Canını Vətənə fəda edən igid

O, dünayaya göz açanda Azərbaycanın Qarabağını və Şərqi Zəngəzurunu qəsbkar ermənilər ələ keçirmişdilər. 1994-cü il mayın 12-də iki ölkə - Azərbaycan və Ermənistan atəşkəs sazişi imzalamışdılar. Ancaq işğalçı ölkə sazişə əməl etmirdi. Ermənistanın silahlı qüvvələri Azərbaycan Ordusunun mövqelərini və mülki əhalisinin yaşayış məntəqələrini intensiv atəşə tuturdular. Birinci Qarabağ müharibəsində sinəsinə dağlar çəkilmiş Azərbaycan xalqının övladları yenə də şəhid olurdular.

Qarabağın, Şərqi Zəngəzurun Ermənistanın işğalında qaldığı illərdə doğulan yurdumuzun oğulları qəhrəman babaları kimi vətənpərvərlik ruhunda böyüyürdülər. Onların bir çoxu işğal tarixi yaşlarından böyük olan o əzəli torpaqlarımızı azad etmək arzusu ilə hərbçi olurdu. Azərbaycan Silahlı Qüvvələrinin baş leytenantı Kərəm Həsənov kimi...
Kərəm 1996-cı il yanvar 1-də Gəncə şəhərində dünyaya gəldi. Ailədə iki uşaq - bir bacı, bir qardaş idilər. Onu Gəncə şəhərində 1 saylı bağçaya apardılar. Məktəbəqədər təhsilini də orada aldı. 2002-ci ildə Gəncə şəhəri Mir Cəlal Paşayev adına 39 saylı tam orta məktəbə getdi. Məktəb illərində hərbi dərslərə xüsusi maraq və fəallıq göstərməsi onun daxili dünyasından xəbər verir, arzularını, məqsədini bəlli edirdi. Kərəm Həsənov məktəbdaxili hərbi qrupa - "Şahinlər" qrupuna üzv oldu. Hərbi təlimlərdə iştirak etdi. İdmana da marağı böyük idi. Bu sahədə də uğurlara nail oldu. Kikboksinq üzrə 12-13 yaşlı idmançılar arasında "Şəhər çempionatında" 1-ci yeri qazandı.
Orta məktəbi 2013-cü ildə bitirdi. Qəlbində seçib bağlandığı hərbçi peşəsini mükəmməl öyrənmək üçün Heydər Əliyev adına Azərbaycan Ali Hərbi Məktəbinə daxil oldu.  2017-ci ildə təhsilini leytenant rütbəsi ilə tamamladı. Azərbaycanın bir sıra şəhər və rayonlarında - Bakıda, Bərdədə, Goranboyda, Mingəçevirdə, Ağcabədidə, Beyləqanda, Qubadlıda hərbi xidmətini məsuliyyətlə yerinə yetirdi. Tank komandiri oldu. O, 2008-ci il iyunun 26-da, Azərbaycan Silahlı Qüvvələri günündə "Azərbaycan Ordusunun 100 illiyi" yubiley medalı ilə təltif olundu. 2020-ci ilin həmin günü isə Kərəm Həsənov baş leytenant rütbəsinə layiq görüldü.
2020-ci ildə 44 günlük İkinci Qarabağ müharibəsində sinəsini düşmən güllələrinə sipər edən qəhrəman Azərbaycan oğullarından biri də o oldu. Kərəm Suqovuşanın, Ağdam rayonunun və kəndlərinin işğaldan azad olunmasında fəal iştirak etdi. 
İkinci Qarabağ müharibəsində Suqovuşan istiqamətində gedən döyüşlərdə düşmənin keçilməz səddini aşmaq tapşırığı verildi. Kərəm Həsənov heyət üzvləri ilə birgə tapşırığı uğurla yerinə yetirdi. Böyük rəşadətlə həmin səddi keçdilər. Onlar döyüşlərdə çox ağır vəziyyətlərlə üzləşdilər. Birlikdə mühasirəyə də düşdülər. Kərəm Həsənov qəhrəmanlıq göstərərək heyət üzvlərini sağ-salamat çıxara bildi. 
Baş leytenant Kərəm Həsənov Azərbaycan Prezidenti 
İlham Əliyevin sərəncamları ilə "Döyüşdə fərqlənməyə görə", "Vətən müharibəsi iştirakçısı" medalları ilə təltif olundu.
İkinci Qarabağ müharibəsindən sonra Azərbaycanda Komando Ordu Birliyi yaradıldı. 2022-ci ilin sonlarında Kərəm Həsənov da Komando briqadasına qoşuldu. O, hərbi fəaliyyətini Qubadlı rayonunun Muradxanlı kəndində davam etdirdi.
Azərbaycan Silahları Qüvvələrinin 2023-cü ildə apardığı lokal xarakterli antiterror tədbirlərində baş leytenant Kərəm Həsənov da iştirak etdi. Bir neçə postun düşməndən geri alınmasında böyük xidmət göstərdi. Ölkəsinin ərazi bütövlüyünün bərpa edilməsi uğrunda döyüş tapşırıqlarını yerinə yetirərkən sol qolundan güllə yarası aldı. Yaralı vəziyyətdə də vəzifə borcunu şərəflə icra edirdi. Son nəfəsinədək qəhrəmancasına vuruşdu. Kərəm Həsənov 2023-cü il sentyabrın 20-də Xocavənd rayonununda şəhid oldu. Boya-başa çatdığı Gəncə şəhərində yerləşən Şəhidlər xiyabanında torpağa tapşırıldı. 
Azərbaycan Silahlı Qüvvələrinin baş leytenantı Kərəm Həsənov şəhidlik məqamına ucalanda qızı Rüqəyya 1 yaş 
8 aylıq idi.
Prezident İlham Əliyevin müvafiq sərəncamları ilə Kərəm Həsənov ölümündən sonra "3-cü dərəcəli Vətənə xidmətə görə" ordeni, "Vətən uğrunda" medalı ilə təltif olundu.

Zöhrə FƏRƏCOVA,
"Azərbaycan"