ABŞ niyyətinə çata bilməyəcək

"Azərbaycan tarixin müxtəlif dövrlərində ABŞ-nin haqsız və ədalətsiz davranışlarına şahid olub. Zaman-zaman bu ölkənin məsələlərə ikili standartlarla yanaşdığını görmüşük. 1920-ci il yanvarın 11-də Paris Sülh Konfransının Ali Şurasında Azərbaycan de-fakto tanınıb. Ondan sonrakı dönəmdə isə Azərbaycan SSRİ kimi imperiyanın tərkibində olub. Ona görə də yalnız 1991-ci ildə  dövlət müstəqilliyimizi bərpa etdikdən sonra ABŞ-nin iç üzünü daha aydın görə bilmişik. Bu gün də ənənəvi riyakar siyasətini davam etdirən ABŞ Azərbaycana qarşı münasibətdə beynəlxalq hüququn norma və prinsiplərini pozur".
Bu fikirləri "Azərbaycan" qəzetinə açıqlamasında Milli Məclisin deputatı Anar İsgəndərov deyib. Deputat bildirib ki, müstəqillik tariximizdə ölkəmizin qazandığı uğurların heç biri ABŞ-ni sevindirməyib. Bu ölkə XX əsrin əvvəllərində olduğu kimi, yenə də Ermənistanın müdafiəsinə qalxır, hətta ermənilərə görə Türkiyəni də ittiham edir və saxta 24 apreli soyqırımı tarixi kimi qəbul edir. "Azərbaycanın Naxçıvan boyda ərazisi blokadada olduğu halda ABŞ-nin "Azadlığı müdafiə aktı"na etdiyi 907-ci düzəliş bizə qarşı böyük ədalətsizlikdir. Guya biz Ermənistanı blokadada saxlamışdıq… Bundan böyük saxtakarlıq, riyakarlıq olardımı?!", - deyə deputat qeyd edib.
Anar İsgəndərovun dediyinə görə, ABŞ-dəki erməni lobbisi, ermənilərin göz yaşlarını özlərininki hesab edən məmurlar tarix boyu bizə qarşı amansız mövqe ortaya qoyublar: "Əfqanıstanla müharibə başlayanda ABŞ-nin 907-ci düzəlişi müvəqqəti aradan qaldırılması da öz maraqlarına xidmət edirdi. Yoxsa torpaqlarımızın işğalda olduğu 30 il ərzində Ermənistanın xeyri üçün əlindən gələn hər şeyi etməzdi. Təsadüfi deyil ki, bu ölkə bircə dəfə də olsun işğalçının və işğala məruz qalanın hansı tərəf olduğunu qeyd etməyib. Bu, ABŞ-nin iç üzünü açan nümunələrdən yalnız biridir".
Deputat söyləyib ki, yeri gəldi-gəlmədi, Ermənistanı müdafiə edən və Qarabağın ermənilərdə qalması üçün cəhdlər göstərən ABŞ bu gün riyakar davranışlarını intensivləşdirib: "Bu ölkə İkinci Qarabağ savaşında, eləcə də sentyabrın 19-20-də keçirilən antiterror tədbirlərində əldə etdiyimiz zəfərləri həzm edə bilmir. Məhz bu cür dövlətlərin qərəzi və ikiüzlülüyü ucbatından Azərbaycan torpaqları 30 il separatçı yuvası olub. Şükürlər olsun ki, rəşadətli ordumuzun yenilməz gücü sayəsində uzun illərdir ki, mövcud olan bu separatçı rejim darmadağın edilib".
Anar İsgəndərov vurğulayıb ki, ABŞ Azərbaycanın haqq işini tanımaq əvəzinə qərəzli bir mövqe tutub. Onların fikrincə, guya ermənilərə qarşı etnik təmizləmə aparılıb: "Ermənistanın baş naziri də bu gün etiraf edir ki, Qarabağdan köçürülən ermənilər etnik təmizləmə və zorakılığa məruz qalmayıblar. Həmin günlərdə müxtəlif xarici  televiziya kanallarında Qarabağdan köçən ermənilərin müsahibələri yayımlanırdı ki, onlar az da olsun, təhdidlə və ya təzyiqlə üzləşməyiblər. ABŞ nəyə əsasən deyir ki, Qarabağda proses ədalətli şəkildə aparılmayıb? Maraqlıdır, görəsən, ABŞ ədalət dedikdə nəyi nəzərdə tutur?"
Deputat ABŞ-nin mövqeyinin heç bir zaman Azərbaycanın maraqları üzərində qurulmadığını bildirib. Lakin bu, bizi narahat etmir. Çünki bu gün istər iqtisadi, istərsə də hərbi-siyasi cəhətdən güclü Azərbaycan var. Odur ki, ABŞ-nin haqqımızı tapdalamaq istəyi gözündə qalacaq. Bu ölkə heç vaxt ölkəmizlə bağlı riyakar arzularına çata bilməyəcək. 

Nəzrin QAFARZADƏ,
"Azərbaycan"