İsveçdə Cinayət Məcəlləsinin terrorizmlə mübarizə üçün daha sərt tədbirləri nəzərdə tutan yeni redaksiyası qüvvəyə minib.
Skandinaviya ölkəsinin qanunvericiliyində dəyişikliklər Türkiyənin NATO-ya üzvlük yolunda İsveçə qarşı irəli sürdüyü tələbləri siyahısına daxil idi.
İsveç parlamenti mayın 3-də yeni antiterror qanununu təsdiqləmişdi.
Bu dəyişikliklər İsveç hakimiyyətinə terror təşkilatlarını dəstəkləyən şəxslərin saxlanılması və mühakimə olunması üçün daha böyük səlahiyyətlər verəcək.
İsveçin xarici işlər naziri Tobias Bilström “Dagens Nyheter” qəzetinə açıqlamasında yeni qanunun iyunun 1-dən qüvvəyə mindiyini deyib.
Onun sözlərinə görə, yeni Cinayət Məcəlləsində Türkiyənin təhlükəsizliklə bağlı narahatlığı nəzərə alınıb.
Billström İsveçdəki PKK/YPG terror təşkilatı tərəfdarlarının fəaliyyətinə də münasibət bildirib: “RKK-nın ölkəmizdə fəaliyyəti çox aktivdir. Onlar Türkiyəyə qarşı terror fəaliyyətini geniş şəkildə maliyyələşdirirlər. Terror ortaqları, həmçinin İsveç cəmiyyətinə zərər vuran narkotik vasitələrin qanunsuz dövriyyəsi və digər qeyri-qanuni fəaliyyətlər vasitəsilə vəsait toplamaq üçün ölkəmizdən baza kimi istifadə edirlər. Əgər onlar bu vəsaiti başqa ölkədə terror fəaliyyətini maliyyələşdirmək üçün istifadə edirlərsə, bu o demək deyil ki, biz vəziyyəti ciddiyə almamalıyıq”.
Terror təşkilatına üzv olmaq yeni cinayət məcəlləsinə görə cinayət sayılır. Terror fəaliyyətlərində iştirak edən və ya terror təşkilatları ilə əməkdaşlıq edən şəxslər 4 ilədək həbs cəzası alacaqlar.
Bundan əlavə, terror təşkilatını dəstəkləmək, gücləndirmək və ya təşviq etmək məqsədi daşıyan fəaliyyətlər də dörd ilə qədər həbslə cəzalandırılır.

Rizvan CƏFƏROV,
“Azərbaycan”