Məqsəd ictimaiyyəti çaşdırmaqdır
Baş nazir Nikol Paşinyan Albaniyanın paytaxtı Tiranada keçirilən "Avropa Siyasi Birliyini"nin 6-cı sammiti çərçivəsində azərbaycanlı jurnalistin Ermənistanın yeni konstitusiyası, Azərbaycana qarşı ərazi iddiaları ilə bağlı ünvanladığı sualı özünəməxsus şəkildə cavablandırıb. Bundan görünür ki, Paşinyan yenə köhnə ampluasındadır.
Milli Məclisin deputatı Elman Nəsirov "Azərbaycan" qəzetinə açıqlamasında bildirib ki, o, yenidən həqiqəti təhrif edərək Ermənistan konstitusiyasında Azərbaycana qarşı heç bir ərazi iddiası olmadığını söyləyib. Əksinə, guya Azərbaycan Konstitusiyasında Ermənistana qarşı ərazi iddiası yer alıb. Paşinyan həmçinin bildirib ki, konstitusiya ilə bağlı yeni layihə hazır deyil. "Göründüyü kimi, sülhdən danışan Paşinyan faktiki olaraq sülhün yaranmasına gətirib çıxaracaq real vəziyyəti düzgün qiymətləndirmir. Yenə dezinformasiya yayır, təhrif olunmuş məlumatlar səsləndirir. Halbuki gün kimi aydındır ki, Ermənistan konstitusiyasının preambulasında Azərbaycana qarşı ərazi iddiası öz əksini tapıb. Əgər davamlı sülh istəyirlərsə, Ermənistanın konstitusiyasının preambulası mütləq dəyişməli, Konstitusiya Məhkəməsi yeni konstitusiyanı təsdiqləməlidir. Dəyişiklik yalnız referendum vasitəsilə ola bilər. Buna görə də erməni xalqı siyasi iradəsini ortaya qoymalı və bu bəndin imtinası lehinə səs verməlidir", - deyə E.Nəsirov əlavə edib.
Deputat qeyd edib ki, bu halda yeni vəziyyət yaranır və sülh üçün imkanlar yaranır. O ki qaldı Azərbaycan Konstitusiyasında Ermənistana qarşı ərazi iddiasına - bu, tamamilə yalan məlumatdır. Azərbaycanın 1991-ci il oktyabrın 18-də qəbul olunmuş Konstitusiya Aktında yazılıb ki, Azərbaycan dövləti Azərbaycan Xalq Cümhuriyyətinin varisidir. 1995-ci ilin Konstitusiyasında da bu akta istinad var. Ermənistan bunu əlində bayraq tutaraq Azərbaycana qarşı təzyiq göstərməyə çalışır. Amma bu, yanlış, həqiqətdən uzaq məlumatdır. Azərbaycan Respublikasının Xalq Cümhuriyyətinin siyasi varisi olması Ermənistana qarşı hər hansı ərazi iddiasını özündə əks etdirmir.
E.Nəsirov Azərbaycan ərazisinin 86,6 min kvadrat kilometr olduğunu vurğulayaraq bildirib ki, cümhuriyyət dövründə olmuş 114 min kvadrat kilometr əraziyə heç vaxt iddia qaldırılmayıb və heç bir yerdə bu fikir səsləndirilməyib: "Prezident İlham Əliyev heç vaxt belə bir məsələni gündəmə gətirməyib. 71 il müstəqilliyimiz əlimizdən alındı, 1991-ci ildə müstəqilliyimizi bərpa etdik və burada varislik öz əksini tapıb".
Deputat qeyd edib ki, Nikol Paşinyan sülhə hazır olmadığının yenidən mesajını verib və onun iddiaları Ermənistan tərəfinin sülhlə bağlı fikirlərinin illüziya, ictimaiyyəti çaşdırmaq cəhdi olduğunu göstərir. Reallıqda Ermənistan sülhə doğru heç bir addım atmaq istəmir.
Ə.QARDAŞXANOVA,
"Azərbaycan"
