Yeni ilin bir addımlığındayıq. Çoxlarımızın uşaqlıqdan bəri sevdiyimiz, səbirsizliklə gözlədiyimiz, xüsusi atributları olan bu bayram yeni başlanğıcı simvolizə edir. Bu münasibətlə hər kəs yeni ili sevinclə qarşılamağa hazırlaşır.
Paytaxt Bakının park, meydan və küçələri yeni il atributları ilə bəzədilib. Dənizkənarı Milli Park, İçərişəhər və Fəvvarələr meydanındakı Yeni il hazırlıqları paytaxtın mənzərəsini daha da gözəlləşdirib. Maraqlı kompozisiyalar göz oxşayır, əhvali-ruhiyyəni qaldırır.
Bakıda Yeni illə bağlı əsl bayram havası yaşanan, bayram ovqatlı rəngarəng tədbirlərdən biri də Fəvvarələr meydanında açılmış "Soyuq əllər, isti ürək" xeyriyyə yarmarkasıdır. Artıq 11 ildir ki, Nərgiz fondu tərəfindən yaradılmış yarmarka da bizim üçün əsl bayram atributuna çevrilib desək, yanılmarıq.
Ruhu oxşayan məkan
Böyükdən kiçiyə hər kəsin maraq göstərdiyi yarmarkaya addım atan kimi insan sanki Yeni ilin sehrinə düşür, bayram əhvali-ruhiyyəsinə qapılır. Burada rastlaşdığımız Santa Klaus, qar qız, müxtəlif nağılların qəhrəmanları, sevilən cizgi filmlərinin personajları, animatorlar, musiqiçilər soyuq qış günündə hər kəsi sevindirir.
"Soyuq əllər, isti ürək" yarmarkasında yeni qurulmuş 64 böyük və 20 balaca ev, 3 ədəd ikimərtəbəli restoran, oyun zonası, fotozona, 4D kinoteatr, qorxu otağı, kiçik köşklər, müxtəlif tematik guşələr, labirint otağı, Santa evi və böyük Yeni il ağacı var. Ərazidə quraşdırılmış iki böyük monitorda yarmarka haqqında ətraflı məlumat və xəritə nümayiş olunur. Qonaqlar məkandakı köşklərdən maraqlı Yeni il hədiyyələri, suvenirlər, kitablar, geyimlər, tematik guşələrə baş çəkə, müxtəlif isti və ya soyuq içkilərdən içə, ləzzətli təamları dada, müxtəlif oyunlar oynaya bilərlər.
Havanın çox soyuq olmasına baxmayaraq, yarmarkaya günün bütün saatlarında böyük maraq var. İnsanlar deyə-gülə şəkillər çəkdirir, Yeni il küknarının başına toplaşıb musiqilərin fonunda söhbətləşir və alış-veriş edirlər. Şam ağacının ətrafında qaçışan uşaqlar, Şaxta baba ilə rəsm çəkdirmək üçün növbə gözləyən balacalar, övladlarının sevincinə baxıb fərəhlənən valideynlər, pavilyonların qarşısında əllərində isti içkilər ilə söhbət edən gənclər insanın ruhunu oxşayır.
Qonaqlı-qaralı köşklər
Köşklərin hər biri qonaqlı-qaralıdır. Hansı köşkə üz tutursansa, böyük sevinclə qarşılanırsan. Yarmarka Yeni ildə insanları bir-birinə daha da yaxınlaşdırıb.
Milli təamları dadmaq üçün köşklərdən birinə yaxınlaşırıq. Buradan gələn dadlı, doğma qoxular insanın iştahasını artırır. Ömrünün 20 ilini mətbəxə həsr etmiş Səmayə Kazımova deyir ki, artıq 3-cü ildir bu stenddə çalışır: "Burada milli təamlar, daha çox müxtəlif növ qutablar hazırlayıram. Məqsədimiz yarmarkaya gələn uşaqlı-böyüklü hər kəsə əsl ana, nənə yeməkləri daddırmaqdır. Bişirdiyim yeməklərə xarici qonaqların da marağı böyükdür. Turistlər bəyəndikləri yeməklərin adlarını, necə hazırlandıqlarını soruşurlar. Azərbaycan kulinariyasında xüsusi yeri olan bu təamları tanıtmaq olduqca qürurvericidir".
Yeni ili hədiyyəsiz, oyuncaqsız təsəvvür etmək mümkün deyil. Diqqətimizi qarşısında xeyli uşağın yığışdığı oyuncaq köşkü çəkir. Yarmarkadakı digər evlərdə olduğu kimi, burada da alıcıların sayı çoxdur. Satıcı Nərmin Həsənzadənin sözlərinə görə, çeşid çox olduğu üçün uşaqlar asanlıqla seçim edə bilir, ürəklərincə olan oyuncaqları tapa bilirlər. Bayram ərəfəsi olduğu üçün daha çox Yeni il məhsullarına üstünlük verilir.
