Şuşa şəhərində Azərbaycan-Latviya iqtisadi, elmi-texniki və mədəni əməkdaşlıq üzrə Hökumətlərarası Komissiyanın 9-cu iclası keçirilib.
AZƏRTAC-ın bölgə müxbiri xəbər verir ki, tədbiri açan Azərbaycanın kənd təsərrüfatı naziri, Azərbaycan-Latviya iqtisadi, elmi-texniki və mədəni əməkdaşlıq üzrə birgə Hökumətlərarası Komissiyanın Azərbaycan tərəfindən həmsədri Məcnun Məmmədov komissiyanın iclasının zəngin tarixə və mədəni irsə malik olan Şuşada keçirildiyini, 30 illik işğal dövründə Azərbaycanın tarixi torpaqlarının böyük dağıntılara məruz qaldığını, Müzəffər Ali Baş Komandan, Prezident İlham Əliyevin rəhbərliyi ilə torpaqlarımızın işğaldan azad edildiyini, bu torpaqlarda hazırda genişmiqyaslı yenidənqurma işlərinin aparıldığını diqqətə çatdırıb.
Nazir qeyd edib ki, Azərbaycan və Latviya arasında 30 ildən çox davam edən əlaqələr qarşılıqlı hörmət, etimad və tərəfdaşlığa əsaslanır. Bildirib ki, Azərbaycan Latviya ilə əlaqələrin davamlı olaraq möhkəmləndirilməsinə böyük əhəmiyyət verir və əməkdaşlığın genişləndirilməsi üçün böyük potensial mövcuddur. Ölkəmizdə etibarlı və əlverişli biznes mühitinin olduğunu xatırladan nazir, latviyalı sahibkarları Azərbaycana investisiya yatırmağa, eləcə də respublikamızın nəqliyyat və logistika imkanlarından səmərəli istifadə etməyə çağırıb.
Latviyanın kənd təsərrüfatı naziri, Azərbaycan-Latviya iqtisadi əməkdaşlıq üzrə birgə hökumətlərarası komissiyanın Latviya tərəfindən həmsədri Armands Krauze, öz növbəsində ərazi bütövlüyünü və suverenliyini bərpa etməsi münasibətilə Azərbaycanı təbrik edib, iclasın Şuşa şəhərində keçirilməsindən məmnun olduğunu deyib. O, Latviyanın daim Azərbaycanın müstəqilliyini, suverenliyini və ərazi bütövlüyünü dəstəklədiyini və bundan sonra da dəstəkləyəcəyini vurğulayıb.
Azərbaycanı mühüm iqtisadi tərəfdaş kimi dəyərləndirən latviyalı həmsədr, ölkəsinin Azərbaycanla bütün sahələr üzrə tərəfdaşlıq münasibətlərini inkişaf etdirməyə maraq göstərdiyini deyib. Armands Krauze Azərbaycanın istehsal etdiyi məhsulların Avropa bazarına çıxışına kömək etməyə hazır olduqlarını bildirib. Komissiyanın həmsədri işgüzar əlaqələrin gücləndirilməsi və birgə təşəbbüslərin dəstəklənməsi üçün effektiv platforma kimi Latviya-Azərbaycan Biznes Əməkdaşlıq Şurasının yaradılmasının vacib olduğunu vurğulayıb.
İclasın sonunda Azərbaycan-Latviya iqtisadi, elmi-texniki və mədəni əməkdaşlıq üzrə birgə Hökumətlərarası Komissiyanın 9-cu iclasının yekununa dair protokol təsdiqlənib. Sənəd iki ölkə arasında ticarət dövriyyəsinin artırılması, investisiya, kənd təsərrüfatı, ərzaq təhlükəsizliyi, nəqliyyat, elm, təhsil, əmək, məşğulluq və əhalinin sosial müdafiəsi, şəhərsalma və tikinti, ətraf mühitin mühafizəsi və meşəçilik, turizm, mədəniyyət və qarşılıqlı maraq doğuran digər sahələrdə ikitərəfli əməkdaşlığı daha da inkişaf etdirməyi nəzərdə tutur. Yekun protokolda, həmçinin iki ölkə arasında ikitərəfli münasibətlərin hüquqi-normativ bazasının daha da təkmilləşdirilməsi niyyəti öz əksini tapıb.
Tərəflər Azərbaycan-Latviya iqtisadi əməkdaşlıq üzrə birgə Hökumətlərarası Komissiyanın 10-cu iclasının gələn il Riqada keçirilməsi barədə razılığa gəliblər.
15:32
Şuşa şəhərində Azərbaycanla Latviya arasında iqtisadi, elmi-texniki və mədəni əməkdaşlıq üzrə Hökumətlərarası Komissiyanın 9-cu iclası keçirilir.
AZƏRTAC-ın bölgə müxbiri xəbər verir ki, iclasda Azərbaycanla Latviya arasında ikitərəfli əməkdaşlığın istiqamətləri, nəqliyyat, kənd təsərrüfatı, texnologiya transferi, ticarət dövriyyəsinin artırılması, qarşılıqlı investisiyaların təşviqi və digər məsələlər müzakirə olunur.
jpg_1776755656.jpg)
