"Azərikimya” İstehsalat Birliyinin Etilen-polietilen
zavodunda elektrik təchizatı sistemi və köməkçi qurğular təkmilləşdirilir, texnoloji
proseslər avtomatik idarəetmə sisteminə keçirilir. Bu, "Azərikimya” İB-də əsas məhsulların
istehsalını iki dəfə, bəzi məhsulların istehsalını üç dəfə artırmağa imkan verəcəkdir.
Layihənin məqsədi Sumqayıt Kimya Sənaye Parkında
inşa olunan yeni "SOCAR Polymer” kompleksinin zavodlarını dayanıqlı rejimdə etilen,
propilen, saf hidrogen və enerji daşıyıcıları ilə təmin etməkdir. Layihənin icrası
sayəsində zavodun istismar dövrü azı 20 il uzadılacaq, qurğuların etibarlılığı və
səmərəliliyi artırılacaqdır.
Xatırladaq ki, inşaat işləri 2017-ci ildə
başlanıb. Tikinti və montaj işlərinə əsasən Sumqayıt şəhərindən və ətraf regionlardan
2000 nəfərdən çox mütəxəssis cəlb olunub.
Yenidənqurma və modernləşdirmə layihəsinə baş podratçı qismində Technip FMC
şirkətinin İtaliya və Benilyuks ofisləri cəlb olunub. Tikinti-quraşdırma işləri
SOCAR-ın birgə müəssisəsi "Azfen” və Türkiyənin "Üstay” şirkətlərinə həvalə olunub.
Ümumilikdə layihəyə dünyanın təxminən 50 ölkəsini təmsil edən 50-dən çox istehsalçı
və podratçı şirkət cəlb edilmişdir.
"Azərikimya” İB və Dünya İqtisadi Forumu
tərəfindən dünyanın ən çox rəqəmsallaşan 18 şirkəti sırasına daxil edilmiş SOCAR-ın
Türkiyədəki analoji müəssisəsi olan "Petkim Petrokimya Holding A.Ş.” arasında əməkdaşlıq
haqqında saziş də imzalanıb. Yeni qurğuların idarəetmə mexanizmlərini dərindən mənimsəmələri
üçün istehsalçı şirkətlər gənc mühəndislərə təlimlər keçir, onları "Petkim Petrokimya
Holding A.Ş.”yə ezam edir.
Etilen-polietilen
zavodunda həyata keçirilən digər iri layihə buxar turbogenerator qurğusunun tikintisidir.
Layihə başa çatdırıldıqdan sonra "Azərikimya” İB enerji tələbatını öz imkanları
hesabına ödəməklə bərabər, SOCAR-ın digər müəssisələrinə və Sumqayıt şəhərinin digər
istehlakçılarına elektrik enerjisi verməyə imkan yaranacaqdır. Hər iki layihənin
cari ilin 3-cü rübündə yekunlaşması nəzərdə tutulur.
"Azərikimya”
İB SOCAR-ın tərkibinə daxil edildikdən sonra
Sumqayıt əhalisi üçün bir sıra mühüm sosial layihələr də həyata keçirmişdir.
Şirkətin dəstəyi ilə "Kimyaçı” poliklinikası və Təcili Tibbi Yardım Mərkəzi yaradılmış,
müasir tibb avadanlıqları ilə təchiz edilərək sakinlərin xidmətinə verilmişdir.
Ötən il 17 saylı "Gül” uşaq bağçasında əsaslı təmir və yenidənqurma işləri aparılıb.
Cüdo Təlim İdman Mərkəzinin binası və "Kimyaçı” mədəniyyət sarayı SOCAR-ın dəstəyi
ilə əsaslı təmir olunub.
"Azərikimya”
İB-nin əməkçiləri şəhərin məhəllə və mikrorayonlarını
abadlaşdırmış, bir sıra məktəb və bağçaları təmir etmiş, şəhərin sənaye zonasında
minlərlə ağac əkmişlər.
Akif ƏLİYEV,
"Azərbaycan”
jpeg_1766151155.jpeg)
