Ölkəmiz bölgənin əmin-amanlığına mane olacaq istənilən cəhdin qarşısında aşılmaz sədd kimi dayanıb
Təkcə son dörd il yarım ərzində respublikamız adına həm beynəlxalq müstəvidə, həm də daxildə əldə edilən ardıcıl uğurların xronologiyasına ötəri nəzər saldıqda aydın görürük ki, ərazicə kiçik olmasına baxmayaraq, Azərbaycan bu gün dünyada sözü keçən, hesablaşılan ölkələrdən biri kimi nüfuzlu mövqeyə yüksəlib.
Bu, danılmaz reallıqdır ki, Azərbaycanın ərazi baxımından strateji bölgədə yerləşməsi tarixin bir sıra dönəmlərində ölkəmizin, xalqımızın çox bəlalara düçar olmasına səbəb olub. Lakin 1993-cü ildə təməli Ulu Öndər Heydər Əliyev tərəfindən qoyulan ölkəmizin inkişaf strategiyasının ötən iki onillik müddət ərzində Prezident İlham Əliyev tərəfindən uzaqgörənliklə davam etdirilməsi sayəsində Azərbaycan dünyanın nəqliyyat, enerji qovşağına çevrilib. Şimalla cənubu, şərqlə qərbi birləşdirən nəhəng dəhlizlərin reallığa çevrilməsi də Azərbaycanın səylərinin nəticəsidir və bütün bunlar təbii ki, həm ölkəmizin hərtərəfli rifah və tərəqqisinə, iqtisadi azadlığına birbaşa töhfələr verir, həm də beynəlxalq miqyasda sərbəst siyasət yürütməsinə mühüm imkanlar açır. Çoxsaylı ölkələrin, hətta dünya nəhəngləri ABŞ-nin, Çinin Azərbaycanla hərtərəfli əlaqələrdə maraqlı olması buna ən bariz nümunələrdəndir.
Məqsədyönlü, düşünülmüş addımlar
Vətən müharibəsində torpaqlarını işğaldan azad edərək BMT TŞ-nin qətnamələrini öz gücü ilə yerinə yetirən Azərbaycan ərazilərində separatizmə birdəfəlik son qoydu.
Bununla ölkəmiz dünyada pozulmuş ədaləti necə təmin etməyin modelini göstərdi, separatizmdən hələ də əziyyət çəkən ölkələrə mükəmməl nümunə göstərdi, XXI əsrdə hələ də müstəmləkəçilikdən əziyyət çəkən xalqların ümid, inam mənbəyi oldu, neokolonializmə qarşı azadlıq platformasına çevrildi.
Qlobal çağırışlara adekvat reaksiya göstərən, təbii kataklizmlərin aradan qaldırılmasına mühüm töhfələr verən Azərbaycanın bütün siyasi qütblərlə eyni məsafədə dayanan siyasət yürütməsinin indiki çalxalanan dünyada heç şübhəsiz elə də asan məsələ olmadığı danılmaz həqiqətdir. Ancaq yürütdüyü xarici siyasətdə qızıl ortanı müvəffəqiyyətlə tətbiq edə bilən ölkəmiz hətta kəskin problemləri olan və müharibə həddinə çatan ölkələr arasında barışdırıcı tərəf olması ilə diqqət çəkir və böyük rəğbət qazanır.
Təbii ki, bu gün Azərbaycanın dünyanın hər yerindən görünməsini təmin edən bütün uğurlar həyata keçirilən məqsədyönlü və uzaqgörən siyasətin nəticəsində mümkün olub. Bundan cəmi üç onillik əvvəl Azərbaycanın bir dövlət olaraq yox olmaq, müstəqilliyini itirmək kimi taleyüklü problemlərlə üzləşməsi faktı da tariximizin ağrı-acılı bir parçasıdır.
