Mədəniyyət xalqların milli kimliyinin aydın göstəricisidir. Mədəniyyətdə həm ulu keçmiş, həm bu gün, həm də gələcək sıx şəkildə birləşir. Mədəniyyət həm də xalqların tarixi yaddaşının və mənəvi varlığının aparıcı qoludur. Bu sahənin inkişafı xalqların tərəqqisini sürətləndirən başlıca amildir.
Xalqımız həmişə mədəniyyəti ilə tanınıb, dünya səviyyəsində ön sıralarda dayanıb, çoxları bizdən nümunə götürüb, zaman-zaman mədəniyyətimizi, tariximizi öyrəniblər. Azərbaycan mədəniyyətinin qorunması, zənginləşdirilməsi və dünya miqyasında tanıdılması istiqamətində həmişə dövlətimiz tərəfindən müxtəlif tədbirlər həyata keçirilib, qanunlar, konsepsiyalar qəbul edilib. Ardıcıl, məqsədyönlü şəkildə reallaşdırılan dövlət siyasəti nəticəsində bu sahə tərəqqi etmiş, nümunə olmuşdur.
Ümummilli Lider Heydər Əliyev hələ sovet hakimiyyəti illərində Azərbaycan mədəniyyətinin yeni zirvələrə yüksəlməsinə, milli-mənəvi dəyərlərimizin inkişafına, təbliğinə böyük önəm vermişdir. Mədəniyyətin xalqların həyatına, tarixinə göstərdiyi müsbət təsirdən bəhs edən Ulu Öndər demişdir: "Mədəniyyəti inkişaf etdirmək milləti inkişaf etdirmək, milli ruhu yaşatmaq deməkdir". Böyük uzaqgörənliklə deyilən bu müdrik kəlam Heydər Əliyevin mədəniyyət sahəsində gördüyü işlərin məqsəd və məramını açıq şəkildə göstərir.
Ulu Öndərin mədəniyyət siyasəti 22 ildən çoxdur Azərbaycana rəhbərlik edən, dövlətimizi dünyada tanıdan, dövlətçiliyimizi daha da möhkəmləndirən, iqtisadi gücünü artıran Prezident İlham Əliyev tərəfindən uğurla davam etdirilir. Mədəniyyətimizin tərəqqisini dövlət siyasətinin əsas prioritetlərindən biri hesab edən cənab İlham Əliyev bu sahənin inkişafına böyük diqqət və qayğı göstərir.
Qürur duyulan, fəxr edilən tarixi keçmişə, zəngin irsə və dərin mənəvi köklərə sahib olan Azərbaycan mədəniyyəti məhz dövlətimizin başçısının uzaqgörən siyasəti nəticəsində yeni inkişaf mərhələsinə qədəm qoymuşdur. Uğurla həyata keçirilən tədbirlər, aparılan zəruri təbliğat işləri, imzalanan sərəncamlar milli-mənəvi dəyərlərimizin müasir dövrün çağırışları fonunda etibarlı qorunmasını və gələcək nəsillərə çatdırılmasını yüksək səviyyədə təmin edir. Dövlətimizin başçısı müntəzəm olaraq mədəniyyət və incəsənət xadimləri ilə görüşür, onları dinləyir, gördükləri işləri layiqincə qiymətləndirir.
Prezident İlham Əliyevin rəhbərliyi altında ötən illər ərzində mədəni irsə dövlət dəstəyi artırılmış, bu istiqamətdə müxtəlif irimiqyaslı layihələr uğurla həyata keçirilmişdir. İcra olunan bir-birindən dəyərli islahatlar, tarixi abidələrin bərpası, milli irsin beynəlxalq səviyyədə təbliği və başqa zəruri addımlar ölkə rəhbərinin mədəniyyətimizin inkişafına göstərdiyi əvəzsiz xidmətlərdir. Uzun illərdir ki, paytaxt Bakı beynəlxalq tədbirlərin yüksək səviyyədə keçirildiyi məkana çevrilib. Dünya ölkələri ilə mədəni əlaqələrin daha da sıx qurulması üçün Bakıda beynəlxalq incəsənət, milli rəqs və musiqi, Qəbələdə beynəlxalq musiqi, paytaxtda beynəlxalq caz, Avropa tolerantlıq festivalları və başqa tədbirlər keçirilir. Bütün bunlar mədəniyyətimizin inkişafına və tərəqqisinə böyük təkan verir.
Həyata keçirilən beynəlxalq mədəniyyət tədbirlərinə, irimiqyaslı layihələrə, mütəmadi olaraq aparılan uğurlu islahatlara, bu istiqamətdə imzalanan müvafiq fərman və sərəncamlara əsaslanıb demək olar ki, Prezident İlham Əliyevin mədəniyyət siyasətinin mərkəzində xalqımızın milli dəyərlərinin qorunması, təbliği və daha da zənginləşməsi dayanır.
Mədəniyyətimizin inkişafına, tərəqqisinə daim diqqət və qayğı göstərən Prezident İlham Əliyev 14 yanvar 2026-cı ildə "Azərbaycan Mədəniyyəti - 2040" Azərbaycan Respublikasının Mədəniyyət Konsepsiyası"nın təsdiq edilməsi haqqında sərəncam imzalamışdır. Bu sərəncam mədəniyyətimizin, incəsənətimizin, ədəbiyyatımızın inkişafı naminə görüləcək zəruri işlərin uzunmüddətli proqramıdır.
Konsepsiyada Azərbaycanın mədəni dəyərlərinin qorunmasının və təbliğinin, beynəlxalq miqyasda tanıdılmasının siyasi, iqtisadi və sosial təsirlərinin genişləndirilməsi nəzərdə tutulub. Sənəddə həmçinin Azərbaycan dilinin, incəsənətinin və ədəbiyyatının mədəniyyətdə payının, funksionallığının, cəmiyyətin tərəqqisində, fərdlərin məntiqi, tənqidi və yaradıcı təfəkkürünün, estetik zövqünün, dünyagörüşünün, həyat fəlsəfəsinin formalaşmasında rolunun artırılması öz əksini tapıb, milli-mənəvi dəyərlərimizin qorunması, dünya ölkələrində təbliğ olunması, tanınması, tarixi abidələrin bərpası istiqamətində və başqa sahələrdə əhəmiyyətli layihələrin həyata keçirilməsi nəzərdə tutulub.
Böyük əminliklə demək olar ki, Prezident İlham Əliyevin 14 yanvar 2026-cı il tarixli sərəncamı ilə təsdiq edilmiş "Azərbaycan Mədəniyyəti - 2040" Azərbaycan Respublikasının Mədəniyyət Konsepsiyası" ölkəmizin mədəni həyatında mühüm rol oynayacaq, mədəniyyətimizin, incəsənətimizin, ədəbiyyatımızın inkişafı istiqamətində mühüm addımlar atılacaq.
Vahid MƏHƏRRƏMOV,
"Azərbaycan"
