Bu ilin yanvar ayı ərzində yük və sərnişin daşımaları əvvəlki ilin yanvar ayı ilə müqayisədə müvafiq olaraq 5,5 faiz və 7,9 faiz artıb.
Dövlət Statistika Komitəsindən AZƏRTAC-a bildirilib ki,nəqliyyat sektorunda fəaliyyət göstərən təsərrüfat subyektləri tərəfindən 18,4 milyon ton yük daşınıb. Yüklərin 4,5 faizi dəniz, 8,2 faizi dəmir yolu, 0,2 faizi hava, 55,7 faizi avtomobil nəqliyyatı, 31,4 faizi isə boru kəməri ilə nəql edilib.
Qeyri-dövlət sektoruna məxsus nəqliyyat vasitələri ilə daşınmış yüklərin həcmi 4,4 faiz artıb, daşınmış yüklərin ümumi həcmində bu sektorun xüsusi çəkisi 74,8 faiz təşkil edib. 2025-ci ilin yanvar ayında nəqliyyatçılar 157,2 milyon sərnişinə xidmət göstəriblər. Sərnişinlərin 87,9 faizi avtomobil nəqliyyatından, 11,4 faizi metrodan, qalan hissəsi isə digər nəqliyyat növlərindən istifadə edib. Dəmir yolu nəqliyyatı ilə 2025-ci ilin yanvar ayında 1,5 milyon ton yük, 713,7 min sərnişin daşınıb. 2024-cü ilin yanvar ayı ilə müqayisədə yük daşınmasında 9,6 faiz, sərnişin daşınmasında isə 14,6 faiz artım müşahidə olunub. Orta hesabla sutkada 436 vaqon yüklənib, 421 vaqon isə boşaldılıb. Sutka ərzində dəmir yolunun Şimal istiqaməti üzrə 19,3 min ton, Qərb istiqaməti üzrə 3,2 min ton, Cənub istiqaməti üzrə isə 0,7 min ton yüklənmə işi yerinə yetirilib.
Dəniz nəqliyyatı ilə 2025-ci ilin yanvar ayında daşınmış yüklərin həcmi 824,1 min ton təşkil etmiş və əvvəlki ilin yanvar ayına nisbətən 31,2 faiz artıb. Yüklərin 43,5 faizini neft yükləri təşkil edib. Dəniz limanları tərəfindən 1471,4 min ton həcmində yükləmə-boşaltma işləri həyata keçirilib və yüklərin 1137,9 min tonunu və ya 77,3 faizini tranzit yüklər təşkil edib. 2025-ci il fevral ayının 1-i vəziyyətinə limanlarda qalan yüklərin həcmi 53,6 min ton olub. Dövr ərzində bu nəqliyyat növü ilə daşınmış sərnişinlərin sayı 2024-cü ilin yanvar ayına nisbətən 42,1 faiz artaraq 2,7 min nəfər olub.
Nəqliyyat sektorunda daşımaların həcmində xüsusi çəkisi ən böyük olan avtomobil nəqliyyatı ilə 10,2 milyon ton yük, 138,2 milyon sərnişin daşınıb və əvvəlki ilin yanvar ayı ilə müqayisədə müvafiq olaraq 9,8 faiz və 8,4 faiz artım qeydə alınıb.
Sərnişinlərin 95,7 faizi avtobus, 4,3 faizi isə minik taksilərinin xidmətlərindən istifadə edib. Yük dövriyyəsi 10,5 faiz, sərnişin dövriyyəsi isə 9,8 faiz atıb. Metro nəqliyyatının xidmətlərindən istifadə etmiş sərnişinlərin sayı 4,2 faiz artaraq 18,0 milyon nəfər olub.
Hava nəqliyyatı ilə 303,0 min və ya 13,1 faiz çox sərnişin daşınmış, daşımaların 99,9 faizi dövlət, 0,1 faizi isə özəl müəssisələrə məxsus nəqliyyat vasitələri ilə həyata keçirilib. Bu nəqliyyat növü ilə yükdaşıma 7,7 faiz artaraq 33,7 min ton olub.
