Azərbaycan artıq rəqəmsal sahədə liderliyini möhkəmləndirmək üçün əhəmiyyətli addımlar atır. Ötən il ölkədə, həmçinin Telekommunikasiyanın İnkişafı üzrə Ümumdünya Konfransı keçirilib. Bu, dövlətlərin rəqəmsal inkişaf məsələlərini müzakirə etdiyi əsas qlobal tədbirdir.
Bu barədə AZƏRTAC-a eksklüziv müsahibəsində Beynəlxalq Telekommunikasiya İttifaqının (BTİ) baş direktor müavini Tomas Lamanauskas bildirib.
Tomas Lamanauskas Azərbaycanda aparılan səylərin davamlı qlobal inkişafın təşviqinə və regionda rəqəmsal texnologiyalar sahəsində əməkdaşlığın gücləndirilməsinə necə töhfə verə biləcəyinə dair sualı cavablandırarkən deyib ki, Azərbaycan COP29 çərçivəsində də rəqəmsal təşəbbüslərə yüksək səviyyədə sadiqliyini nümayiş etdirib. Xüsusilə, 80-dən çox hökumət tərəfindən imzalanan “Yaşıl Rəqəmsal Fəaliyyət” Bəyannaməsi işə salınıb.
“Bu, ölkənin artıq qlobal rəqəmsal gündəmin formalaşdırılmasında aparıcı rol oynadığını göstərir”, - deyə ekspert qeyd edib.
Tomas Lamanauskas, həmçinin xatırladıb ki, Telekommunikasiyanın İnkişafı üzrə Ümumdünya Konfransı zamanı Regional İnnovasiya Mərkəzi yaradılıb ki, bu da Azərbaycanın regional rəqəmsal inkişaf mərkəzi kimi mövqeyini daha da gücləndirir.
O bildirib ki, hazırda Azərbaycanda rəqəmsal təşəbbüsləri şəhər inkişafı gündəliyi ilə uzlaşdırmaq üçün bütün zəruri əsaslar mövcuddur.
“Ümumdünya Şəhərlər Forumu tərəfdaşları bir araya gətirmək və şəhərlərin gələcəyi üçün əsas əhəmiyyət kəsb edən məsələləri, o cümlədən “ağıllı” şəhərlərin və intellektual şəhər infrastrukturlarının inkişafını müzakirə etmək üçün əla platforma təqdim edir”,- deyə Tomas Lamanauskas bildirib.
BTİ nümayəndəsinin sözlərinə görə, belə texnologiyalar yalnız şəhərlərin səmərəli idarə olunması və həyat keyfiyyətinin yüksəldilməsi üçün deyil, həm də uzunmüddətli perspektivdə davamlı rəqəmsal transformasiyanın təmin olunması üçün vacibdir.
Tomas Lamanauskas əlavə edib ki, rəqəmsal liderlik üçün təməl artıq formalaşdırılıb və Ümumdünya Şəhərlər Forumu daha geniş rəqəmsal gündəliyi konkret şəhər rəqəmsal gündəliyinə çevirmək üçün imkan yaradacaq.
jpg_1773401613.jpg)
