İsveçrənin “IQAir” qrupunun dünyanın ən çirkli metropolu adlandırdığı Hindistanın Birnihat şəhərinin sakinləri tənəffüs yolları xəstəlikləri ilə mübarizə aparır.
AZƏRTAC xəbər verir ki, “IQAir”in məlumatına görə, 2024-cü ildə Birnihatda PM2.5-in orta illik konsentrasiyası hər kubmetr üçün 128,2 mikroqram təşkil edib ki, bu da ÜST-nin tövsiyə etdiyi səviyyədən 25 dəfə yüksəkdir.
Şimal-şərqdəki Assam və Meqhalaya əyalətlərinin sərhədində yerləşən və yamyaşıl təbii gözəllikləri ilə tanınan sənaye şəhərinin sakinləri respirator viruslarının təsirinə məruz qalırlar. Həkimlər böyük ehtimalla bildirirlər ki, bu xəstəliklər havanın yüksək səviyyədə çirklənməsi ilə əlaqəlidir.
Hökumətin məlumatına görə, bölgədə respirator infeksiyaların sayı 2022-ci ildəki 2082-dən 2024-cü ildə 3681-ə yüksəlib.
Birnihat şəhərinin ilk tibbi yardım Mərkəzinin həkimi C.Marak bildirib ki, hər gün qəbul etdiyi pasiyentlərin 90 faizi ağır öskürək və başqa tənəffüs problemlərindən əziyyət çəkir. Yerli sakinlər isə qeyd edirlər ki, zəhərli hava həm də dəridə səpkilərə və gözlərin acışmasına səbəb olur, eyni zamanda, məhsula zərər verir və gündəlik işlərin yerinə yetirilməsini, hətta paltarların açıq havada qurudulmasını əngəlləyir.
Analitiklərin sözlərinə görə, Birnihatda olan vəziyyət təkcə Hindistan şəhərlərinə, o cümlədən paytaxta deyil, həm də daha kiçik qəsəbələrə təsir edən daha geniş çirklənmə tendensiyasını əks etdirir, çünki sürətli sənayeləşmə ekoloji təhlükəsizliyə xələl gətirir.
Bununla belə, hökumətin məlumatına görə, ölkənin hər qış mövsümündə çirklənmə ilə üzləşən digər bölgələrindən fərqli olaraq, Birnihatda havanın keyfiyyəti bütün il boyu aşağı olaraq qalır. Mütəxəssislər şəhərdə 80-ə yaxın sənaye müəssisəsinin cəmləşdiyini və onların bir çoxunun ətraf mühiti güclü şəkildə çirkləndirdiyini bildirirlər. Problem ağır nəqliyyat vasitələrinin tullantıları və qövs formalı ərazi kimi digər amillərlə daha da mürəkkəbləşir.
jpg_1779113930.jpg)
