- Hündürmərtəbəli binada yaşayırıq. Bələdiyyə əmlak vergisinin ödənilməsi barədə bildiriş göndərib. Bu, qanunidirmi? Əgər qanunla ödəməliyiksə, bilmək istəyirəm ki, əmlak vergisinə görə güzəşt varmı və varsa, kimlərə şamil olunur? Mən təqaüddəyəm və müharibə veteranıyam. Yaşadığımız mənzil həyat yoldaşımın mülkiyyətindədir. Əgər müharibə veteranlarına, ya da pensiyaçılara güzəşt varsa, bu halda ailə üzvlərinə şamil edilirmi, yoxsa ev mütləq öz adıma olmalıdır?
Mübariz KAZIMOV,
Bakı şəhəri
- Sualınıza cavab olaraq bildiririk ki, bələdiyyənin əmlak vergisi bildirişi (tədiyyə bildirişi) göndərməsi Azərbaycan Respublikasının Vergi Məcəlləsinə əsasən qanunidir, çünki çoxmənzilli binanın yaşayış sahəsinin mülkiyyətçiləri əmlak vergisi ödəmək öhdəliyinə malikdirlər və bu, qanunvericiliklə nəzərdə tutulub. Əmlak vergisinə görə güzəştlər əsasən mülkiyyətçinin statusuna görə tətbiq edilir. Güzəştin şamil olunduğu şəxslərin siyahısı Vergi Məcəlləsinin 199-cu maddəsində təsbit olunmuşdur. Belə ki, həmin maddəyə görə, pensiyaçılar və müharibə veteranları üçün müəyyən güzəştlər mövcuddur (əmlak vergisinin məbləği 30 manat azaldılmaqla), lakin bu güzəştlər yalnız onların özlərinə, yəni mənzil onların mülkiyyətində olduqda tətbiq edilir. Əgər mənzil həyat yoldaşınızın mülkiyyətindədirsə, güzəşt yalnız onun statusuna əsasən tətbiq oluna bilər, pensiyaçı və ya müharibə veteranı statusunuz mənzil sizin adınıza rəsmiləşdirilmədiyi halda güzəşt hüququ vermir. Yəni güzəşt hüququ üçün mənzil mütləq güzəşt hüququ olan şəxsin öz adına olmalıdır. Bundan başqa, şəxs bir neçə müxtəlif meyarlarla güzəştli kateqoriyaya düşə bilər, lakin bu halda o kateqoriyalardan yalnız birinə istinad edilir.
- Evimi təmir etdirmək istəyirəm. Deyirlər, ev tikdirərkən, təmir etdirərkən, ümumiyyətlə, muzdla kiməsə hər hansı sifarişi icra etdirərkən ustalarla xidməti müqavilə bağlanılmalıdır. Bilmək istəyirəm, fiziki şəxslərin, yəni ev, sifariş sahiblərinin xidməti müqavilə bağlanılmasa, hüquqi məsuliyyəti nədən ibarətdir? Eləcə də bu müqavilənin olub-olmamasını yoxlamaq konkret olaraq hansı hökumət orqanının səlahiyyətindədir?
Bahadur SƏFİZADƏ,
Quba rayonu
- Bildiririk ki, evini təmir etdirmək istəyən fiziki şəxs ustalarla xidməti müqavilə (mülki-hüquqi müqavilə) bağlamadığı halda bu, avtomatik olaraq hüquqi məsuliyyətə səbəb olmur. Yalnız əmək münasibətləri yaranarsa və əmək müqaviləsi bağlanmazsa, inzibati məsuliyyət tətbiq edilə bilər. Müqavilənin olub-olmamasına nəzarət və yoxlama Əmək və Əhalinin Sosial Müdafiəsi Nazirliyinin səlahiyyətindədir. Praktik olaraq ev sahiblərinə ustalarla yazılı müqavilə bağlamaq tövsiyə olunur ki, gələcəkdə hüquqi mübahisələrdə sübut kimi istifadə olunsun. Əgər münasibət mülki-hüquqi xarakter daşıyırsa, əmək müqaviləsi bağlanmamasına görə cərimə və ya digər sanksiya tətbiq edilmir.
Sualları cavablandırdı:
Fərhad NƏCƏFOV,
Azərbaycan Respublikası Vəkillər Kollegiyasının üzvü
