Prezident İlham Əliyevin əfvlə bağlı sərəncamı 220 nəfərə şamil olundu
Azərbaycanın inkişafının və yüksəlişinin ən böyük göstəricilərindən biri cəmiyyətimizdə tarixən var olan humanizm dəyərlərinin daha da güclənməsidir.
Prezident İlham Əliyev tərəfindən hər il imzalanan əfv sərəncamları, habelə müxtəlif vaxtlarda Milli Məclis tərəfindən amnistiyaların elan olunması xalqımızın humanizm dəyərlərinə bağlılığının ən bariz nümunələridir.
Prezident İlham Əliyev tərəfindən mayın 26-da "Məhkum edilmiş bir sıra şəxslərin əfv olunması haqqında" sərəncamın imzalanması bir daha təsdiq etdi ki, respublikamızda humanizm və insanpərvərlik dəyərlərinə nə qədər böyük yer verilir. Sərəncama əsasən müxtəlif cəzalara məhkum edilmiş ümumilikdə 220 nəfər əfv edilib.
Respublikamızda əfvetmə institutunun yaradılması xalqımızın Ulu Öndəri Heydər Əliyevin adı ilə bağlıdır. Ümummilli Lider Heydər Əliyevin 1993-cü ildə Azərbaycana rəhbərliyə qayıdışından sonra ölkəmizdə qanunçuluğun təmin olunması ilə yanaşı, humanizm siyasəti çərçivəsində də çoxsaylı tədbirlər həyata keçirilib, o cümlədən əfv və amnistiya təsisatları bərpa olunub. Cəzasının müəyyən bir hissəsini çəkən və törətdiyi əməldən peşmançılıq keçirən məhkum olunmuş şəxslərin əfv edilməsi, bağışlanması, onlara yeni şans verilməsi artıq uzun illərdir ki, ənənəyə çevrilib.
Ulu Öndər tərəfindən 1995-2003-cü illərdə 32 əfv fərmanı imzalanıb və bu, 3 mindən artıq məhkuma şamil olunub. Ümummilli Liderin qanunvericilik təşəbbüsü əsasında Milli Məclis tərəfindən 1996-2003-cü illərdə 7 dəfə amnistiya elan edilib, 21 mindən çox məhkum azadlığa buraxılıb, ümumilikdə 78 mindən artıq məhkuma amnistiya aktları şamil olunub. Bu humanist addımlar tərbiyəvi əhəmiyyət daşıyıb, ölkədə cinayətkarlığın səviyyəsinin daha da azalmasını təmin edib.
Respublikamızda humanizm dəyərlərinə bağlılığın nəticəsi kimi ölüm hökmü də aradan qaldırılıb. Respublikamızın adı Şərqdə ilk olaraq bu cəzanı ləğv edən ölkə kimi tarixə düşüb. Əvvəlcə 1993-cü ildə ölüm hökmü üzərində moratorium qoyulub, 1998-ci ildə isə bu cəza tamamilə ləğv edilib.
Azərbaycan hüquqi dövlətdir. Hüquqi dövlətdə isə cinayət cəzasız qalmır. Törədilən hər bir cinayət əməlinə görə təqsirləndirilən şəxslərə ölkə qanunlarına əsasən müvafiq cəza verilir. Eyni zamanda törətdiyi əmələ görə peşmançılıq keçirən və əvf olunması mümkün sayılan məhkumların müraciətlərinə diqqətlə yanaşılır. Ulu Öndər Heydər Əliyevin əsasını qoyduğu ənənələri davam etdirən Prezident İlham Əliyev bayram və əlamətdar günlərdə imazaladığı əfv sərəncamları ilə törətdiyi cinayət əməlindən səmimi peşmançılıq keçirən, azad cəmiyyətə və normal həyata qovuşmaq istəyən məhkumların bir qismini cəzalarının çəkilməmiş hissəsindən tam azad olunurlar.
Dövlətimizin başçısı dünən bu qəbildən olan növbəti sərəncam imzalayıb. Sərəncama əsasən, azadlıqdan məhrumetmə cəzasına məhkum olunmuş 175 nəfər cəzanın çəkilməmiş hissəsindən azad olunub. Həmçinin azadlıqdan məhrumetmə cəzasına məhkum edilmiş 25 nəfərin cəzasının çəkilməmiş hissəsi yarıyadək azaldılıb, azadlıqdan məhrumetmə cəzasına məhkum olunmuş və cəzası şərti tətbiq edilmiş 1 nəfər, azadlıqdan məhrumetmə cəzasına məhkum edilmiş və cəzalarının çəkilməsi təxirə salınmış 2 nəfər cəzadan azad edilib. Bundan başqa, azadlığın məhdudlaşdırılması cəzasına məhkum edilmiş 10 nəfər cəzanın çəkilməmiş hissəsindən azad edilib, azadlığın məhdudlaşdırılması cəzasına məhkum edilmiş 2 nəfərin cəzasının çəkilməmiş hissəsi yarıyadək azaldılıb, islah işləri cəzasına məhkum edilmiş 4 nəfər cəzanın çəkilməmiş hissəsindən, cərimə cəzasına məhkum edilmiş 1 nəfər cəzadan azad edilib. Prezidentin cərəncamı ümumilikdə 220 nəfərə şamil edilib.
Əfv edilənlərdən 5 nəfər İran, 4 nəfəri Rusiya, 2 nəfəri Pakistan, 2 nəfəri Gürcüstan, 1 nəfəri Türkiyə, 1 nəfəri Fransa, 1 nəfəri isə Əfqanıstan vətəndaşıdır.
Prezident İlham Əliyevin 28 May - Müstəqillik Günü ərəfəsində imzaladığı növbəti əfv sərəncamı ilə 200-dən artıq ailədə ikiqat bayram sevinci yaşandı. Bu hadisə həm də Azərbaycanda bərqərar olan yüksək humanizm dəyərlərinin növbəti təntənəsinə çevrildi.
Rəşad CƏFƏRLİ,
"Azərbaycan"
