Vaxt yaxınlaşdıqca hazırlıq işləri sürətlənir
Məlum olduğu kimi, III MDB Oyunlarının keçirilməsi üçün ölkə üzrə bir neçə şəhər seçilsə də, əsas yarışların ünvanı Gəncə olacaq. Odur ki, xeyli vaxtdır şəhərdə genişmiqyaslı təmir-tikinti və abadlıq işləri görülür.
Hazırda Azərbaycan Avtomobil Yolları Dövlət Agentliyi tərəfindən Gəncənin daxili avtomobil yollarında təmir-tikinti işləri həyata keçirilir. Bununla yanaşı, şəhərin daxili imkanları hesabına bir sıra prospekt və küçələrdə, eləcə də məhəllədaxili yollarda asfalt örtüyü yenilənir. Paralel olaraq zəruri olan yerlərdə piyada səkiləri təmir edilir, yeniləri salınır. Eyni zamanda şəhərin bir sıra meydanlarında, park və xiyabanlarında da təmir-bərpa işləri görülür. Hazırda Heydər Əliyev adına Mərkəzi və Gəncəçay Park-Bulvar Kompleksində yerləşən Bayraq meydanlarında bu cür işlər aparılır. "Xan bağı" istirahət parkı, Fikrət Əmirov adına park, Nizami Kinoteatrının qarşısındakı istirahət parkı da təmir edilərək yenidən qurulur. Həmin ərazidəki fərdi və çoxmənzilli yaşayış binalarının fasadlarının təmiri də unudulmur. Bu cür işlər Heydər Əliyev, Atatürk və Şah İsmayıl Xətai prospektlərini, həmçinin bir sıra ara küçələri də əhatə edir. Onu da bildirək ki, fasadları yenilənən çoxmənzilli yaşayış binalarının üzərində yeni fasad işıqlandırıcıları da quraşdırılır.
Təbii ki, bu sadalananlar görülən işlərin bir hissəsidir. Yaxın günlər şəhərdaxili ictimai nəqliyyatın yenilənməsi, bir sıra tarixi binaların bərpası nəzərdə tutulur. Şəhərdəki idman qurğularının əsaslı şəkildə yenidən qurulması və yenilərinin inşasına isə artıq başlanılıb.
Bu sırada III MDB Oyunlarının mərkəzi arenası olacaq stadionun inşası sürətlə aparılır. Prezidentin sərəncamına əsasən inşa edilən bu möhtəşən idman qurğusunda artıq son tamamlama işləri görülür. Ərazisi 10 hektar olan və UEFA-nın 4-cü kateqoriya standartlarına uyğun inşa edilən stadionun tamaşaçı tutumu layihə üzrə 15 min 464 yerlikdir. Stadionda VVİP, VİP, SKY-box, media nümayəndələri və fiziki imkanları məhdud tamaşaçılar üçün müvafiq sayda oturacaq sahələri, futbolçular üçün soyunub-geyinmə, konfrans, tibb, həkimlər, texniki heyət üçün otaqlar və digər zəruri sahələr olacaq. Eyni zamanda layihəyə əsasən, stadionun daxilində bilet satışı, müxtəlif ictimai iaşə obyektləri, yerüstü avtodayanacaqlar, nəzarət-buraxılış məntəqələri yaradılır. Stadion UEFA tələblərinə uyğun işıqlandırma, internet, təhlükəsizlik, giriş-çıxış sistemləri ilə təchiz olunur. Bir sözlə, stadionda istər yerli, istərsə də beynəlxalq yarışların keçirilməsi üçün hərtərəfli şərait yaradılır.
Onu da qeyd edək ki, III MDB Oyunlarının həm açılışı, həm də bağlanışı bu stadionda keçiriləcək.
Sabir ƏLİYEV,
"Azərbaycan"
