Azərbaycan Dövlət Aqrar Universitetinin (ADAU) və Yeni Azərbaycan Partiyası Gəncə şəhər təşkilatının təşkilatçılığı ilə "Qərbi Azərbaycana qayıdış" mövzusunda "dəyirmi masa" keçirilmişdir.
Tədbirdə ADAU-nun rektoru Zəfər Qurbanov, Milli Məclisin deputatları Məlahət İbrahimqızı, Mahirə Hüseynova və Pərvin Kərimzadə, ADAU-nun prorektoru, professor Mahirə Hüseynova, YAP Gəncə şəhər təşkilatının sədri Bayram Aslanov, eləcə də universitetin professor-müəllim heyəti və fəal gənclər iştirak etmişlər.
"Dəyirmi masa"nı giriş sözü ilə universitetin rektoru Zəfər Qurbanov açaraq Qərbi Azərbaycana qayıdışın milli kimliyimizin, tarixi yaddaşımızın qorunması və ədalətin bərpası baxımından strateji əhəmiyyət daşıdığını diqqətə çatdırmış və qeyd etmişdir ki, dövlətimiz bu məsələyə xüsusi önəm verir.
Milli Məclisin deputatı Məlahət İbrahimqızı da çıxışında Qərbi Azərbaycana qayıdışın təkcə siyasi deyil, eyni zamanda tarixi ədalətin bərpası baxımından əhəmiyyətini diqqətə çatdırmışdır. Tədbirdə çıxış edən Mahirə Hüseynova isə Qərbi Azərbaycanın tarixi-mədəni irsinin qorunması və gələcək nəsillərə ötürülməsinin bizim əsas vəzifələrimizdən biri olduğunu qeyd etmişdir. YAP Gəncə şəhər təşkilatının sədri Bayram Aslanov da tədbirin əhəmiyyətindən danışmış, Qərbi Azərbaycana qayıdışın xalqımız üçün milli hədəf olduğunu bildirmişdir. Milli Məclisin deputatı Pərvin Kərimzadə isə görüşlə bağlı fikirlərini bölüşərək Qərbi Azərbaycana qayıdış ideyasının dövlət siyasətinin prioritet istiqamətlərindən biri olduğunu vurğulamışdır.
"Dəyirmi masa"da iştirak edən ADAU-nun kafedra müdirləri Aynur Həsənova və Zahir Ələsgərov, AMEA Gəncə bölməsinin rəhbəri Əlimuxtar Muxtarov çıxış edərək mövzu ilə bağlı fikirlərini bildirmişlər.
Sonda Mahirə Hüseynova özünün "Qərbi Azərbaycan paleotoponimlərinin linqvistik-etimoloji təhlili" və "XX əsrdə Dərələyəzdə Urbisid və Etnosid aktları" adlı kitablarını tədbir iştirakçılarına təqdim etmişdir.
S.YUNİSOĞLU,
"Azərbaycan"
