Azərbaycan Respublikası Vəkillər Kollegiyasının (VK) Rəyasət Heyətinin növbəti iclası keçirilib.
Bu barədə Vəkillər Kollegiyasından məlumat verilib.
Kollegiyanın sədri Anar Bağırov Rəyasət Heyətinin cari fəaliyyəti, son dövrdə həyata keçirilmiş tədbirlər, görülmüş işlər barədə ətraflı məlumat verib, habelə qarşıdan gələn 8 Mart – Beynəlxalq Qadınlar Günü münasibətilə Azərbaycan xanımlarını təbrik edib.
Gündəliyə uyğun olaraq bəzi vəkillərin digər vəkil qurumlarına keçməsi, yeni Vəkil Bürosunun təsis edilməsi, müəyyən müddətə üzvlük haqqından azad olunma və yaranmış borcların silinməsi ilə bağlı müraciətlərinə baxılıb. Müraciətlər müzakirə edildikdən sonra Rəyasət Heyəti tərəfindən müvafiq qərarlar qəbul olunub.
Həmçinin iclasda “Philip C. Jessup” Beynəlxalq Məhkəmə Müsabiqəsində iştirak edəcək tələbələrə maliyyə dəstəyinin göstərilməsi ilə bağlı ADA Universiteti tərəfindən daxil olmuş müraciətə baxılıb. Hüquq fakültəsinin tələbələrinin beynəlxalq səviyyədə təmsilçiliyinin və praktiki biliklərinin artırılmasının əhəmiyyəti nəzərə alınaraq, müvafiq maliyyə dəstəyinin göstərilməsi barədə müsbət qərar qəbul edilib.
Bununla yanaşı, iclasda “Vəkillərin peşə hazırlığı və ixtisasının artırılması haqqında” Qaydaların, VK Tədris Mərkəzinin Əsasnaməsinin təsdiqi məsələsi müzakirə olunub. Qeyd edilən sənədlərin vəkillərin davamlı peşə inkişafının təmin olunmasına, tədris prosesinin sistemli və vahid standartlar əsasında təşkili məqsədinə xidmət etdiyi bildirilib və onların təsdiqi qərara alınıb.
Eyni zamanda, Vəkil büroları və fərdi qaydada fəaliyyət göstərən vəkillər tərəfindən 2025-ci ildə hüquqi yardım göstərilməsi ilə bağlı illik statistik hesabatın dərc olunması məsələsinə baxılıb. Aparılan müzakirələrdən sonra hesabatın ictimaiyyətə təqdim edilməsi qərara alınıb.
Bundan başqa, Prezident İlham Əliyevin Sərəncamı ilə hakim vəzifəsinə təyin edilmiş kollegiyanın 12 üzvünün mükafatlandırılması və vəkillik fəaliyyətlərinə xitam verilməsi məsələsinə baxılıb. Rəyasət Heyəti tərəfindən bununla bağlı müvafiq müsbət qərar qəbul olunub.
İclasın davamında Vəkillərin İntizam Komissiyasının rəylərinə baxılıb. Qəbul edilmiş qərarlara əsasən, yol verilmiş intizam pozuntularına görə 1 vəkil kollegiyadan xaric edilib, 3 vəkil barəsində cərimə tədbiri tətbiq olunub və 1 vəkilə isə peşə fəaliyyəti zamanı qanunvericiliyin tələblərinə ciddi riayət etməsi tapşırılıb.
Sonda kollegiyanın fəaliyyəti ilə bağlı digər cari və əhəmiyyətli məsələlər də müzakirə edilib və zəruri qərarlar qəbul olunub.
jpeg_1776680036.jpeg)
