"Fransanın təcavüzkar Ermənistanı silahlandırması, işğalçıya bütün sahələrdə dəstək verməsi heç bir beynəlxalq normaya sığmır. Həmçinin bu, Azərbaycanın da milli maraqlarına tamamilə ziddir. Nəzərə almaq lazımdır ki, Azərbaycan torpaqları 30 ildən çox vaxt ərzində erməni işğalında qalıb və BMT Təhlükəsizlik Şurasının torpaqlarımızın qeyri-şərtsiz azad olunması barədə qətnamələri uzun illər icra edilməyib. Halbuki BMT TŞ-nin üzvü, eləcə də Minsk qrupunun həmsədrlərindən biri kimi Fransanın borcu idi ki, bu istiqamətdə əməli addımlar atsın".
Bu fikirləri qəzetimizə açıqlamasında Milli Məclisin Aqrar siyasət komitəsinin sədri Tahir Rzayev deyib. O bildirib ki, işğal dövründə olduğu kimi, Vətən müharibəsinin davam etdiyi 44 gündə də Fransa daim Ermənistanı müdafiə etdi. Bu il sentyabrın 19-20-də keçirilmiş antiterror tədbirlərindən sonra isə Fransanın ölkəmizə qarşı təhdidləri artıb, şər-böhtan kampaniyası genişlənib. Bu, iki təcavüzkar ölkənin - Ermənistan və Fransanın cinayətkar olduqlarından və bəşəriyyətə zidd mövqedə durduqlarından xəbər verir. Bu ölkələrin davranışları bilavasitə müstəmləkəçiliyə və insan qətllərinə xidmət edir.
Komitə sədri qeyd edib ki, Fransa əsrlər boyu müstəmləkəçi ölkə kimi tanınıb, dünyanın 50-dən çox ölkəsini əsarəti altında saxlayıb: "Fransa 10 milyonlarla insanın qətlinə, şikəst qalmasına bais olub. Tarixi qanlı qətllərlə dolu olan Fransanı Ermənistan xalqının taleyi, bu ölkənin gələcəyi düşündürmür. Paris Cənubi Qafqazda möhkəmlənmək, regionda söz sahibinə çevrilmək niyyətindədir. Bu səbəbdən münaqişələri qızışdırır, mənfur siyasətini həyata keçirir. Fransa məqsədinə nail olmaq üçün Paşinyandan bir kart kimi istifadə edir, onun yaramaz siyasətinə, təcavüzkar əməllərinə rəvac verir.
Tahir Rzayev vurğulayıb ki, bu gün Fransa öz daxili problemləri ilə məşğul olmaq əvəzinə, məkrli planlar qurur, başqa dövlətlərin daxili işlərinə qarışmağa cəhd göstərir. Fransada uzun müddət davam edən mitinqlər, ölkədə hökm sürən özbaşınalıqlar fransızların özlərini də cana gətirib. Ölkədə islamofobiyanın və türkofobiyanın geniş yayılması da ciddi problemlərə səbəb olur. Fransızlar Makrondan ciddi şəkildə narazıdırlar və onun siyasətinə qarşı açıq etirazlarını nümayiş etdirirlər. Belə olan halda Fransa prezidentinin Ermənistanla məşğul olması, onu silahlandırıb revanşistləri həvəsləndirməsi məntiqli deyil. Lakin təəccüblü heç nə yoxdur, Paris qonşu ölkələri bir-birinə qarşı qoymaqla fitnəkar xislətini büruzə verir.
Komitə sədri onu da deyib ki, Prezident İlham Əliyev Fransanın tutduğu yolun düzgün olmadığını, bu yolun Cənubi Qafqazda sabitliyi pozmağa yönəldiyini dəfələrlə qeyd edib və bildirib ki, heç bir ölkənin yalan, böhtan, iftira təbliğatı bizi yolumuzdan döndərə bilməz. Çünki biz haqq yolundayıq, mübarizəmiz torpaqlarımızı qorumaq, Azərbaycan xalqının firavanlığını təmin etmək, sərhədlərimizi möhkəmləndirməkdir. Biz uzun illər işğal altında qalan torpaqlarımızı azad edib, suverenliyimizi tam bərpa etmişik. Erməni separatizminə son nöqtəni qoyaraq faşistlərin bizim torpaqlarımıza bir də ayaq basmalarını əngəlləmişik.
"Yəni Fransanın Ermənistanı silahlandırmaqla bu ölkəyə hər cür dəstək verməsi Azərbaycanı heç vəchlə narahat edə bilməz. Azərbaycan yenilməz orduya, güclü liderə, həmrəy xalqa malikdir. Azərbaycan haqq uğrunda mübarizəyə hər zaman hazırdır", - deyə T.Rzayev əlavə edib.
Nəzrin QAFARZADƏ,
"Azərbaycan"