Yarmarkada fəaliyyət göstərməkdə məqsəd yalnız məhsul satmaq deyil, milli və xarici yeməkləri təqdim etmək, bayram əhvalı yaratmaq, həm də yeni firmaları tanıtmaqdır. Tanıtım məqsədilə açılan şirniyyat stendinə yaxınlaşırıq. Köşkün satıcısı Elşən Yarıyev deyir ki, burada ilk dəfədir fəaliyyət göstərirlər: "Yeni məhsul, yeni şirkət olmasına baxmayaraq, alıcıların marağı yüksəkdir. Şirniyyatlarımız türk şeflər tərəfindən hazırlanır. Yarmarkanın müsbət tərəfi odur ki, təamlarda müasirliklə ənənəviliyin ahəngdar əvəzlənməsi var. Hər kəs həm milli, həm də xarici yeməklərdən, şirniyyatlardan dada bilir".
Nağıllar aləmi
Alıcılar da nağıllar aləmini xatırladan, addımlarını atdıqları ilk andan sehrinə düşdükləri yarmarkadakı xidmətlərdən məmnundurlar. Təşkil olunmuş xeyriyyə yarmarkasına yerli vətəndaşlar kimi xarici qonaqların da marağı müşahidə olunur. "Soyuq əllər, isti ürək"də vaxtın necə keçdiyindən xəbər tutmaq olmur.
Yeni il tətili üçün ailəsi ilə birlikdə ölkəmizə gələn qazaxıstanlı Reyhan Canibayeva Bakını, təamlarımızı, insanlarımızın səmimiyyətini çox bəyəndiyini söyləyir: "Uzun müddətdir gəlmək istədiyim Azərbaycana ilk səfərimdir. Son olmayacağından artıq əminəm. Təəssüratım olduqca müsbətdir. Hər şey gözlədiyimdən də yüksək səviyyədədir. Uşaqlarımın təkidi ilə yarmarkaya gəldim. Burada hər şey nağıl kimi möcüzəli və gözəldir".
Yarmarkada gəzərkən ən böyük növbənin Santa evinin qarşısında olduğunun şahidi oluruq. Uşaqların üzlərindəki təbəssümdən, həyəcan və səbirlə gözləməklərindən Santa Klaus ilə şəkil çəkdirmək üçün necə həvəsli olduqları görünür. Övladları ilə yarmarkaya gələn Cəvahir Qurbanova deyir ki, yarmarkaya gəlmək onlar üçün ənənəvi haldır: "Uşaqlar hər il dekabrın əvvəlindən yarmarkanın açılmasını gözləyirlər. Bu, onlar üçün həm də Yeni ilin carçısıdır. Nə qədər soyuq olsa da, burada həmişə izdiham olur".
Oyuncaq köşkünün yanından keçəndə nənəsi ilə birlikdə həyəcan və sevinclə istədiyini seçən balaca, şirin qızcığaz diqqətimizi çəkir. Adının Məryəm olduğunu öyrəndiyimiz qızcığazın nənəsi Sevinc Abbasova gülərək deyir ki, ilboyu bu yarmarkanın açılmasını gözləyirlər: "Buradakı oyunlar da, yeməklər də Məryəmə bir ayrı zövq verir. Nə evdə, nə də kafe və restoranlarda yemədiyi yeməkləri burada özü seçir. Oyuncaq almadan yarmarkadan çıxdığımızı isə hələ xatırlamıram. Əslində "Soyuq əllər, isti ürək" ilk baxışdan uşaqlar üçün daha maraqlı görünsə də, böyüklər üçün də əyləncəli tərəfləri çoxdur. Bayram boyunca fürsət tapdıqca, yenə gələcəyik".
Yanvarın 15-dək davam edəcək yarmarkada iştirak etməklə hər birimiz həm əfsanəvi qış nağılının parçası olub, həm də dəstəyimizə ehtiyacı olan uşaqlara əsl möcüzə bəxş edə bilərik. Nəcib missiyanı yerinə yetirən "Soyuq əllər, isti ürək" yarmarkası hər il olduğu kimi, bu il də toplanan vəsaiti müxtəlif xəstəliklərdən əziyyət çəkən uşaqların müalicə və əməliyyat xərclərinin qarşılanmasına sərf edəcək. Yarmarka sayəsində ağır xəstəliklərlə mübarizə aparan uşaqlarımız sağlamlıqlarına qovuşacaqlar.
Ülkər XASPOLADOVA,
"Azərbaycan"
