Ötən həftə qlobal və yerli iqtisadi mühit bir sıra mühüm dəyişikliklər və siqnallarla yadda qaldı. Maliyyə bazarlarında müşahidə olunan dalğalanmalar, inflyasiya gözləntiləri və mərkəzi bankın pul-kredit siyasəti iqtisadi gündəmin əsas mövzularını təşkil etdi.
Bu ümumi mənzərədən çıxış edərək, regional əməkdaşlıq və investisiya imkanlarının genişləndirilməsi istiqamətində atılan addımları qeyd etsək, görərik ki, bir çox hadisələr diqqət mərkəzində olub. Özəlliklə də Çexiyanın Baş naziri Andrey Babişin Qəbələyə səfəri çərçivəsində keçirilən biznes - forum iqtisadi əlaqələrin dərinləşdirilməsi və yeni tərəfdaşlıqların qurulması baxımından önəmli platforma kimi çıxış edib. Tədbirdə, əsasən, iki ölkə arasında ticarət dövriyyəsinin artırılması, qarşılıqlı investisiya imkanlarının genişləndirilməsi və sənaye, kənd təsərrüfatı, turizm kimi prioritet sahələrdə əməkdaşlığın dərinləşdirilməsi məsələləri müzakirə edilib.
***
Ötən həftənin yadda qalan əsas sosial-iqtisadi hadisələrindən biri də Xocavənd şəhərinə 39 (176 nəfər), Qırmızı Bazar qəsəbəsinə 16 (63 nəfər) və Xanoba kəndinə 13 ailənin (60 nəfər) növbəti köç karvanının yola salınması idi. 30 illik həsrətdən sonra doğma yurda qayıdan sakinlər hərtərəfli dövlət qayğısı ilə əhatə olunduqlarına görə Prezident İlham Əliyevə və Birinci vitse-prezident Mehriban xanım Əliyevaya təşəkkür ediblər. Böyük qayıdış çərçivəsində həyata keçirilən bu proses regionların sosial-iqtisadi inkişafına mühüm töhfə verir, həmçinin yerli infrastrukturun bərpası və genişləndirilməsi, təhsil, səhiyyə və digər sosial xidmətlərin daha əlçatan olması üçün zəmin yaradır.
***
Sahibkarlığın dəstəklənməsi və qadınların iqtisadi fəallığının artırılması sahəsində həyata keçirilən daha bir tədbir həftənin sosial-iqtisadi gündəmində diqqət çəkən mühüm hadisələrdən idi. Aprelin 28-də Gəncə şəhərində "Credence Group" və Azərbaycan Sahibkar Qadınlar İctimai Birliyinin (ASQİB) təşkilatçılığı ilə baş tutan Qadın Sahibkarların I Qurultayında ölkənin müxtəlif regionlarından yüzlərlə qadın sahibkar iştirak edib. "Güclü qadınlar, sonsuz imkanlar" şüarı altında keçirilən tədbir qadın sahibkarlığının inkişafına dəstək vermək, biznes mühitində qadınların rolunu gücləndirmək, eləcə də regionlarda yeni əməkdaşlıq platformalarının formalaşdırılmasına şərait yaratmaq məqsədilə təşkil olunmuşdu.
***
Bəhs etdiyimiz o gün paralel olaraq başqa bir regionda qadın sahibkarlığının təşviqi və regionlarda iqtisadi fəallığın artırılması ilə bağlı turizm sektorunun inkişafına yönəlmiş mühüm təşəbbüs reallaşdırılıb. İqtisadi Əməkdaşlıq Təşkilatının (İƏT) təşkilatçılığı ilə Dövlət Turizm Agentliyi tərəfindən Şuşa şəhərində "Şuşa - İƏT-in turizm paytaxtı 2026" tədbiri çərçivəsində Qastronomiya günü təşkil olunub.
Tədbir çərçivəsində Azərbaycan, Türkiyə, Özbəkistan, Türkmənistan, Qazaxıstan, Qırğızıstan, Tacikistan, Pakistan, İran və Əfqanıstanın açıq hava şəraitində qurulmuş stendlərində bu ölkələrin qastronomiya mütəxəssisləri tərəfindən hazırlanmış, destinasiyaların qastroturizm potensialını əks etdirən əsas kulinariya nümunələri nümayiş etdirilib.
***
Dünya Əməyin Mühafizəsi Gününə həsr olunmuş konfrans da arxada qoyduğumuz həftənin sosial-iqtisadi gündəmində diqqət çəkən hadisələrdən biridir. Konfrans çərçivəsində son illər Azərbaycanda əmək münasibətləri və əməyin mühafizəsi sahəsində həyata keçirilən ardıcıl islahatlar, əmək müqavilələrinin rəqəmsallaşdırılması və iş yerlərində təhlükəsizliyin təmin olunması məsələləri gündəmə gətirilib. Tədbirdə dövlət qurumlarının, eləcə də işəgötürənlərin əmək münasibətlərinin təkmilləşdirilməsi və beynəlxalq standartlara uyğunluğun təmin olunması istiqamətində gördükləri işlər vurğulanıb. Həmçinin əməyin mühafizəsi sahəsində aparılan təcrübələr, ESG (ətraf mühit, sosial və korporativ idarəetmə) prinsiplərinin tətbiqi və sosial tərəfdaşlığın gücləndirilməsi ilə bağlı müzakirələr aparılıb, nümunəvi iş yerləri və təşəbbüslər isə mükafatlandırılaraq digər müəssisələr üçün ilhamverici nümunə kimi təqdim olunub.
***
İqtisadiyyat Nazirliyinin dəstəyi, Kiçik və Orta Biznesin İnkişafı Agentliyinin (KOBİA) və Azərbaycan Sahibkarlar (İşəgötürənlər) Təşkilatları Milli Konfederasiyasının təşkilatçılığı ilə "Sahibkarlar günü"nə həsr olunmuş "Sahibkarlığın inkişafı güclü iqtisadiyyatdır" mövzusunda keçirilən tədbir həftənin iqtisadi gündəmində yeni iş yerlərinin yaradılması istiqamətində fikir mübadiləsinə şərait yaradıb. Tədbirdə ölkə iqtisadiyyatının davamlı inkişafında və məşğulluğun təmin edilməsində özəl sektorun aparıcı rolu vurğulanıb. Qeyd edilib ki, sahibkarlığın inkişafı üçün qanunvericilik bazası mütəmadi olaraq təkmilləşdirilir, inzibati prosedurlar sadələşdirilir, biznes mühiti bir qədər də yaxşılaşdırılır.
Züleyxa ƏLİYEVA,
"Azərbaycan"
jpg_1790976482.jpg)
