BMT-nin Təhsil, Elm və Mədəniyyət Təşkilatının (UNESCO) Ümumdünya İrs Komitəsinin 47-ci sessiyası qurumun mənzil qərargahında Büro iclasları ilə işə başlayıb.
AZƏRTAC xəbər verir ki, Azərbaycan da sessiyada təmsil olunur.
İyulun 16-dək davam edəcək sessiyada əvvəlcə gündəlik qəbul ediləcək, sonra 2024-2025-ci illər üçün Ümumdünya İrs Fondunun icrası, 2026-2027-ci illər üçün Ümumdünya İrs Fondunun büdcə təklifi və COM 13 - məsləhətçi qurumun yaradılması qərarına əməl olunması ilə bağlı hesabatlar dinləniləcək. Ümumdünya İrs Mərkəzinin fəaliyyəti və Ümumdünya İrs Komitəsinin qərarlarının icrası haqqında hesabat və 2025-ci il Dünya İrs Gənc Peşəkarlar Forumunun mesajının təqdim olunacağı gözlənilir.
Afrika üçün Ümumdünya İrs Strategiyası üzrə inkişaf hesabatı, eləcə də 2023-2029-cu illər üçün Kiçik Ada Dövlətləri (SIDS) üçün Ümumdünya İrsi ilə əlaqədar fəaliyyətlərin həyata keçirilməsi üzrə inkişaf hesabatına baxılacaq.
Ümumdünya İrs mülkiyyətlərinin qorunması vəziyyəti ilə bağlı müzakirələr aparılacaq. Ümumdünya İrs Siyahısı və Təhlükədə olan Ümumdünya İrs Siyahısının yenilənməsinə nəzər salınacaq.
Qeyd edək ki, Ümumdünya İrs Komitəsi Ümumdünya Mədəni və Təbii İrsin Mühafizəsi haqqında Konvensiyanın iki idarəedici orqanından biridir. O, Konvensiyanın iştirakçısı olan 195 dövlət arasından seçilmiş 21 dövlətin nümayəndələrindən ibarətdir. Komitə Konvensiyanın həyata keçirilməsinə, eləcə də Ümumdünya İrs Komitəsinin məsləhətçi qurumları tərəfindən hazırlanmış təhlillərə əsaslanan yeni nominasiyaların və Məşvərət Orqanları və UNESCO Katibliyi tərəfindən hazırlanmış təhlillər əsasında artıq qeyd edilmiş ərazilərin konservasiya vəziyyətinin araşdırılmasına cavabdehdir.
UNESCO bütün dünyada bəşəriyyət üçün müstəsna dəyər kimi tanınan mədəni və təbii irsin müəyyən edilməsini, qorunmasını və mühafizəsini təşviq edir. Bu missiya 1972-ci ildə UNESCO tərəfindən qəbul edilmiş Ümumdünya Mədəni və Təbii İrsin Mühafizəsi Haqqında Konvensiya adlı beynəlxalq müqavilədə öz əksini tapmışdır.
Ümumdünya İrs obyektləri, yerləşdikləri ərazidən asılı olmayaraq, bütün dünya xalqları tərəfindən paylaşılan ümumi sərvətdir.
Konvensiya təbiətin mühafizəsi və mədəni obyektlərin mühafizəsi konsepsiyasını özündə birləşdirməsi ilə fərqlənir. O, yerli icmaların roluna böyük diqqət yetirir və davamlı sosial-iqtisadi inkişafa töhfə verməklə yanaşı, digər müasir çağırışlar arasında iqlim dəyişikliyi, sürətli urbanizasiya, kütləvi turizm, təbii fəlakətlərin həlli üçün effektiv alətdir.
jpeg_1765387863.jpeg)
