16 May 2022 21:44
246
PARLAMENT

Azərbaycan və Qazaxıstan parlamentlərinin vitse-spikerləri arasında görüş keçirilib

Mayın 16-da Milli Məclis sədrinin müavini, Qazaxıstanla Parlamentlərarası əlaqələr üzrə işçi qrupunun rəhbəri Adil Əliyev ölkəmizdə səfərdə olan Qazaxıstan Respublikası Parlament Məclisi sədrinin müavini, Azərbaycanla parlament dostluq qrupunun rəhbəri Balaim Kesebayeva ilə görüşüb.

Parlamentin Mətbuat və ictimaiyyətlə əlaqələr şöbəsindən AZƏRTAC-a bildirilib ki, qonağı salamlayan Adil Əliyev ölkələrimizin tarixi əlaqələrindən danışaraq, bu münasibətlərin yüksələn xətlə inkişaf etməsinin hər iki ölkənin mənafeyinə uyğun olduğunu qeyd edib. Bildirib ki, dostluq münasibətlərinin inkişafında və möhkəmləndirilməsində parlamentlərarası əməkdaşlıq mühüm yer tutur.

Azərbaycanın 30 il ərzində işğal altında qalmış tarixi torpaqlarının azad edilməsinə toxunan sədr müavini, bu Qələbədən sonra regionda yaranmış yeni vəziyyət barədə danışıb. Adil Əliyev ölkəmizin hər zaman sülh mövqeyindən çıxış etdiyini bildirərək, Ermənistandakı bəzi dairələrin bu sülhdən narahat olduğunu və hər vəchlə buna mane olmağa cəhd etdiyini bildirib. Eləcə də ölkəmizin ərazisinin minalarla ən çox çirkləndirilmiş bölgələrdən biri olduğunu deyən sədr müavini, Azərbaycanın bu sahədə ən az yardım alan ölkələrin sırasında olduğunu qeyd edib. O bildirib ki, Ermənistanın mina xəritələrini tam təqdim etməməsi səbəbindən mülki şəxslər və hərbçilər bu minaların qurbanına çevrilir və ya xəsarət alırlar.

Adil Əliyev diqqətə çatdırıb ki, bütün bunlara baxmayaraq, uzun illər işğal altında qalmış və dağıdılmış tarixi Azərbaycan torpaqlarında aparılan genişmiqyaslı abadlıq-quruculuq işləri sayəsində bu yerlərə yeni nəfəs gəlib.

Qazaxıstan Respublikası Parlament Məclisi sədrinin müavini Balaim Kesebayeva səmimi görüşə görə minnətdarlığını bildirərək, iki qardaş dövlət arasında dostluğun daha da dərinləşməsindən məmnunluğunu ifadə edib. O, müxtəlif istiqamətlərdə olan əməkdaşlıq münasibətlərimizin ölkələrimizə töhfə verdiyini qeyd edib, istər ikitərəfli, istərsə də beynəlxalq miqyasda hər iki ölkənin bir-birinə dəstək verməsinin dostluğumuzun simvolu olduğunu qeyd edib.

Söhbət zamanı tərəfləri maraqlandıran digər məsələlər də müzakirə edilib.

Görüşdə Milli Məclisin deputatları, Qazaxıstanla parlamentlərarası işçi qrupunun üzvləri Sadiq Qurbanov, Sevinc Hüseynova və Anar Məmmədov da iştirak ediblər.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video