"Otuzillik işğal dövründə ATƏT-in Minsk qrupu ədalətsiz mövqe sərgiləyərək, regionda status-kvonun qorunub saxlanmasında maraqlı idi. Bu səbəbdən danışıqlar nəticəsiz davam etdirilir, Ermənistan işğala həvəsləndirilir, Azərbaycan isə vəziyyətin sona qədər bu formada davam edə bilməyəcəyi ilə bağlı xəbərdarlıq edirdi".
Bu fikirləri "Azərbaycan" qəzetinə açıqlamasında Milli Məclisin deputatı Nigar Məmmədova deyib. O xatırladıb ki, Azərbaycanın ərazi bütövlüyünün bərpası BMT qətnamələrində əks olunsa da, həmin sənədlərin icrası üçün ciddi təzyiq mexanizmləri tətbiq edilməyib. "2020-ci ilin sentyabrında Azərbaycanın başlatdığı əks-hücum əməliyyatı da təsdiqlədi ki, rəsmi Bakı haqlıdır. Heç bir halda regionda status-kvo vəziyyəti sonsuza qədər davam edə, Azərbaycan torpaqlarında ikinci erməni dövləti yaradıla bilməz. Azərbaycan öz ərazi bütövlüyünü və suverenliyini bərpa etdikdən sonra ATƏT-in Minsk qrupunun yarıtmaz fəaliyyətinə xitam verildi. Beləliklə, proses məntiqi sonluğuna çatdı".
Deputat əlavə edib ki, Prezident İlham Əliyev ötən həftə Zəngilanda sakinlər qarşısında çıxışında bir daha ATƏT-in Minsk qrupunun fəaliyyətsizliyinə, onun uzun illər ərzində nümayiş etdirdiyi yarıtmaz vasitəçilik siyasətinə və münaqişənin həlli üçün çalışmaq əvəzinə, onu "dondurmaq" cəhdlərinə toxunub. Dövlət başçımızın bəyan etdiyi kimi, Minsk qrupu faktiki olaraq zaman uzatmaqla məşğul idi, onların əsas məqsədi münaqişəni həll etmək yox, onu idarəolunan vəziyyətdə saxlamaq idi. "Dondurulmuş münaqişə" anlayışı da məhz bu siyasətin məhsulu idi. Lakin Azərbaycan bu vəziyyətlə barışa bilməzdi və barışmadı da. Dövlətin siyasi iradəsi, iqtisadi gücü və ordunun qüdrəti nəticəsində 2020-ci ildə İkinci Qarabağ müharibəsi bölgədə tamamilə yeni reallıq yaratdı. Minsk qrupu isə tarixi missiyasını yerinə yetirə bilmədi, nəticədə tam siyasi iflasa uğradı", - deyə N.Məmmədova əlavə edib.
Deputat qeyd edib ki, beynəlxalq təşkilatların illərlə edə bilmədiyini Azərbaycan 44 günlük Vətən müharibəsində öz gücü hesabına həyata keçirdi. İşğal altındakı torpaqlarımız azad edildi, ölkənin ərazi bütövlüyü təmin olundu və Minsk qrupunun fəaliyyətsizliyi bütün dünyaya açıq şəkildə nümayiş etdirildi.
Azərbaycanın siyasi və diplomatik müstəvidə də qalib dövlət olduğunu beynəlxalq ictimaiyyətin də qəbul etdiyini vurğulayan N.Məmmədova əlavə edib ki, heç bir qüvvə ölkəmizin milli maraqları üzərindən öz yarıtmaz vasitəçilik mexanizmini həyata keçirə bilməz: "Beləliklə, ATƏT-in Minsk qrupu yarıtmaz fəaliyyəti ilə yanaşı, həm də ədalətsiz yanaşması, ikili standartlar və regiondakı reallığı düzgün qiymətləndirə bilməməsi ilə siyasi səhnədən silindi. Azərbaycan isə sübut etdi ki, beynəlxalq hüququ real həyatda təmin etmək üçün siyasi iradə əsas şərtdir".
Ə.QABİLQIZI,
"Azərbaycan"
