ABŞ Prezidenti Donald Trampın Prezident İlham Əliyevin IV Şuşa Qlobal Media Forumunda səsləndirdiyi fikirlərlə bağlı sosial şəbəkələrdəki paylaşımı və dövlətimizin başçısına təşəkkür etməsi ölkələrimiz arasında yüksəksəviyyəli münasibətlərin göstəricisidir.
Milli Məclisin deputatı Nigar MƏMMƏDOVA qəzetimizə açıqlamasında deyib ki, enerji təhlükəsizliyi, terrorizmlə mübarizə, beynəlxalq missiyalara dəstək və regional sabitlik kimi istiqamətlər uzun illər Azərbaycanla Amerikanın əməkdaşlığının əsas istiqamətlərini təşkil edib. Hazırkı mərhələdə müşahidə olunan dinamika da Vaşinqton və Bakı arasında münasibətlərin inkişafına əlavə töhfə verir. "Ümumiyyətlə, dövlət başçıları arasında qarşılıqlı hörmət və etimad olduqca vacibdir. Xüsusilə mürəkkəb beynəlxalq münasibətlər sistemində liderlər səviyyəsində verilən mesajlar xüsusi əhəmiyyət kəsb edir. Prezident İlham Əliyev Şuşa Qlobal Media Forumunda çıxışı zamanı da ABŞ ilə münasibətlərin Azərbaycan üçün əhəmiyyətli olduğunu vurğulayaraq bildirdi ki, Bakı Vaşinqtonla qarşılıqlı hörmətə, beynəlxalq hüquqa və ölkələrin suverenliyinə əsaslanan əməkdaşlığın tərəfdarıdır. Cənab Prezidentin də qeyd etdiyi kimi, Azərbaycan heç bir ölkə ilə qarşıdurma siyasəti yürütmür və Amerika ilə münasibətlərin inkişaf etdirilməsi hər iki tərəfin maraqlarına cavab verir", - deyə o əlavə edib.
Deputat qeyd edib ki, münasibətlərin qarşılıqlı maraqlar və bərabərhüquqlu tərəfdaşlıq prinsipləri üzərində qurulması rəsmi Bakı üçün hər zaman ön plandadır. Bu yanaşma Azərbaycanın son illərdə həyata keçirdiyi çoxşaxəli xarici siyasət kursunun əsas prioritetidir. Xəzər hövzəsinin enerji ehtiyatlarının Avropa bazarlarına çıxarılması, Orta dəhlizin inkişafı, nəqliyyat-logistika layihələri və "yaşıl enerji" təşəbbüsləri Azərbaycanın ABŞ üçün də strateji əhəmiyyətini artıran amillər sırasındadır.
N.Məmmədova vurğulayıb ki, Azərbaycanın Cənubi Qafqazda formalaşdırdığı yeni regional əməkdaşlıq modeli Ağ Ev üçün maraq doğuran istiqamətlərdəndir: "Postmünaqişə dövründə sülh gündəliyinin irəli aparılması, kommunikasiyaların açılması, iqtisadi inteqrasiyanın təşviqi və regionun sabit inkişafı Vaşinqton tərəfindən dəstəklənir. Bu baxımdan ABŞ-nin Azərbaycanla konstruktiv dialoqunun güclənməsi, bütövlükdə regionun təhlükəsizlik arxitekturasına müsbət təsir göstərir. Prezident İlham Əliyevin Şuşa Qlobal Media Forumunda səsləndirdiyi fikirlər də Azərbaycanın Vaşinqtonla qarşılıqlı hörmətə və strateji maraqlara əsaslanan əməkdaşlığı genişləndirməkdə maraqlı olduğunu nümayiş etdirir".
Əsmər QARDAŞXANOVA,
"Azərbaycan"
