"Sağlam bədəndə sağlam ruh olar" - deyiblər. Bu baxımdan ölkəmizdə idmanın inkişafına göstərilən diqqət və qayğı olduqca təqdirəlayiqdir. Çünki fiziki sağlamlığın başlıca şərtlərindən biri məhz idmanla müntəzəm məşğul olmaqdır.
Ölkəmizdə idmanın inkişafı istiqamətində ciddi və ardıcıl tədbirlər həyata keçirilir. Odur ki, indi Azərbaycan idmanın inkişaf səviyyəsinə görə dünyada aparıcı ölkələrdən biri kimi tanınır. İdmançılarımızın olimpiada və digər beynəlxalq yarışlarda əldə etdiyi uğurlar Azərbaycanın idman ölkəsi kimi qazandığı imici daha da möhkəmləndirir.
Bu sahədə aparılan dövlət siyasəti rayonumuzda da uğurla həyata keçirilir. Rayon rəhbərliyi tərəfindən idman sahəsinin inkişafı, xüsusilə uşaqların, yeniyetmələrin və gənclərin asudə vaxtlarını səmərəli keçirmələri üçün kəndlərdə mövcud stadionların yenilənməsi və təmiri istiqamətində işlər aparılır. Bu da təsadüfi deyil. Çünki stadionlar sağlamlığa xidmət edir. Elə böyük idmana aparan yolların çoxu da kənd stadionlarından başlanır.
Hazırda Qusar Rayon İcra Hakimiyyətinin dəstəyi ilə Aşağı İmamqulukənd, Aşağı Ləgər, Gədəzeyxur, Atlıxan, Mucuqoba kənd stadionlarında təmir işləri görülür. İndiyəcən Aşağı Ləgər kənd stadionu üçün ayrılmış ərazi hasara alınmış, ot örtüyünün salınması üçün əlavə torpaq gətirilərək meydança hamarlanmış, yer yumşaldılmışdır. Stadionda geyinib-soyunma otağı tikilmiş, su anbarı təmizlənmiş və su xətti istifadəyə verilmişdir. Gədəzeyxur, Atlıxan kəndlərində də stadion üçün ayrılmış ərazi təmizlənərək hasarlanmışdır. Hazırda Gədəzeyxur və Aşağı İmamqulukənd stadionlarında soyunub-geyinmə otaqları tikilir. Çubuqlu kəndində isə uzun müddətdir arzuolunan stadion üçün torpaq sahəsi ayrılmışdır.
Görülən bütün bu işlər son bir ilin töhfələridir. Bildiyimizə görə, rayon rəhbərliyi və idman ictimaiyyəti birlikdə bu istiqamətdə çox işlər görəcəklər. Çünki bu, qusarlı gənclərin sağlam böyüməsi üçün çox vacibdir. Sağlam gənclik yetişdirmək həyatın, ölkəmiz üçün idmançılar hazırlamaq isə dövrün tələbidir.
Sənan XƏLİLOV,
Qusar Rayon Ağsaqqallar Şurasının sədri
