Soydaşlarımız Tehran rejiminin amansız repressiyasının əsas hədəfidir
İran hakimiyyəti hökumət əleyhinə etirazları xarici düşmənlərin təhrik etdiyi "iğtişaşlar" kimi göstərməyə çalışır. Son məlumata görə, ümummilli etirazlar zamanı "Bəsic" yarımhərbi qruplaşmasının üzvü Ruhullah Əcəmiyanı qətlə yetirən 5 nəfər edam cəzasına məhkum edilib. Bu barədə məhkəmə hakimiyyətinin mətbuat katibi Məsud Setayeşi məlumat verib. Daha 11 nəfər, o cümlədən üç uşaq uzun müddətə azadlıqdan məhrum edilib.
Ədliyyə Nazirliyinin "Mizan Online" saytı Əcəmiyanın noyabrın 3-də Tehranın qərbində yerləşən Kərəc şəhərində ölməsi ilə bağlı 15 nəfərin ittiham olunduğunu bildirib.
Prokurorların dediyinə əsasən, 27 yaşlı Əcəmiyan etirazçı Hədis Nəcəfinin (azərbaycanlı şairə sentyabrın 23-də qətlə yetirilib-red.) ölümünün 40-cı gününü qeyd etmək üçün toplaşan bir qrup nümayişçi tərəfindən lüt soyundurularaq öldürülüb.
"Bəsic" formal olaraq İslam İnqilabı Keşikçiləri Korpusunun bir hissəsidir, lakin praktikada bəzən yerli hakimiyyət orqanları tərəfindən idarə olunur. Təşkilat həm də sosial yardım göstərir, dini mərasimlər təşkil edir, siyasi əhvali-ruhiyyəyə və əxlaqa nəzarət edir.
Dövlət mediasına görə, İslam İnqilabı Keşikçiləri Korpusu çərşənbə axşamı "xarici agentlərlə əlaqədə olmaqda" və "təxribat fəaliyyətləri planlaşdırmaqda" ittiham olunan 12 nəfəri həbs edib.
İİKK-nin bəyanatına əsasən "Almaniya və Hollandiyada yaşayan antiinqilabçı agentlərin rəhbərlik etdiyi bu şəbəkənin üzvləri hərbi silahlar almaq və milli təhlükəsizliyə zidd hərəkətlər etməklə təxribatçı fəaliyyətlər həyata keçirmək niyyətində olublar".
Bəyanatda bu şəxslərin milliyyəti göstərilmir və digər təfərrüatlar açıqlanmır.
İran ordusunun adı açıqlanmayan generalı ay yarımdır davam edən iğtişaşlarda təhlükəsizlik qüvvələrinin onlarla üzvü də daxil olmaqla 300-dən çox insanın həlak olduğunu bildirib.
Məlumata görə, 40 nəfəri əcnəbi və tanınmış aktyorlar, jurnalistlər və vəkillər də daxil olmaqla, yüzlərlə insan öldürülüb, minlərlə insan həbs edilib.
İranda mövcud rejimə qarşı xalqın etirazına ordudan da dəstək verilib. Bununla bağlı görüntülər sosial şəbəkələrdə yayılıb və geniş müzakirələrə səbəb olub.
Belə ki, İran ordusunun əsgəri vərəqəyə "mən onların rejiminin hərbi geyimini daşımağa məcburam, lakin sizi dəstəkləyirəm" sözlərini yazaraq etirazçılara dəstəyini ifadə edib.
İrandan daxil olan daha bir məlumatda bildirilir ki, azərbaycanlı ər və arvada ağır cəza verilib. Belə ki, noyabrın 4-də həbs edilən həkim Həmid Qarahəsənli etiraz aksiyalarında "Bəsic" qüvvələrinin üzvünün öldürülməsi ittihamı ilə edam cəzasına məhkum edilib. Onun həyat yoldaşı həkim-kardioloq Fərzanə Qarahəsənliyə isə 25 il həbs cəzası verilib.
Qeyd edək ki, azərbaycanlı cütlük sentyabrın 23-də Kərəcdə keçirilən aksiyalar zamanı hökumət qüvvələri tərəfindən güllələnərək öldürülən azərbaycanlı şairə Hədis Nəcəfinin 40 mərasiminə qatıldıqlarına görə tutulub, sonra onlara qarşı ağır ittihamlar irəli sürülüb.
Fransada yaşayan Cənubi Azərbaycandan olan tanınmış fotoqraf Rza Deqqəti instaqram səhifəsində yazıb ki, İran xalqı bu zalım rejimə qalib gələcək: "... Xalqın bir istəyi var, terror rejiminə son qoymaq. Xalqın qarşısında - İran xalqı aclıqdan ölərkən pul əldə etmək və cinayətlərinə bəraət qazandırmaq üçün ideologiyadan və dindən istifadə edən terrorçu liderləri, mafioz qrupları, girov götürənləri və narkotik alverçilərini müdafiə etmək üçün silahlanmış, beyinləri yuyulmuş insanlardan ibarət milis dayanır. Onlar bir kult kimi fəaliyyət göstərirlər, o kult ki, 1979-cu ildə "New York Times" tərəfindən "Qandiyə bənzər fiqur" kimi göstərilən bu adamla başladı və eyni media orqanı bir neçə gün əvvəl saxta xəbərlə rejimin təbliğat ortağına çevrilərək yenidən eyni səhvə yol verdi. Birləşən xalq bu zalım rejimə qalib gələcək".
R.HİLALOĞLU,
"Azərbaycan"
