“Ədibin Evi”ndə xarici diplomatlar üçün Azərbaycan mədəniyyət kursları açılıb

İçərişəhərdəki “Ədibin Evi”ndə “Azerbaijani Culture for Global Envoys” (Azərbaycan Mədəniyyətinin Qlobal Səfirləri) kurslarının rəsmi açılış mərasimi keçrilib.

Bu barədə AZƏRTAC-a “Ədibin Evi”ndən məlumat verilib.

Bildirilib ki, tədbirdə çıxış edən mədəniyyət nazirinin müavini Fərid Cəfərov kurslarda dörd qitənin səkkiz ölkəsindən təmsil olunan geniş coğrafiyaya məxsus xarici korpus nümayəndələrinin iştirakından məmnunluğunu ifadə edib.

“Dövlət başçısı tərəfindən imzalanmış “Azərbaycan Mədəniyyəti – 2040” Azərbaycan Respublikasının Mədəniyyət Konsepsiyası”nın prioritet istiqamətlərindən biri olan mədəniyyət diplomatiyasının inkişafına töhfə verəcək bu kurslar milli mədəniyyətimizin fundamental dəyərlərinin öyrənilməsinə xidmət edəcək. Tanınmış yazıçı Mark Tvenin təbirincə desək, insanları göz və intellektdən daha çox qəlblə tanımaq lazımdır. Hər bir azərbaycanlı Azərbaycan mədəniyyətini qəlbində daşıyır. Xarici diplomatların Azərbaycan mədəniyyəti ilə bağlı biliklərinin və məlumatlılığının artırılması ölkələrimiz arasında münasibətlərin daha da inkişafına müsbət təsir göstərəcək”, – deyə nazir müavini əlavə edib.

“Ədibin Evi” Ədəbiyyata Dəstək Fondunun icraçı direktoru Şəfəq Mehrəliyeva son beş il ərzində Fondun fəaliyyətində ədəbiyyatla yanaşı, mədəniyyətin digər istiqamətlərinin təbliği və tədqiqinə də yer verildiyini bildirib. O, diqqətə çatdırıb ki, müasir dövrdə mədəni diplomatiya ayrıca elmi istiqamət kimi formalaşıb. Azərbaycanda akkreditə olunmuş xarici diplomatik korpusun üzvlərinin ölkəmizin mədəni irsini daha dərindən tanımaları və anlamaları yalnız ikitərəfli əməkdaşlığın deyil, qarşılıqlı hörmətin, məlumatlı beynəlxalq dialoqun və uzunmüddətli tərəfdaşlığın da güclənməsinə töhfə verəcək.

“Azerbaijani Culture for Global Envoys” proqramının rəhbəri, sənətşünas Nigar Axundova isə kurslar çərçivəsində diplomatların Azərbaycan musiqisi, ədəbiyyatı, təsviri incəsənəti, teatr və kino sənətini ayrıca modullar üzrə öyrənəcəklərini bildirib. N.Axundova vurğulayıb ki, müxtəlif mədəni təsirlərin qarşılıqlı sintezi əsasında formalaşmış zəngin və unikal mədəni mənzərəmiz diplomatlara mühazirələr, interaktiv sessiyalar, praktiki məşğələlər və müxtəlif mədəniyyət ocaqlarına təşkil olunacaq səfərlər vasitəsilə təqdim ediləcək.

Kursların açılış mərasimində “Ədibin Evi”nin həmtəsisçisi ədəbiyyatşünas professor Ədibə Paşayeva diplomatlara tədrislərində uğurlar arzulayıb, bu təcrübədən yararlanacaqlarına ümid etdiyini bildirib.

Açılış mərasimi gənc ifaçılar Lalə Bədəlbəyli və Müşfiq Quliyevin təqdim etdiyi beynəlmiləl musiqi proqramı ilə davam edib.

Daha sonra diplomatlar filologiya elmləri doktoru, professor Rahilə Qeybullayeva tərəfindən tədris edilən “Azərbaycan ədəbiyyatı” modulu üzrə dərslərə başlayıblar.