Anım Günü ərəfəsində Astara rayonunun Maşxan kəndində Vətən müharibəsində qəhrəmanlıqlar göstərərək şəhidlik zirvəsinə ucalmış Əliyev Ramin Muxtar oğlunun şəhadətinin ildönümü ilə əlaqədar məzarı ziyarət olunub.
AZƏRTAC-ın bölgə müxbiri xəbər verir ki, Astara Rayon İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin, Rayon Gənclər və İdman İdarəsinin əməkdaşlarının, şəhid Ramin Əliyevin ailə üzvlərinin, qazilərin iştirak etdiyi anım mərasimində Azərbaycanın suverenliyi və ərazi bütövlüyü uğrunda şəhid olanların xatirəsi bir dəqiqəlik sükutla yad edillib.
Mərasim iştirakçıları şəhid Ramin Əliyevin məzarı önünə gül dəstələri düzərək xatirəsini ehtiramla yad edib, ruhuna dualar oxuyublar.
Anım mərasimində çıxış edənlər 44 günlük Vətən müharibəsində Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi altında şanlı Azərbaycan Ordusunun əsgər və zabitlərinin, o cümlədən şəhid Ramin Əliyevin qəhrəmanlıqlarından danışıblar.
Çıxışlarda qeyd olunub ki, Vətən müharibəsində Azərbaycan xalqının vətən sevgisi, əzmkarlığı, iradəsi, xalq və ordunun ali məqsəd naminə həmrəyliyi, Ali Baş Komandanın qətiyyəti Azərbaycan Respublikası ərzilərinin işğaldan azad olunmasında əsas amil olub. Şəhidlərimizin bu Qələbədə ən çox payı vardır. Onların əziz xatirəsi böyüməkdə olan nəsil üçün örnəkdir.
Qeyd edək ki, şəhid Əiliyev Ramin Muxtar oğlu 4 fevral 1977-ci il tarixində Astara rayonunun Maşxan kəndində anadan olub. Vətən müharibəsində Azərbaycan Ordusunda Maxe kimi qulluq edən igid döyüşçü 29 sentyabr 2020-ci il tarixində Azərbaycan Respublikasının ərazi bütövlüyü uğrunda döyüşlərdə qəhrəmancasına şəhid olub.
İgid döyüşçü Ramin Əliyev Vətən müharibəsində göstrdiyi qəhrəmanlığına görə Azərbaycan Respublikası Prezidentinin müvafiq Sərəncamı ilə ”Vətən uğrunda” medalı ilə təltif olunub.
