La Pasda əhali yolları bağlayıb
Boliviyada hökumətin istefasını tələb edən etirazçılarla təhlükəsizlik qüvvələri arasında baş verən toqquşmalar zamanı 57 nəfər saxlanılıb.
Yerli medianın məlumatına görə, ölkənin paytaxtı La Pasda yerli əhali – mədənçilər, müəllimlər, tələbələr və işçilər yolları bağlayıb və polislə toqquşublar. Hökumət yolların bağlanması səbəbindən xəstəxanalara vaxtında çata bilmədikdən sonra üç nəfərin öldüyünü bildirib. Bundan əlavə, iğtişaşlarda iştirak etdiklərinə görə 57 nəfər saxlanılıb.
Təhlükəsizlik qüvvələri nümayişçiləri dağıtmaq üçün gözyaşardıcı qazdan istifadə edib, etirazçılar isə onlara Molotov kokteylləri və daş ataraq cavab veriblər. Hökumət sözçüsü Xose Luis Qalvez barrikadaları təmizləmək üçün 3500 hərbçi və polis əməkdaşının iştirak etdiyi genişmiqyaslı əməliyyatın başladığını açıqlayıb. O bildirib ki, əməliyyatın məqsədi xəstəxanalara qida, dərman və oksigen çatdırılmasını təmin etməkdir. Əməliyyat davam edir.
Bu arada Paraqvay, Argentina, Çili, Peru, Ekvador, Kosta Rika, Panama və Honduras hökumətləri Boliviyadakı vəziyyətdən narahat olduqlarını bildirən birgə bəyanat yayıblar. Bu ölkələr Prezident Rodriqo Pas hökuməti ilə həmrəyliklərini ifadə ediblər və demokratik qaydanı pozmağa yönəlmiş hər hansı zorakılığı qətiyyətlə pisləyiblər.
Mədənçilər, həmkarlar ittifaqları və ictimai təşkilatlar ölkədə uzun müddət davam edən yanacaq çatışmazlığına, yüksək inflyasiyaya, xarici valyuta çatışmazlığına və ağır iqtisadi vəziyyətə etiraz edirlər.
Rizvan CƏFƏROV,
“Azərbaycan”
jpg_1781069002.jpg)
jpg_1781068869.jpg)
