Gürcüstanın Azərbaycan və Türkiyə ilə iqtisadi əlaqələri çox yüksək səviyyədədir. Bu, bizim strateji tərəfdaşlığımızın göstəricisidir.
AZƏRTAC xəbər verir ki, bu sözləri Gürcüstanın iqtisadiyyat və dayanıqlı inkişaf naziri Mariam Kvrivişvili VII Gürcüstan-Azərbaycan-Türkiyə biznes forumunda söyləyib.
Onun sözlərinə görə, hazırda Gürcüstanda Azərbaycan kapitalı ilə 1660-dan çox şirkət fəaliyyət göstərir. Gürcüstanda Türkiyə kapitalı ilə çalışan şirkətlərin sayı isə 2805-dən çoxdur.
Nazir deyib ki, 2025-ci ildə Türkiyə Gürcüstanın bir nömrəli ticarət tərəfdaşı olub, Azərbaycanla ticarət dövriyyəsi isə ölçü baxımından 7-ci yerdə qərarlaşıb: “Eyni zamanda, Azərbaycandan Gürcüstana ümumi investisiyalar 3,1 milyard ABŞ dollarını keçib, Türkiyədən son illər ərzində investisiyaların həcmi isə 2,4 milyard ABŞ dollarından çoxdur”.
Nazir ölkələr arasında ticarət və iqtisadi əlaqələrin dərinləşdirilməsi prosesində nəqliyyat və logistika əlaqələrinin inkişafının vacibliyini qeyd edib və Orta Dəhliz marşrutunun inkişafının önəmini xüsusi vurğulayıb. Mariam Kvrivişvilinin sözlərinə görə, bu, Gürcüstan hökuməti üçün strateji prioritetdir və dəmir yolları, avtomobil yolları, limanlar və logistika obyektləri də daxil olmaqla əsas infrastrukturun təkmilləşdirilməsinə əhəmiyyətli investisiyalar yönəldilib: “Hökumət 2032-ci ilə qədər əsas nəqliyyat və logistika infrastrukturuna 7 milyard ABŞ dolları investisiya səfərbər etməyi planlaşdırır ki, bu da ölkə daxilində və daha geniş regionda əlaqələrin modernləşdirilməsinə dair strateji vizyonu əks etdirir”.
19 (1)jpg_1771885865.jpg)
