Lənkəran rayonunun Viravul kəndində Sərhəd Qoşunlarının polkovniki, şəhid  Emil Nəzir oğlu Nəzirovun xatirəsinə inşa olunan abidə kompleksinin açılışı olub. 
Şəhərin və hüquq-mühafizə orqanlarının rəhbərlərinin, hərbçilərin, şəhidin ailə üzvlərinin, kənd sakinləri və ictimaiyyət nümayəndələrinin iştirak etdikləri tədbir Dövlət himninin səsləndirilməsi və torpaqlarımızın müdafiəsi uğrunda şəhid olan igidlərin xatirəsinin birdəqiqəlik sükutla yad olunması ilə başlayıb. Sonra çıxışlar olub. Bildirilib ki, şəhidlərin xatirəsinin əbədiləşdirilməsi ilə bağlı görülən işlər və irəli sürülən təşəbbüslərin gənc nəslin vətənpərvərlik ruhunda tərbiyəsində müstəsna əhəmiyyəti var. Şəhidin qardaşı Abbas Nəzirov isə çıxışında qazilərə və  şəhid ailələrinə göstərilən diqqətə görə təşəkkür edib. Mərasimin sonunda kənd tam orta məktəbi şagirdlərinin ifasında vətənpərvərlik mövzusunda şeirlər səsləndirilib.
Qeyd edək ki, hər iki Qarabağ müharibəsinin iştirakçısı olan polkovnik Emil Nəzirov 2021-ci il noyabrın 30-da Dövlət Sərhəd Xidmətinin hərbi helikopterinin Xızı rayonu ərazisində yerləşən "Qaraheybət" aviasiya poliqonunda təlim uçuşlarını yerinə yetirərkən qəzaya uğraması nəticəsində şəhid olub. Polkovnik 
II Şəhidlər xiyabanında dəfn edilib. Emil Nəzirov sağlığında "Hərbi xidmətdə fərqlənməyə görə" III dərəcəli, "Hərbi xidmətdə fərqlənməyə görə" II dərəcəli, "Hərbi xidmətdə fərqlənməyə görə" I dərəcəli, III dərəcəli "Qüsursuz xidmətə görə", II dərəcəli "Qüsursuz xidmətə görə", 
I dərəcəli "Qüsursuz xidmətə görə", Silahlı Qüvvələrin 90 illik yubileyi, Silahlı Qüvvələrin 95 illik yubileyi, Sərhəd Mühafizəsinin 90 illik yubileyi, Sərhəd Mühafizəsinin 95 illik yubileyi, Sərhəd Mühafizəsinin 100 illik yubileyi, "Azərbaycan Respublikası Silahlı Qüvvələri Veteranı" və "Vətən uğrunda" medalları ilə təltif olunub.

S.CAVADOV,
"Azərbaycan"