Mütəxəssislərin fikrincə, hər bir insanın bədənində zebralardakı kimi zolaqlar olur. Lakin zebralardan fərqli olaraq insanlardakı naxışlar yalnız xüsusi hallarda görünür. Blaşko xətləri adlanan bu naxışlar 20-ci əsrin əvvəllərində alman dermatoloqu Alfred Blaşko tərəfindən kəşf edildiyi üçün belə adlandırılıb. O, 150-dən çox xəstənin dərisini araşdıraraq, onların bədənlərindəki doğum ləkələrinin müəyyən nümunələrə uyğun olduğunu qeyd edib.
100 il ərzində bioloqlar bu xətlərin bir çox mümkün səbəblərini deyirdilər. Ən çox qəbul edilən versiya isə bu cizgilərin ana bətnində olan körpənin inkişafı zamanı hüceyrələrin hərəkət xəritəsi idi. Başqa sözlə desək, dəri hüceyrələri çoxaldıqca, onların getdiyi yollar qeydə alınır və gizli mühafizə olunurdu.
Blaşkodan təxminən bir əsr sonra Rudolf Happle baş dərisi və boyun qıvrımlarında spiral xətlərin olduğunu aşkarladı. Mütəxəssisin dəri xəstəlikləri olan insanları müşahidə edərkən müəyyənləşdirdiyi bu xətləri özünün iş otağında bir yunan heykəlinin gövdəsinə çəkdiyi deyilir. Ancaq bu xətlər heç vaxt bədənin ön hissəsində sinə və qarın boyunca uzanan xəyali sərhədi keçmir. Bu xətlər arxa tərəfdə xarakterik V formasını meydana gətirirlər. Blaşko xətləri ilə bağlı bir sıra şayiələr də var. Məsələn, bəzi insanlar pişiklərin və bəzi üstün görmə qabiliyyətinə malik heyvanların bu cizgiləri görə biləcəyinə inanırlar. Ancaq elm adamları bu iddiaları qətiyyətlə rədd edirlər.

Səbuhi Bayramov,
"Azərbaycan"