Prezident İlham Əliyev ötən il fevralın 14-də Milli Məclisdə andiçmə mərasimi zamanı bir sıra əsas məsələlərə toxunaraq, o cümlədən, Azərbaycanın daxili və xarici nailiyyətləri, gələcək məqsədləri və dövlətin qarşısında duran əsas vəzifələr barədə danışmışdı.
Prezident mərasim zamanı Azərbaycan xalqına göstərdiyi etimad və dəstək üçün təşəkkürünü bildirmiş və ölkənin inkişafı və ərazi bütövlüyünün qorunması üçün gələcəkdə də əlindən gələni edəcəyini vurğulamışdı.
Xarici siyasətdə müsbət dəyişikliklər və Ermənistanla münasibətlərin normallaşması məsələləri, ölkənin iqtisadi inkişafı, hərbi gücünün gücləndirilməsi, texnoloji inkişaf, bərpaolunan enerji layihələri və xarici sərmayə ilə bağlı həyata keçirilən islahatların əvvəlki dönəmdə olduğu kimi, bundan sonra da davam edəcəyini bildirmişdi.
Azərbaycanın beynəlxalq nüfuzunun artması, eyni zamanda dünya miqyasında ölkəmizin aktiv rol oynaması ötən il özünü daha qabarıq göstərmişdi. Prezident İlham Əliyev Azərbaycanın müstəqil xarici siyasət apardığını və heç bir xarici qüvvənin ölkəmizi düz yoldan döndərə bilməyəcəyini bəyan etmişdi.
Ötən ildən etibarən Azərbaycan daha iki ölkəyə - Macarıstana və Serbiyaya qaz nəql etməyə başladı. Bununla bizim Avropaya qaz təchizatımızın coğrafiyası daha da genişləndi. Bu gün Azərbaycan 12 ölkəyə qaz nəql edir ki, onlardan onu Avropa ölkəsidir.
Ötən il Bakıda keçirilən Cənub Qaz Dəhlizi Məşvərət Şurası çərçivəsində nazirlərin 10-cu və Yaşıl Enerji Məşvərət Şurası çərçivəsində nazirlərin 2-ci iclasında çıxışı zamanı cənab Prezident ötən il baş verən vacib hadisələrdən biri kimi Xəzər dənizinin Azərbaycana məxsus sektorunda, "Abşeron" qaz-kondensat yatağında təbii qazın kommersiya hasilatı olduğunu qeyd etmişdi. Bu, "Şahdəniz"dən sonra ikinci nəhəng qaz ehtiyatlarının kəşfi deməkdir.
Prezident İlham Əliyevin növbəti uğuru BMT-in İqlim Dəyişmələri üzrə Çərçivə Konvensiyasının Tərəflər Konfransına evsahibliyinin dünyanın 200-ə yaxın ölkəsi tərəfindən Azərbaycana həvalə olunması idi. COP29 tədbirinin uğurla keçirilməsi də beynəlxalq arenada qazandığımız növbəti nailiyyət oldu.
Türk Dövlətləri Təşkilatının regionda güc mərkəzinə çevrilməsində də məhz cənab Prezident İlham Əliyevin böyük dəstəyi olub, türk dövlətlərinin inteqrasiyasını təşviq edərək regional əməkdaşlığı gücləndirib.
Cari ildə Azərbaycanın Qahirədə keçirilən (D8) İqtisadi Əməkdaşlıq Təşkilatının Sammitində bu təşkilatın üzvlüyünə qəbul edilməsi də çox əlamətdar hadisədir. Otuz ildən sonra bu təşkilata üzv olan ilk ölkə Azərbaycan oldu.
İlham Əliyevin prezidentliyi dövründə həyata keçirilən infrastruktur layihələri ölkənin iqtisadi gücünü artırıb, sosial rifah sahəsində həyata keçirilən islahatlar isə xalqın həyat səviyyəsini əhəmiyyətli dərəcədə yaxşılaşdırıb. Müasir avtomobil yolları və magistrallar inşa edilib, həm daxili, həm də beynəlxalq əlaqələri asanlaşdıran yol şəbəkəsi qurulub. Hava nəqliyyatı sahəsində də böyük nailiyyətlər əldə edilib. Yeni hava limanları tikilib, mövcud olanlar isə beynəlxalq standartlara uyğun şəkildə yenidən qurulub. Xüsusilə işğaldan azad edilmiş ərazilərdə Füzuli, Zəngilan hava limanlarının istifadəyə verilməsi Azərbaycanın iqtisadi və strateji imkanlarını daha da artırıb.
Müzəffər Ali Baş Komandan İlham Əliyevın adı Azərbaycanın şanlı tarixinə qızıl hərflərlə yazılıb. Azərbaycan xalqının öz dövlət rəhbərinə yüksək inam və etimadı ötənilki seçkilərlə bir daha təsdiqləndi.
Pərvanə VƏLİYEVA,
Milli Məclisin deputatı