Bu il mayın 10-da Ulu Öndər Heydər Əliyevin 102-ci doğum günündə Ağdam Muğam Mərkəzinin açılışında Prezident İlham Əliyev məhz ölkəmizin keçdiyi ağır sınaqlarla dolu uzun və çətin yola nəzər saldı: "Otuz iki il ərzində bir çox hadisələr baş vermişdir. Ancaq bütün hadisələrə, bütün çətinliklərə baxmayaraq, biz inkişaf yolumuzdan dönmədik...
...Yəni biz bütün keçmiş tarixə nəzər salarkən, təbii ki, görürük, nə qədər məqsədyönlü, düşünülmüş addımlar atılmışdır. O addımlar ki, bugünkü Azərbaycan reallıqlarını təmin edir".
"...Bizimlə bu gün hesablaşmayan sabah peşman olur"
Qətiyyətlə milli maraqlarını təmin edən Azərbaycan bölgədə tamamilə yeni reallıqlar yaradıb. Bu gün Cənubi Qafqazla bağlı həyata keçirilən istənilən hər hansı layihə Azərbaycanın razılığı olmadan mümkünsüzdür desək, heç də yanılmarıq. Uğurlu xarici siyasəti, çevik diplomatik fəaliyyəti ilə dünyada cərəyan edən proseslərə adekvat reaksiya verən ölkəmiz regionun lider ölkəsi olaraq bölgənin əmin-amanlığına, tərəqqisinə maneə yaradan istənilən cəhdin qarşısında da aşılmaz sədd kimi dayanıb. Bu mövqe isə bəzi Qərb dairələrinin, xüsusilə müstəmləkəçi Fransanın ürəyincə deyil. Çünki köhnə müstəmləkələrindən bir-bir qovulan Parisin Cənubi Qafqazı yeni koloniyasına çevirmək kimi çirkin niyyətinin olduğu hər kəsə bəllidir.
Azərbaycanın 44 günlük müharibədə qələbə qazanmasından, xüsusilə də 2023-cü ildə antiterror tədbirləri nəticəsində Fransanın erməni separatizminə uzatdığı qolu kəsməsindən sonra Yelisey sarayı ölkəmizə düşmən kəsilib.
Bakının Parisin müstəmləkə siyasətini beynəlxalq platformalarda ifşa etməsi isə Makron hökumətini daha da qeyzləndirib. Təsəvvür edin ki, bu gün Fransa daxili və xarici siyasətdə uğradığı bütün biabırçı məğlubiyyətlərin günahını Azərbaycanda axtarır, ölkəmizi Fransanın daxili işlərinə qarışmaqda ittiham edir...
Ermənistanın təcavüzkar siyasətinə aktiv dəstək verən Fransa onu silahlandırır, revanşa həvəsləndirir. Lakin Makron hökumətinin ölkəmiz əleyhinə yürütdüyü bu çirkin fəaliyyət hər dəfəsində fiaskoya uğrayır. Azərbaycanın müasir dünyanın çağırışlarına cavab verən, yeni və ədalətli dünya nizamının formalaşdırılmasına birbaşa töhfələr verən müstəqil siyasəti Fransaya riyakar əməllərini reallaşdırmağa qətiyyən imkan vermir. İdman dili ilə desək, Bakı taktiki gedişləri ilə Parisi oyundankənar vəziyyətə salıb. Bu isə gözlənilən idi. Çünki indi Fransa zamanında Cənubi Qafqazın lider ölkəsi Azərbaycanla hesablaşmamağın peşmançılığını çəkir.
Ağdam Muğam Mərkəzinin açılışında Prezident İlham Əliyevin bəyan etdiyi kimi:
"...Təsadüfi deyil ki, Azərbaycana dünyada olan münasibət, - hətta bizə düşmənçilik edən dairələr, qüvvələr, ölkələr bilirlər ki, biz ləyaqətli xalqıq, hörmətə layiq olan xalqıq və bizimlə hesablaşmaq lazımdır. Ən azı yaşadığımız bölgədə bizimlə bu gün hesablaşmayan sabah peşman olur".
Yasəmən MUSAYEVA,
"Azərbaycan"
