsinə imkan yaradır. İlk günlərdə qeydə alınan müraciətlərin sayı və vətəndaşların xidmətlərdən məmnunluğu isə mərkəzin qarşıya qoyulan əsas məqsədə – sosial xidmətlərdə əlçatanlığın, operativliyin və vətəndaş məmnuniyyətinin artırılmasına xidmət etdiyini göstərir.
