Azərbaycan dövləti öz milli maraqlarını və suverenliyini hədəf alan hər bir xain əmələ qarşı həmişə sarsılmaz iradə nümayiş etdirib. Martın 5-də Prezident İlham Əliyevin sədrliyi ilə keçirilən Təhlükəsizlik Şurasının iclası bir daha təsdiqlədi ki, ölkəmizə qarşı yönələn heç bir təhdid cavabsız qalmayacaq. Dövlət başçısı ölkəmizin sarsılmaz qüdrətini bu sözlərlə bəyan etdi: "Biz öz ərazi bütövlüyümüzü qoruyuruq və qorumuşuq. Necə ki, Ermənistan işğalına son qoymuşuq, istənilən şər qüvvəyə qarşı öz gücümüzü göstərməyə hazırıq və İranda bunu unutmasınlar".
Ölkəmiz hərbi təcavüzdən tutmuş terror aktlarına qədər istənilən çirkin plana layiqli cavab vermək iqtidarındadır. Heç bir ölkə Azərbaycanla təhdid və şantaj dilində danışa bilməz. Bu, illərdir regionda "şər yuvası" funksiyasını yerinə yetirən və hər fürsətdə nankorluq nümayiş etdirən İran molla rejiminə də şamil edilir.
Prezident İlham Əliyev iclasda qətiyyətlə vurğuladı ki, Azərbaycan dövləti bu çirkin terror aktını qətiyyətlə pisləyir, bunu törədənlər dərhal məsuliyyətə cəlb edilməlidir. Azərbaycan tərəfinə İran rəsmiləri tərəfindən izahat verilməlidir, üzr istənilməlidir və bu terror aktını törədənlər cinayət məsuliyyətinə cəlb edilməlidirlər.
Mülki hədəflərə namərd hücumu
Martın 5-də İran tərəfinin Azərbaycan ərazilərini pilotsuz uçuş aparatları (PUA) ilə atəşə tutması bu ölkənin əsl xislətini bir daha üzə çıxardı. Naxçıvan Muxtar Respublikasında mülki obyektlərin - Naxçıvan Beynəlxalq Hava Limanının, onun terminal binasının, məktəb və digər ərazilərin hədəfə alınması birbaşa terror aktı və namərdlikdir.
Rəsmi Bakı İranda cərəyan edən hadisələrin sülh yolu ilə həllinə tərəfdar olduğunu bəyan edərək tərəfləri daim dialoqa səsləyib. Cəmi bir neçə gün əvvəl - martın 1-də Prezident İlham Əliyev İran Prezidenti Məsud Pezeşkiana ünvanladığı məktubda İran xalqına sülh və sabitlik arzulamış, başsağlığı vermişdi.
Eyni zamanda dövlətimizin başçısı İranın ölkəmizdəki səfirliyində olub, başsağlığı verib. Halbuki Azərbaycan Prezidentindən başqa heç bir dövlət başçısı İranın səfirliyinə getməyib.
Amma bu dostluq və humanizm jestlərinə cavab olaraq, İran rejimi öz nankor xislətinə sadiq qalaraq Azərbaycanın mülki şəxslərini yaralayıb.
Bu, İranın ilk xəyanəti deyil. Biz həm Birinci, həm də İkinci Qarabağ müharibələri zamanı bu "islam" ölkəsinin müsəlman qardaşlarının deyil, işğalçı Ermənistanın yanında durduğunu görmüşük. 30 il boyunca torpaqlarımızda məscidlərin dağıdılmasına səssiz qalan Tehran hər zaman Azərbaycanın uğurlarına düşmən kəsilib. Prezident İlham Əliyev bu xain davranışları belə xatırlatdı: "Birinci dəfə deyil ki, İran dövləti Azərbaycana və azərbaycanlılara qarşı terror aktları həyata keçirir. Hamımız yaxşı xatırlayırıq ki, bir müddət bundan əvvəl Azərbaycanın Tehrandakı səfirliyi terror aktına məruz qalmışdır... Bildiyiniz kimi, o vaxt Azərbaycan bu hadisəyə çox sərt reaksiya vermişdi, Azərbaycan səfirliyi İrandan təxliyə edilmişdi, bütün diplomatik əlaqələr dayandırılmışdı. İran tərəfi bizdən üzr istəməyə, öz günahını etiraf etməyə məcbur olmuşdu. O terror aktını törədənə bizim təkidimizlə ən ağır cəza da verilmişdi".
İrana son xəbərdarlıq
İranın son terror aktı da cavabsız qalmayacaq. Rəsmi Bakı artıq lazımi mesajları verib. Prezident İlham Əliyev Silahlı Qüvvələrə konkret tapşırıqlar verərək bəyan etdi ki, Azərbaycan bu təcavüzlə heç vaxt barışmayacaq: "Silahlı Qüvvələrimizə təlimat verildi ki, cavab tədbirləri hazırlansın və həyata keçirilsin".
Azərbaycanın xarici siyasəti şəffaf və prinsipialdır. Rəsmi Bakı hər zaman bildirib ki, bizim ərazimizdən heç vaxt üçüncü tərəfə qarşı istifadə oluna bilməz.
Bu mövqe yanvarın 29-da xarici işlər naziri Ceyhun Bayramov tərəfindən iranlı həmkarına da çatdırılmışdı. Lakin görünən odur ki, İran tərəfi ədalətli qonşuluq münasibətlərini deyil, nankorluğu seçir.
Dron hücumları, şər-böhtan kampaniyaları Azərbaycanı məqsədindən döndərə bilməz. Milli maraqlarımıza əl uzadan istənilən güc diz çökdürüləcək. Dövlət başçısının Təhlükəsizlik Şurasının iclasındakı son xəbərdarlığı nankor qonşu üçün həlledici dərsin anonsudur:
"Bu şərəfsizlər, bizə qarşı bu terror aktını törədənlər peşman olacaqlar. Bizim gücümüzü sınamasınlar. Bizim gücümüzü sınamaq istəyənlərin başı "dəmir yumruq" vasitəsilə yarıldı. Bugünkü hadisə də eyni nəticəni hasil edəcək".
Yasəmən MUSAYEVA,
"Azərbaycan"
