Qubanın Davudoba kəndinin camaatı da yol sarıdan rahatlığa çıxdı
Abad yol rahatlıq və inkişafdır. Quba kimi rayonda isə həm də turizmin genişlənməsinin ilkin şərtidir. İstəyir lap cənnət olsun, yolu yoxdursa, ora kimsə üz tutmayacaq.
Qubanın kəndlərinin demək olar ki, hamısı turizm əhəmiyyətlidir. Belə məkanlardan biri də Hacıhüseynli kənd inzibati ərazi dairəsidir. Dairənin ərazisinə Davudoba, Qımılqışlaq, Əliməmmədoba, Küpçalqışlaq, Hacıqayıb, Çaydüzü, Mirzəqasım, Ərməkiqışlaq, Hacıhüseynli kəndləri və Gənclər qəsəbəsi daxildir.
- Kəndlərimiz həm dağlıq, həm də aran ərazilərdə yerləşir, - deyə Quba Rayon İcra Hakimiyyəti başçısının Hacıhüseynli kənd inzibati ərazi dairəsinin nümayəndəsi Valeh Əmrullayev bildirir. - Coğrafi baxımdan gözəl təbiətə malik, yazda-yayda yaşıllıqlarla, qışda qarla örtülən kəndlərimiz buralara ayaq basan hər kəsi valeh edir. Kəndlər bir-birinə yaxın məsafədə yerləşdiyindən yerli əhali xeyirdə-şərdə bir yerdə olur. Gənclər qəsəbəsi və bir çox kəndlərimizdə demək olar ki, bütün daxili infrastruktur müasir tələblər səviyyəsində qurulub.
Bu inzibati dairənin kəndlərinin çoxu rayonun turizm sektorunda müəyyən çəkiyə malikdir. Xüsusən yayda Bakıdan bu kəndlərə gələn çoxdur. Odur ki, rayon rəhbərliyi vaxtaşırı ərazidə yerləşən kəndlərdə sakinlərlə görüşür və ortaya çıxan problemləri yoluna qoyur. İnzibati dairəyə daxil olan Davudoba kəndinin sakinləri də onlarla görüşə gələn rəhbər vəzifəli şəxslər qarşısında bəzi məsələləri önə çəkdi. Kənd sakini Almas Daşdəmirov deyir ki, burada az qala hamı bir-birilə qohumdur.
- Yəni problem varsa, yığışıb birlikdə müzakirə edirik. Səyyar görüşdə iştirak edən camaatımız rayon rəhbərliyinə yolumuzla bağlı problem olduğunu bildirdi. Rayon rəhbəri isə məsələni nəzarətə götürəcəyinə söz verdi.
Tezliklə Hacıhüseynli kəndindən Davudoba kəndinə qədər olan yol təmir edilməyə başlandı. Bir qədər də genişləndirilən yolun hər iki tərəfində daşıyıcı arxlar qazıldı. Çox yerdə yolun kənarında belə arxlar olmadığına görə hərəkət zolaqları tez sıradan çıxırdı. Eləcə də yolun ətrafındakı işıq dirəkləri yeniləndi.
Bu günlər yolun təmirdən sonra açılışı oldu. Tədbirə ətraf kəndlərdən də xeyli sakin axışıb gəlmişdi. Rayon rəhbərlərinin iştirakı ilə yol davudobalıların ixtiyarına verildi.
- Biz kənd yolunun təmirini ən vacib iş sayırıq, - deyə kənd sakini Tamella Məmmədova ürək sözlərini bizimlə bölüşdü: - Ətraf kəndlərin çoxunun yolu yaxşı idi. Biz onlara qonaq gedəndə, düzü, paxıllıq edirdik. Bu gün bizim də rahat yolumuz var. Bu işdə əməyi olan hər kəsə minnətdarıq.
Akif ƏLİYEV,
"Azərbaycan"
