8 Noyabr - Zəfər Günü xalqımızın yaddaşına əbədi olaraq yazılıb. Çünki bu əlamətdar gün tariximizin ən şərəfli səhifələrindən biridir. Fərəh, qürur doğuran gündür, Qələbə tarixidir, xalqımızın uzun illərdən bəri gözlədiyi, həsrətində olduğu unudulmaz gündür. Torpaqlarımızın işğalına son qoyulan gündür.
Bu əlamətdar və sevinc dolu gün müəssisə və təşkilatlarda, tədris ocaqlarında böyük təntənə ilə qeyd edilir. Bakı şəhər Tofiq Məmmədov adına 239 nömrəli orta məktəbdə də Zəfər bayramı təntənə ilə qeyd olundu. "Zəfərin mübarək, Azərbaycan!" adlı tədbir bütün siniflərdə keçirildi.
Əvvəlcə ibtidai sinif müəllimləri Sədiqə Kərimova, Bəniyə Qarayeva şagirdlərə Zəfər Günündən danışdılar. Bildirdilər ki, 27 sentyabr 2020-ci ildə erməni təxribatı nəticəsində İkinci Qarabağ müharibəsi başladı. Zabit və əsgərlərimiz torpaqlarımızı müdafiə etmək, düşmən hücumunun qarşısını almaq üçün yüksək əhvali-ruhiyyə ilə döyüşlərə atıldılar. Hərbçilərimizin qəhrəmanlığı, cəsarəti sayəsində erməni işğalçılarının hücumları dayandırıldı. Uzun illərdən bəri qəsbkarların işğalında qalmış torpaqlarımız azad olunmağa başlanıldı. Şanlı Azərbaycan Ordusunun zabit və əsgərləri Müzəffər Ali Baş Komandan İlham Əliyevin rəhbərliyi altında döyüşlərdə böyük hünər və qəhrəmanlıq göstərərək düşmənləri torpaqlarımızdan qovdular. 30 ilə yaxın işğalda qalmış ərazilərimiz azadlığına qovuşdu. İkinci Qarabağ müharibəsinin 42-ci günü musiqi beşiyimiz olan Şuşa şəhəri erməni işğalçılarından təmizləndi. Noyabrın 10-da düşmən məğlub olduğuna görə döyüşlər dayandırıldı. Azərbaycan Prezidenti İlham Əliyevin 3 dekabr 2020-ci il tarixli sərəncamı ilə hər birimiz üçün əziz və müqəddəs olan Şuşanın işğaldan azad olunduğu gün - 8 Noyabr Zəfər Günü kimi təsis edildi. Bu əlamətdar gün münasibətilə müəllimlər şagirdləri təbrik etdilər və onlara dərslərində uğurlar arzuladılar.
Məktəbin direktoru Nisə Fərəcova çıxış edərək xalqımıza böyük sevinc bəxş etmiş Zəfər Günündən bəhs etdi. Dedi ki, Zəfər Günü hər birimiz üçün müqəddəs və əzizdir. Artıq neçə ildir ki, xalqımız bu bayramı sevinc içində, böyük təntənə ilə qeyd edir. Zəfər Gününün sevincini yaşatdıqlarına görə Müzəffər Ali Baş Komandan İlham Əliyevə və şəhidlərimizə, qazilərimizə minnətdarlıq bildirildi.
Şagirdlərdən Arzu Məhərrəmli, Məryəm Süleymanlı, Tamerlan Niftəliyev, Məryəm Məmmədli və başqaları Zəfər Gününü, igidliyi, qəhrəmanlığı tərənnüm edən şeirlər söylədilər.
Vahid MƏHƏRRƏMOV,
"Azərbaycan"
jpg_1733517919.jpg)
