Şri-Lanka hakimiyyəti Kolombo Beynəlxalq Hava Limanında 22 buddist rahibini baqajlarında 112 kiloqram narkotik tapıldıqdan sonra həbs edib. Gömrük rəsmiləri Tailanddan olan rahiblərdə çoxlu miqdarda kannabis aşkar ediblər.
Bildirildiyinə görə, marixuana şəffaf torbalara qablaşdırılıb və onların baqajlarının gizli ikiqat altlığına yerləşdirilib. Şri-Lanka gömrük rəsmisi bildirib ki, "hər bir rahib təxminən beş kiloqram narkotik maddə guman edilən bitki materialı daşıyıb və bunun cəmi 112 kiloqram olub".
Polis mənbələri yerli “The Daily Mirror” qəzetinə bildiriblər ki, 22 rahib bazar günü Şri-Lankanın qərbində yerləşən Neqombo şəhər Magistrat Məhkəməsinə gətirildikdən sonra əlavə dindirilmə üçün həbsxanaya göndəriliblər. İlkin araşdırma əməliyyatın Kolombo şəhərinin kənarındakı Camburaliya ərazisindəki bir məbəddən üç rahib tərəfindən koordinasiya edildiyini ortaya qoyub. Onların Facebook vasitəsilə daha 19 nəfəri cəlb etdikləri barədə məlumat var.
Əsasən 30 yaşdan kiçik və təlim keçən gənc rahiblərin çoxu pulsuz uçuş, yaşayış yeri və yeməklə cəlb edilib. Deyilənə əsasən, əvvəlcə onlara məktəblilər üçün "təhsil materialları və şirniyyatlar" daşıyacaqları deyilib.
Yerli medianın məlumatına görə, kuş" kannabisi və həşiş olduğu guman edilən narkotik maddələrin dəyəri təxminən 3,6 milyon ABŞ dollarıdır.
Həşiş ümumiyyətlə Tailandda qanunsuzdur və ciddi şəkildə tənzimlənir, xüsusən də THK (tetrahidrokannabinol) (kannabisdə (marixuana) olan əsas psixoaktiv komponentdir və zehni dəyişdirici təsirlərə, eyforiyaya və rahatlamaya səbəb olur) tərkibli məhsullara gəldikdə.
Kannabis 2022-ci ildə qismən dekriminallaşdırılsa da, onun ekstraktları, məsələn, həşiş, ciddi şəkildə məhdudlaşdırılır və müvafiq icazə olmadan qadağandır.
Tailandda ölüm cəzası kannabis və ya həşişin satışına və ya istifadəsinə şamil edilmir. Cinayət əməli olaraq qalsa da, yalnız ağır narkotiklərin kütləvi miqyaslı ticarəti kimi xüsusilə ağır narkotik cinayətlərinin müstəsna hallarında tətbiq edilir və praktikada adətən ömürlük həbs cəzası ilə əvəz olunur.
Rizvan CƏFƏROV,
“Azərbaycan”
