Ukraynada hamımızın qorxduğu qış ssenarisi artıq reallığa çevrilib. İntensiv zərbələr ekstremal aşağı temperatur şəraitində həyati əhəmiyyətli enerji və su təchizatı sistemlərini dağıdır. Ölkə üzrə milyonlarla ailə istilik, elektrik enerjisi və su təchizatı olmadan yaşayır.
Bu barədə AZƏRTAC-a UNICEF-in Ukraynadakı nümayəndəliyinin rəhbəri Munir Məmmədzadə məlumat verib.
“Uşaqlar və onların ailələri daim sağ qalmaq uğrunda mübarizə aparır. Bu ölkədə həyat mənfi 18 dərəcə temperaturda istilik olmadan, fasiləsiz zərbələrdən qorunmaq və ekstremal temperatur şəraitində sağ qalmaqdan ibarət olub”, - deyə o bildirib.
Onun sözlərinə görə, UNICEF çadırları psixososial dəstək üçün materiallarla da təchiz edib. Bu materiallar azyaşlılara istirahət və əyləncə üçün oyunlar və oyuncaqlar təqdim edir, həm uşaqlara, həm də böyüklərə artan narahatlıqla mübarizə aparmağa kömək edir.
“Məktəb yaşlı uşaqlar üçün belə sərt şərait həm fiziki, həm də psixoloji baxımdan təsirini göstərir. Qaranlıq və aşağı temperatur qorxu və stresi gücləndirə, tənəffüs və digər xəstəliklərə səbəb ola və ya onları ağırlaşdıra bilər.
Daha həssas qrup ən kiçiklərdir. Yenidoğulmuşlar və körpələr bədən istiliyini sürətlə itirir və hipotermiya, eləcə də tənəffüs xəstəlikləri riskinə daha çox məruz qalırlar. Bu hallar kifayət qədər istilik və tibbi yardım olmadıqda, qısa müddətdə həyat üçün təhlükəli vəziyyətə çevrilə bilər.
Təhsil də yenidən pozulub. Bu, paytaxtda və digər bölgələrdə məktəblərin və uşaq bağçalarının tamamilə distant təhsilə keçməsinə səbəb olub. Lakin elektrik enerjisinin kəsilməsi onlayn dərslərin keçirilməsini də çətinləşdirib”, – deyə M.Məmmədzadə vurğulayıb.
O qeyd edib ki, fövqəladə çətinliklərə baxmayaraq, zərər dəydikdən dərhal sonra enerji və su təchizatı sahəsinin mütəxəssisləri elektrik, istilik və su infrastrukturlarında təcili bərpa işlərinə başlayırlar.
“Xidmətlərin bərpası zamanla yarışa girməkdir və UNICEF genişmiqyaslı qış yardım proqramı çərçivəsində bu prosesi dəstəkləyir, o cümlədən 470 min uşaq daxil olmaqla 1,65 milyon insana yardım göstərilməsi üçün fasiləsiz fəaliyyət göstərir.
Bu iş bir neçə ay əvvəl başlayıb və əvvəlki illərdə edilmiş investisiyaları da əhatə edir. Həmin investisiyalar bugünkü fasilələrin təsirini yumşaldır. Kiyevdə mərkəzi istilik elektrik stansiyalarına zərər dəydikdən sonra əvvəlcədən hazırlanmış ehtiyat generatorları dərhal işə salaraq elektrik enerjisinin verilməsini təmin etdik və həyati əhəmiyyətli xidmətlərin tam dayandırılmasının qarşısını aldıq. Ölkə üzrə su və istilik təchizatı müəssisələrinə 79 güclü generator göndəririk, fasilələri azaltmaq və daha dayanıqlı istilik təmin etmək məqsədilə bələdiyyələrlə əməkdaşlığımızı genişləndiririk.
Cəbhəyanı bölgələrdə valideynlərin uşaqlarının təxirəsalınmaz ehtiyaclarına diqqət ayıra bilmələri üçün 86 min uşaq daxil olmaqla 183 mindən çox insana qış mövsümü üzrə maliyyə yardımı göstərilib. Həmçinin təhsil sistemi vasitəsilə təxminən 445 min şagird üçün daha əlverişli şəraitin yaradılması və təhsil müəssisələrinin açıq qalması məqsədilə təcili modernləşdirmə işlərinə dəstək üçün 1500 təhsil müəssisəsinə qış qrantları ayrılıb”, – deyə UNICEF-in Ukraynadakı nümayəndəliyinin rəhbəri bildirib.
Onun sözlərinə görə, qış mövsümündə yaranan bu təhlükə ötən il əvvəlki illə müqayisədə uşaqlar arasında təsdiqlənmiş itkilərin sayının 11 faiz artmasından sonra baş verib. Bildirilib ki, azı 92 uşaq həlak olub, 652 uşaq yaralanıb. Ümumilikdə müharibə başlayandan indiyədək 3,2 mindən çox uşaq həlak olub və ya yaralanıb.
