Astarada rayon icra hakimiyyətinin təşkilatçılığı ilə Ümummilli Lider Heydər Əliyevin anadan olmasının 102-ci ildönümünə həsr olunmuş konfrans keçirilmişdir.
Konfransda çıxış edən RİH-in başçısı Q.Ağayev qeyd etmişdir ki, görkəmli ictimai-siyasi və dövlət xadimi Heydər Əliyevin mənalı ömür yolu o qədər zəngindir ki, onu illərlə öyrənməyə çalışsaq da, öyrənilməmiş səhifələri yenə də qalacaqdır: "Heydər Əliyev Azərbaycan tarixində təkrarolunmaz rəhbər, qüdrətli dövlət başçısı, fədakar insan kimi əbədiləşmişdir. Ümummilli Liderimiz öz ali liderlik keyfiyyətləri ilə dünyanın siyasi elitasının ən uca zirvəsində qərarlaşan nəhəng şəxsiyyətdir".
Məruzəçi daha sonra bildirmişdir ki, xalqımızın taleyinə, Azərbaycan dövlətçiliyinin tarixinə təkrarolunmaz bir sima kimi daxil olan Heydər Əliyev Vətənin hər guşəsini əziz tutmuş və inkişafından ötrü var qüvvəsi ilə çalışmışdır: "Ulu Öndər Astara və astaralılarla daha çox bağlı olmuş, hər zaman görüşlərində onların əməyinə və dövlətçiliyə sədaqətinə yüksək qiymət vermişdir. Heydər Əliyevin 80 illik ömrünün müəyyən hissəsi Astara ilə bağlı olmuşdur. O, astaralılarla görüşündə qeyd etmişdir ki, "mənim gəncliyimin və həyatımın ən məsuliyyətli dövrü Astarada keçmişdir. Astaranın gözəl təbiəti, meşələri, dağ çayları, saf bulaqları və ən əsası sədaqətli insanları mənim üçün çox doğma, əzizdir". Dövlət təhlükəsizliyi orqanlarında çalışdığı ilk illərdən başlayaraq dəfələrlə Astarada olan Heydər Əliyev sərhədboyu ərazini qarış-qarış gəzmişdir".
Dahi şəxsiyyətin uzaqgörənliyini Azərbaycan Prezidenti İlham Əliyev əməli fəaliyyəti ilə təsdiqləyir. Müzəffər Ali Baş Komandan İlham Əliyev "Şuşasız Qarabağ, Qarabağsız Azərbaycan yoxdur" deyən Ulu Öndərin vəsiyyətini həyata keçirməklə xalqımıza Qələbə sevincini yaşatdı. İkinci Qarabağ savaşında Azərbaycan xalqının sarsılmaz birliyi, Müzəffər Ali Baş Komandanın dəmir iradəsi və rəşadətli Azərbaycan Ordusunun fədakarlığı ilə uzun illər işğal altında olan müqəddəs torpaqlarımız azad edilməklə xalqımızın 30 illik həsrətinə son qoyuldu. 19-20 sentyabr 2023-cü ildə keçirilən antiterror əməliyyatında isə igid oğullarımız cəmi bir sutka ərzində erməni silahlı dəstələrinin tör-töküntülərini məhv edərək dövlətimizin suverenliyini tam bərpa etdilər. Qələbələrimizin memarı olan Prezidentin Xankəndidə bayrağımızı qaldırması isə xalqımızın 200 illik gözləntisinin genişlənməsi oldu".
Konfrans Heydər Əliyevin ömür yolu və fəaliyyətindən bəhs edən filmin nümayişi ilə sona catmışdır.
