Bu, mənim Türkiyə İnsan Hüquqları və Bərabərlik Qurumu sədri vəzifəsinə başladıqdan sonra ilk xarici səfərimdir. İlk səfərimin qardaş ölkəyə olmasından məmnunluğumu ifadə edir, Azərbaycan Hökumətinə, Azərbaycan dövlətinə dərin təşəkkürümü bildirirəm.
AZƏRTAC xəbər verir ki, bunu Türkiyə İnsan Hüquqları və Bərabərlik Qurumunun sədri Vasip Şahin jurnalistlərə açıqlamasında deyib.
Süni intellektin yaratdığı beynəlxalq risklər və imkanlar mövzusuna həsr olunmuş beynəlxalq tədbirin təşkil olunmasının əhəmiyyətini qeyd edən V.Şahin fikirlərinə belə davam edib: "Düşünürəm ki, bu gün dünyanın ən mühüm gündəm mövzularından biri məhz budur. Buna görə də insan hüquqları institutlarının təşəbbüsü ilə beynəlxalq formatda belə bir toplantının keçirilməsi xüsusi əhəmiyyət kəsb edir. Biz də ölkə olaraq bu istiqamətdə çox ciddi işlər görürük. Bu, yalnız texniki və texnoloji inkişaf və dəyişiklik deyil, eyni zamanda, sosial, mədəni və xüsusilə hüquqi baxımdan möhkəm bir əsasın formalaşdırılmasını tələb edən bir fenomendir. Bəşəriyyət gələcək inkişaf yolunda süni intellektdən necə istifadə edəcək, ondan necə faydalanacaq və onun yarada biləcəyi risklərə qarşı hansı tədbirləri görəcək? Bu gün bütün dünyada olduğu kimi, burada həm risklərin qarşısının alınması, həm də gələcək üçün zəruri hüquqi və institusional əsasların hazırlanması istiqamətində fikir mübadiləsi aparılır.
Türkiyədə də bu məsələ çox ciddi şəkildə gündəmdədir. Diqqət yalnız süni intellektin insanlara verdiyi faydalara yönəlmir, eyni zamanda, süni intellektin, rəqəmsallaşmanın və texnologiyanın yaratdığı risklərə qarşı, xüsusilə kibertəhlükəsizlik sahəsində ciddi araşdırmalar, fəaliyyətlər və hüquqi-təşkilati tədbirlər həyata keçirilir.
Ona görə də hesab edirəm ki, bu cür görüşlərin tez-tez keçirilməsi həm ölkəmiz üçün, həm də beynəlxalq səviyyədə sistemin daha təhlükəsiz və etibarlı olması baxımından çox vacibdir".
