- Mülkiyyətimdə olan torpağı barter yolu ilə dostuma məxsus torpaqla dəyişmək istəyirəm. Sonra həmin torpağı bacıma hədiyyə etməyi düşünürəm. Bu hallarda məndən vergi tutulacaqmı?
Həsən ƏHMƏDOV,
Bakı şəhəri
- Azərbaycan Respublikasının Mülki və Vergi məcəllələrinə əsasən, tərəflər arasında əmlakların dəyişdirilməsi mümkündür və bu alqı-satqı müqaviləsi formasında rəsmiləşdirilir. Bu halda hər iki tərəf həm satıcı, həm də alıcı qismində çıxış edir. Əsas diqqət yetirilməli məqam ondan ibarətdir ki, dəyişdirilən daşınmaz əmlakların bazar qiyməti arasında fərqin müəyyən edilməsi və tərəflərin vergi öhdəliklərinin müəyyənləşdirilməsi məqsədilə həmin əmlakın qiymətləndirilməsi aparılır. Bu əməliyyatın həyata keçirilməsi üçün aşağıda sadalanan sənədlər lazım olacaq:
* əmlak üzərində mülkiyyət hüququnu təsdiq edən sənəd,
* əmlak üzərində yüklülüyün və ya həbsin olub-olmaması barədə Daşınmaz Əmlakın Dövlət Reyestri Xidmətinin verdiyi arayış,
* mülkiyyətçi nikahdadırsa, onun nikah haqqında şəhadətnaməsi,
* əmlakın dəyişdirilməsinə ərin (arvadın) notariat qaydasında təsdiq edilmiş razılığı, yaşayış yeri üzrə qeydiyyatda olan yetkinlik yaşına çatmış ailə üzvlərinin notariat qaydasında təsdiq edilmiş razılığı.
Sualınızın ikinci hissəsinə gəldikdə isə qeyd olunmalıdır ki, bacınıza bağışlayacağınız əmlakla bağlı sizin hər hansı vergi öhdəliyiniz yaranmayacaqdır. Belə ki, Vergi Məcəlləsinin 102.1.3.2-ci maddəsinə əsasən, ailə üzvündən alınan hədiyyə, maddi yardım və miras gəlir vergisindən azaddır.
- Üç ildir boşanmışam, lakin indiyədək soyadımı və şəxsiyyət vəsiqəmi dəyişdirməmişəm. Bilmək istəyirəm, bu, hər hansı problem yarada bilərmi?
Şəhla MƏMMƏDLİ,
Çiçək qəsəbəsi
- Sualınıza cavab olaraq bildiririk ki, Azərbaycan Respublikasının qanunvericiliyinə əsasən, şəxs boşandıqdan sonra evli olduğu vaxt həyat yoldaşının götürdüyü soyadını dəyişmək vəzifəsi daşımır. Yəni bu, məcburi deyil. Əgər sizin şəxsiyyət vəsiqəniz köhnə nəsil vəsiqələrdəndirsə, boşandıqdan sonra ailə vəziyyətinizin cari halını təsbit etmək üçün "ASAN xidmət" mərkəzinə müraciət edərək şəxsiyyət vəsiqəsi məlumatlarınızda müvafiq dəyişiklik etməklə yeni nəsil şəxsiyyət vəsiqəsi əldə edə bilərsiniz. Soyadınızın dəyişdirilməməsi halında hər hansı problemlə qarşılaşa biləcəyiniz məsələsinə gəldikdə isə, qeyd olunmalıdır ki, soyadın dəyişdirilməməsi sizin üçün heç bir hüquqi problem yarada bilməz.
Sualları cavablandırdı:
Fərhad NƏCƏFOV,
Azərbaycan Respublikası Vəkillər Kollegiyasının üzvü
jpg_1775472819.jpg)
