Azərbaycan Dövlət Pedaqoji Universitetində (ADPU) "Təhsildə menecment və yeni təlim texnologiyaları" mövzusunda magistrantların IX respublika elmi konfransı keçirilib.
2 gün davam edən konfransda universitetin rəhbərliyi, professor-müəllim heyəti, eləcə də ölkənin digər ali təhsil və tədqiqat müəssisələrinin - Bakı Dövlət Universiteti, Bakı Slavyan Universiteti, Azərbaycan Dillər Universiteti, Azərbaycan Texniki Universiteti, Azərbaycan Dövlət Neft və Sənaye Universiteti, Naxçıvan Dövlət Universiteti, ADA, Azərbaycan Turizm və Menecment Universiteti, Mingəçevir Dövlət Universiteti, Sumqayıt Dövlət Universiteti, Azərbaycan, Xəzər və Odlar Yurdu universitetlərinin magistrantları, elmi ictimaiyyətin nümayəndələri iştirak ediblər.
Plenar iclasda giriş sözü ilə çıxış edən ADPU-nun rektoru, konfransın təşkilat komitəsinin sədri professor Cəfər Cəfərov qeyd edib ki, builki konfrans rəhbərlik etdiyi universitetin 105 illik yubileyi ilə əlamətdardır. Rektor universitetdə son illər həyata keçirilən islahatlardan danışıb, yeni layihələrlə bağlı məlumat verib. Qeyd edib ki, bu ali təhsil ocağı inkişafın yeni mərhələsinə qədəm qoyur. 2026-cı ilin əvvəlində ADPU ilk dəfə olaraq "QS Dünya Universitetləri Reytinqi Avropa 2026" siyahısında 601-650-ci yerlər sırasında qərarlaşıb. Reytinqdə universitet Avropa üzrə fakültə-tələbə nisbətinə görə 57-ci, akademik nüfuz və işəgötürən nüfuzu üzrə 301+, məşğulluq nəticələrinə görə 380-ci olub. Həmçinin ADPU "QS Avropa 2026" reytinqinin Qərbi Asiya regionu üzrə reytinq sıralamasında 140 ali təhsil qurumu arasında 54-cü sırada yer alıb.
Cəfər Cəfərov universitetdə rəqəmsal inkişaf üzrə fəaliyyət planının hazırlandığını, yeni ixtisaslaşmaların yaradıldığını, beynəlxalq təcrübənin tətbiq olunduğunu və müasir təhsil proqramlarının icrasına başlanıldığını diqqətə çatdırıb. Universitetin elmi uğurlarının artmasında magistrantların üzərinə böyük məsuliyyət düşdüyünü bildirən rektor əlavə edib ki, onlar daim öz üzərlərində çalışmalı, müasir bilik və bacarıqlara yiyələnməlidirlər: "Müasir dövrdə təhsildə sürətli dəyişikliklər baş verir və bu dəyişikliklər təhsilin idarə olunmasına yeni yanaşmaların tətbiqini zəruri edir".
ADPU-nun elm və innovasiyalar üzrə prorektoru, konfransın təşkilat komitəsinin sədr müavini professor Asəf Zamanov müasir təhsilin yalnız biliklərin ötürülməsi prosesi deyil, həmçinin innovasiyaların, idarəetmə bacarıqlarının və texnoloji yeniliklərin inteqrasiyasını tələb edən mürəkkəb bir sistem olduğunu vurğulayıb: "Danılmaz həqiqətdir ki, sürətlə qloballaşan dünyada rəqabətədavamlı insan kapitalının formalaşdırılması təhsildə səmərəli menecment və müasir təlim texnologiyalarının tətbiqindən birbaşa asılıdır. Bu baxımdan konfransın mövzusu kifayət qədər aktualdır və strateji əhəmiyyət daşıyır". Prorektor bildirib ki, uğurlu təhsil sistemi çevik qərarların qəbul edildiyi, yeniliyə açıq və tələbəyönümlü idarəetmə modelinə əsaslanmalıdır: "Yeni təlim texnologiyaları - rəqəmsal platformalar, distant və hibrid təhsil modelləri, süni intellekt əsaslı öyrənmə alətləri tədris prosesində mühüm əhəmiyyətə malikdir ki, bu texnologiyalar da tələbələrin fərdi xüsusiyyətlərini nəzərə almağa, onların tənqidi düşünmə və yaradıcılıq qabiliyyətlərini inkişaf etdirməyə geniş imkanlar yaradır. Eyni zamanda müəllimləri bilik ötürücüsündən daha çox mentor və fasilitator mövqeyinə yüksəldir". O, həmçinin diqqətə çatdırıb ki, ADPU-da innovativ düşüncəyə malik, peşəkar və məsuliyyətli mütəxəssislər yetişdirmək üçün tədris prosesində müasir texnologiyaların tətbiqi genişləndirilir, beynəlxalq təcrübə öyrənilir. Professor 2018-ci ildən təşkil edilən sayca 9-cu konfransın ilbəil həm coğrafiyasının genişlənildiyini, həm də faydalılığının yüksəldiyini bildirib.
İsveçin Höteburq Universitetinin dosenti, İsveç "Azərbaycan Aydınlar Ocağı"nın sədri Səadət Kərimi ölkəmizdə elm və ali təhsilin inkişafı istiqamətində atılan addımların çox diqqətəlayiq olduğunu vurğulayıb, gənc tədqiqatçıların praktik tədqiqatlara cəlb olunmasının önəmindən bəhs edib. Bu istiqamətdə ADPU nümunəsində görülən işlərin uzunmüddətli perspektivdə ölkə elminə verəcəyi töhfələri qeyd edib.
Konfransda çıxış edən ADPU-nun Ümumi fizika kafedrasının müdiri, professor Cahangir Hüseynov və Təhsil menecmenti kafedrasının professoru Müseyib İlyasov təəssüratlarını, magistrantlara öz tövsiyələrini çatdırıblar.
Plenar iclasda ADPU-nun magistrantı Aytac Abbasovanın "Pedaqoji kadr hazırlığının strateji idarə olunmasında beynəlxalq təhsil layihələrinin rolu", BDU-nun magistrantı Ləman Tağıyevanın "PİSA 2029 çərçivəsində media və süni intellekt savadlılığının qiymətləndirilməsi" mövzularında məruzələri dinlənilib.
Universitetin Magistratura və doktorantura şöbəsinin müdiri siyasi elmlər üzrə fəlsəfə doktoru Rəşad Sadıqov bildirib ki, konfransa təqdim olunan 500-ə qədər məruzənin "Təhsildə strateji idarəetmə", "İnnovasiyalar və təhsilin keyfiyyəti", "Təhsildə sosial-psixoloji xidmət", "Tədrisin müasir problemləri" elmi istiqamətləri üzrə 10 bölmədə müzakirəsi təşkil ediləcək.
Qeyd edək ki, Təşkilat Komitəsinin yekun rəyinə əsasən, çapa tövsiyə olunan elmi məruzələrin tezisləri konfrans materiallarında nəşr olunacaq.
Zöhrə FƏRƏCOVA,
"Azərbaycan"
