Noyabrın 20-də Azərbaycan Respublikasının Prezidenti yanında Dövlət Qulluğu Məsələləri üzrə Komissiyanın nümayəndələri Azərbaycan Texniki Universitetində (AzTU) olmuşlar.
AzTU-nun mətbuat xidmətindən AzərTAc-a bildirmişlər ki, sonuncu kurs tələbələri ilə keçirilən görüşdə bu ali təhsil ocağının prorektoru, dosent İsa Xəlilov bildirmişdir ki, məzunlarımızın məşğulluğunun təmin edilməsi universitetin rəhbərliyini düşündürən əsas məsələlərdən biridir.
Görüşdə çıxış edən komissiyanın Dövlət qulluğuna kadrların seçilməsi şöbəsinin müdiri Afaq Hüseynova və həmin şöbənin baş məsləhətçisi Nərmin Mirzəyeva bildirmişlər ki, gənclərə dövlət qayğısının artırılması, onların sosial müdafiəsinin təmin edilməsi, məşğulluq problemlərinin həll olunması məqsədi ilə komissiya mütəmadi olaraq müxtəlif tədbirlər həyata keçirir. "Azərbaycan gəncliyi 2011-2015-ci illərdə" Dövlət Proqramının qarşıya qoyduğu vəzifələri yerinə yetirmək üçün komissiya məqsədyönlü fəaliyyət göstərir.
Sonra tələbələrə dövlət qulluğuna qəbul üzrə müsabiqələrin keçirilməsi, dövlət qulluğunda işləmək istəyənlərin qeydiyyatdan keçirilməsi, test imtahanlarının təşkil edilməsi, qulluq funksiyaları, inzibati vəzifələrin təsnifatı, vəzifə maaşları, müxtəlif vəzifələrin tutulması şərtləri, təklif edilən vəzifəyə namizədlərin bilik və bacarıq səviyyəsinin müəyyən edilməsi yolları barədə ətraflı məlumat verilmişdir. Qeyd edilmişdir ki, dövlət qulluğuna qəbul müsabiqə və şəffaflıq əsasında mərkəzləşdirilmiş qaydada həyata keçirilir.
Tədbirdə, həmçinin AzTU-nun tələbələrinin dövlət qulluğuna qəbul edilməsinin mahiyyəti və üstünlükləri, qəbulun şərtləri ilə bağlı məsələlər ətraflı izah edilmişdir.
Diqqətə çatdırılmışdır ki, iqtisadiyyatı sürətlə inkişaf etməkdə olan Azərbaycan Respublikasının nazirlikləri, idarə və təşkilatları, şirkət və müəssisələrində dövlət qulluğunda çalışmaq istəyənlər üçün müxtəlif ixtisaslar üzrə boş yerlərin sayı getdikcə artır. Həmin yerləri tutmağa layiq real namizədlər obyektivlik, şəffaflıq şəraitində keçirilən test imtahanları və müsabiqələr yolu ilə müəyyən edilir. Bütün bunlar "Dövlət qulluğu haqqında" Azərbaycan Respublikası Qanununun müvafiq maddələrinə uyğun həyata keçirilir.
Görüş zamanı dövlət qulluğuna qəbulla bağlı tələbələri maraqlandıran suallar cavablandırılmışdır.
