Naftalanda Azərbaycanın Səhiyyə Nazirliyinin dəstəyi, Türkiyənin İqtisadi İnkişaf və Sosial Araşdırmalar İnstitutu - (İKSAD), Naftalan Şəhər İcra Hakimiyyəti və Səhiyyə Nazirliyi Elmi-Tədqiqat Tibbi Bərpa İnstitutunun təşkilatçılığı ilə "1-ci Beynəlxalq İbn-i Sina Sağlamlıq Elmləri" (Tibbi reabilitasiyada müasir yanaşmalar, təbii amillərin müalicəvi əhəmiyyəti) mövzusunda beynəlxalq konfrans keçirilib.
Konfransı giriş sözü ilə Səhiyyə Nazirliyi Elmi-Tədqiqat Tibbi Bərpa İnstitutunun direktoru, tibb elmləri doktoru Mətanət Əfəndiyeva açaraq "Sağlamlıq amillərinin potensialına yeni yanaşmalar" mövzusunda məruzə ilə çıxış etmişdir. Sonra tibbi reabilitasiyada müasir yanaşmalar və təbii amillərlə müalicə üsulları haqqında biliklərin artırılması və bu sahədə göstərilən tibbi xidmətin təkmilləşdirilməsi, naftalan nefti, müalicəvi palçıqlar, müxtəlif tərkibli mineral suların əhəmiyyəti haqqında müzakirələr aparılmışdır.
Naftalan Şəhər İcra Hakimiyyətinin başçısı Vüqar Novruzovun, Səhiyyə Nazirliyinin şöbə müdiri Ramik Quliyevin, Türkiyənin Adıyaman Universiteti Elmi Araşdırmalar xəstəxanasının professoru Şeyho Cem Yucetaşın çıxışları da maraqla qarşılanmışdır.
***
Naftalanda Şəhər İcra Hakimiyyətinin və Qərbi Azərbaycan İcmasının birgə təşkilatçılığı ilə Heydər Əliyev Mərkəzində "Qərbi Azərbaycan: Tarixin sınaqları, müasir çağırışlar" mövzusunda tədbir keçirilmişdir.
Torpaqlarımızın azadlığı uğrunda canlarından keçən şəhidlərimizin, soyqırımı qurbanlarının xatirəsi bir dəqiqəlik sükutla yad edildikdən sonra icmanın idarə heyətinin sədri Əziz Ələkbərli Qərbi Azərbaycan İcmasının məqsədi və fəaliyyət istiqamətləri barədə məlumat vermişdir. Qeyd etmişdir ki, indiyəcən görülən işlər, qarşıda duran vəzifələr bu hərəkatın sistemli və davamlı xarakter aldığını göstərir. Bildirmişdir ki, son iki əsr ərzində ata-baba yurdlarından məcburi şəkildə didərgin salınan qərbi azərbaycanlıların tarixi torpaqlarına qayıdışı qaçılmazdır.
Naftalan Şəhər İcra hakimiyyətinin başçısı Vüqar Novruzov isə tarixi ərazimiz olan Qərbi Azərbaycanla bağlı tədbirlərin keçirilməsinin vacibliyindən, Prezident İlham Əliyevin təşəbbüsü ilə Qərbi Azərbaycana Böyük Qayıdış ideyasının reallaşdırılması istiqamətində atılan məqsədyönlü addımların əhəmiyyətindən danışmışdır.
İcmanın İdarə Heyətinin sədr müavini Hikmət Babaoğlu da çıxışında Qərbi Azərbaycan həqiqətlərinə geniş şəkildə toxunaraq bu prosesin həm tarixi ədalətin bərpası, həm də Cənubi Qafqazda dayanıqlı sülhün əsas şərtlərindən biri olduğunu vurğulamışdır.
İcmanın Qadınlar Şurasının sədr müavinləri Telli Pənahqızı və Aytən Sultanova qərbi azərbaycanlı xanımların bu prosesdəki fəal rolundan, Qərbi Azərbaycana Qayıdış hərəkatında göstərdikləri təşəbbüskarlıqdan söz açmış, doğma yurd yerlərinə qayıdışın təkcə milli kimliyimizin bərpası deyil, həm də gələcək nəsillərimiz üçün ədalətli və dinc gələcəyin qurulması baxımından zəruri olduğunu bildirmişlər.
Sonda Qərbi Azərbaycandan olan bir qrup şəxsin və onların varislərinin müraciətləri əsasında onlara Qərbi Azərbaycan İcmasının üzvlük vəsiqələri və döş nişanları, həmçinin xatirə hədiyyələri təqdim olunmuşdur.
Sabir ƏLİYEV,
"Azərbaycan"
jpg_1778502196.jpg)
