Yollar Bakının ümumi inkişaf səviyyəsinin göstəricisidir. Bu baxımdan şəhərin mərkəzi küçə və prospektləri göz oxşayır, müasir standartlara cavab verir.
Amma şəhərimizin bütün yolları haqqında bunu deyə bilmirik. Xüsusilə Bakıətrafı qəsəbə və kənd yollarında tez-tez rast gəlinən problemlərdən biri asfalt örtüyünün sıradan çıxmasıdır. Yolların dağılması nəqliyyat vasitələri ilə yanaşı, piyadalar üçün də narahatlıq yaradır. Sürücülər və piyadalar üçün təhlükə törədən bu cür hallar avtomobillərin texniki vəziyyətinə mənfi təsir edir, eyni zamanda qəza riskini də artırır.
Yaşadığımız Biləcəri qəsəbəsi, Füzuli küçəsinin də yolu bərbad vəziyyətdədir. Çala-çuxurlar nəinki piyadaların, hətta avtomobillərin gediş-gəlişinə maneə yaradır. Yağışlı günlərdə isə küçə ilə hərəkət etmək ümumiyyətlə mümkün olmur. Uşaqlar məktəbə getməyə çətinlik çəkir, üst-başları palçığa batır. Yay günlərində isə toz-torpaq göyə qalxır. Bəzən taksi sürücüləri, təcili yardım maşınları da bu yola girməkdən imtina edirlər. Sakinlər aidiyyəti qurumlara müraciət etsələr də, müsbət cavab ala bilmirlər, işə məsul olanlar küçənin acınacaqlı vəziyyətini görməzdən gəlirlər.
Sizin qəzetin vasitəsilə bir daha küçəmizdə yaranmış yol probleminin aradan qaldırılmasını əlaqədar təşkilatlardan xahiş və tələb edirik. Ümid edirik ki, yaxın zamanda küçəmizin dağılmış asfalt örtüyü təmir olunacaq. Keyfiyyətli yollar həm vətəndaşların rahatlığı, həm də şəhərin ümumi görünüşü üçün çox vacibdir.
Vüqar HACIYEV, Mülayim HACIYEVA,
Vüsalə KƏRİMOVA, Zaur HACIYEV,
Biləcəri qəsəbəsi, Füzuli küçəsinin sakinləri
jpg_1748645150.jpg)
jpg_1749076194.jpg)
