Gəncə Şəhər İcra Hakimiyyətinin başçısı Niyazi Bayramov 2024-2025-ci tədris ilində məzun olan şəhid övladları ilə görüşmüşdür.
N.Bayramov məzunları təbrik etmiş, onlara gələcək təhsil və həyat yollarında uğurlar arzulamışdır. Bildirmişdir ki, şəhidlik zirvəsinə ucalan qəhrəmanlarımız Azərbaycanın azadlığının, müstəqilliyinin və suverenliyinin simvoluna çevrilmişlər: "Şəhid ailələrinə göstərilən diqqət və qayğı Prezident İlham Əliyevin rəhbərliyi ilə həyata keçirilən dövlət siyasətinin əsas istiqamətlərindən biridir. Şəhid övladları isə yalnız valideynlərinin deyil, bütövlükdə xalqımızın şərəfini və ləyaqətini daşıyırlar. Onların təhsildə, davranışda və vətənpərvərlikdə nümunə olmaları gələcəyimizə olan inamı daha da gücləndirir".
Sonra Gəncə-Daşkəsən Regional Təhsil İdarəsinin müdiri Elçin Kərimov çıxış edərək qeyd etmişdir ki, 2024-2025-ci tədris ilində Gəncə şəhərində 3758 şagird məzun olub: "Bu məzunlar arasında şəhid övladları da var və onlar bizim qürur mənbəyimizdir. Şəhid övladları məktəbi uğurla bitirməklə valideynlərinin adını uca tutmuşlar".
Elçin Kərimov onu da vurğulamışdır ki, bu il əvvəlki illərlə müqayisədə şagirdlər Dövlət İmtahan Mərkəzi tərəfindən keçirilən imtahanlarda, eləcə də müxtəlif olimpiadalarda daha yüksək nəticələr əldə etmişlər. Qeyd edilmişdir ki, 28 nömrəli tam orta məktəbin məzunu, şəhid Asəf Maşıyevin övladı Əliheydər Maşıyev, 44 nömrəli ingilis dili təmayüllü məktəb-lisey kompleksinin məzunu, şəhid Seymur Allahverdiyevin övladı Asudə Allahverdiyeva, eləcə də 8 nömrəli tam orta məktəbin məzunu, şəhid Cavid Əliyevin bacısı Mədinə Əliyeva 2024-2025-ci tədris ilində məktəbi uğurla başa vuraraq tələbə adını qazanmışlar. Hər üç şəhid 2020-ci ildə Azərbaycanın ərazi bütövlüyü uğrunda aparılan 44 günlük Vətən müharibəsində şəhidlik zirvəsinə ucalmışdır.
Görüşün sonunda məzunlara xatirə hədiyyələri təqdim olunmuşdur.
Sabir ƏLİYEV,
"Azərbaycan"
