Dekabrın 10-da Azərbaycan Respublikası Mədəniyyət Nazirliyinin təşkilatçılığı ilə Heydər Əliyev Mərkəzində keçirilən “Mədəniyyət və Hüquq: Müasir çağırışlar” adlı elmi-praktik forumun sonuncu paneli “Mədəniyyətin beynəlxalq münasibətlər sistemində yeri” mövzusuna həsr olunub.
AZƏRTAC xəbər verir ki, panelin moderatoru mədəniyyət nazirinin müavini Fərid Cəfərov olub. Paneldə Azərbaycan Respublikasının UNESCO yanında daimi nümayəndəsi Elman Abdullayev, Azərbaycan Respublikası Xarici İşlər Nazirliyinin Beynəlxalq məhkəmə və arbitraj işləri şöbəsinin müdiri Bədir Bayramov, Bakı Dövlət Universiteti Hüquq fakültəsinin Beynəlxalq xüsusi hüquq və Avropa hüququ kafedrasının müdiri Əlizadə Məmmədov, Azərbaycan Respublikası Vəkillər Kollegiyası Tədris Mərkəzinin direktoru, Bakı Dövlət Universitetinin Hüquq fakültəsinin İnsan hüquqları və informasiya hüququ üzrə UNESCO kafedrasının professoru Əmir Əliyev çıxış ediblər.
Müzakirələr zamanı mədəniyyətin beynəlxalq hüquq müstəvisində yeri, dövlətlərarası münasibətlərdə mədəni diplomatiyanın artan rolu, mədəniyyətin “yumşaq güc” kimi qlobal təsir mexanizmlərindəki əhəmiyyəti geniş şəkildə təhlil olunub. Vurğulanıb ki, mədəni irsin qorunması və dünya birliyi ilə paylaşılması yalnız mədəni siyasət deyil, eyni zamanda beynəlxalq əməkdaşlığın sabitliyini və qarşılıqlı etimadı gücləndirən mühüm faktordur.
Panel çərçivəsində, həmçinin beynəlxalq təşkilatlarla əməkdaşlıq, mədəniyyət sahəsində hüquqi öhdəliklər, mədəni irsin müdafiəsi, eləcə də qlobal miqyasda mədəni müxtəlifliyin təşviqi mövzuları müzakirə olunub. Çıxışçılar qeyd ediblər ki, Azərbaycanın zəngin mədəni irsi ölkənin xarici siyasətinin vacib komponenti kimi çıxış edir və beynəlxalq arenada ölkəmizin nüfuzunun güclənməsinə xidmət edir.
Panelin sonunda bildirilib ki, mədəniyyət diplomatiyasının gücləndirilməsi və mədəni irsin beynəlxalq müstəvidə qorunması Azərbaycanının qlobal arenada mövqelərinin daha da möhkəmlənməsinə xidmət edəcək.
jpg_1768602815.jpg)
