Xəbər verildiyi kimi, iyulun 20-də Prezident İlham Əliyev Almaniyaya rəsmi səfər edib. Səfər çərçivəsində bir sıra görüşlər keçirilib və iki ölkə arasında əlaqələrin daha da inkişafına stimul verən "Azərbaycan Respublikası ilə Almaniya Federativ Respublikası arasında İkitərəfli Tərəfdaşlıq üçün Strateji Gündəlik haqqında Birgə Bəyannamə" imzalanıb. İmzalanan sənədlər sırasında Azərbaycan-Almaniya Biznes Şurasının yaradılmasına və fəaliyyətinə dair bəyannamə xüsusi əhəmiyyətə malikdir. Bu sənəd Azərbaycan və Almaniya arasında iqtisadi əlaqələrin yeni məcrada inkişafına təkan verməklə, iki ölkənin biznes dairələri arasında yeni əməkdaşlıqlara yol açacaq. Şura, həmçinin investisiya imkanlarını artırmaqla, ölkədə biznes və investisiya mühitinin yaxşılaşdırılmasına öz töhfəsini verəcək.
Milli Məclisin deputatı Tahir Mirkişili mövzu ilə əlaqədar qəzetimizə açıqlamasında deyib ki, bəzən dövlət başçılarının xarici səfərlərinin nəticəsi yalnız imzalanan sənədlərdə deyil, həm də dəyişən geoiqtisadi xəritədə görünür. Prezident İlham Əliyevin Almaniyaya rəsmi səfəri də məhz belə hadisələrdəndir. Ölkə rəhbərinin Almaniyaya səfərini yalnız diplomatik hadisə kimi deyil, Azərbaycanın Avropa iqtisadiyyatında mövqeyini dəyişdirən strateji addım kimi qiymətləndirmək daha düzgün olar. "İlk baxışda gündəmdə enerji, ticarət və investisiyalar dayanır, lakin proseslərə daha geniş prizmadan baxdıqda aydın olur ki, söhbət Azərbaycanın Avropa ilə münasibətlərinin yeni mərhələyə keçməsindən gedir. Dünya iqtisadiyyatı sürətlə dəyişir, qloballaşmanın əvvəlki modeli parçalanır, tədarük zəncirləri yenidən qurulur, enerji təhlükəsizliyi milli təhlükəsizlik məsələsinə çevrilir. Belə bir dövrdə ölkələrin dəyəri yalnız malik olduqları resurslarla deyil, eyni zamanda nə dərəcədə etibarlı tərəfdaş olmaları ilə ölçülür", - deyə o əlavə edib.
Deputat bildirib ki, ölkəmiz Avropanın enerji təhlükəsizliyində artıq alternativ deyil, zəruri tərəfdaşlardan biridir. Prezident İlham Əliyevin Almaniyada açıqladığı kimi, Azərbaycan qazı artıq Almaniya bazarına daxil olub. Bu faktın iqtisadi əhəmiyyəti statistik göstəricilərdən daha böyükdür. Almaniya bazarına çıxış, sadəcə, yeni alıcı qazanmaq demək deyil. Bu həmçinin Azərbaycanın Avropa iqtisadi sisteminin strateji enerji təminatçılarından biri kimi qəbul edilməsinin göstəricisidir.
XX əsrdə enerji resurslarının dövlətlərin əsas üstünlüyü olduğunu deyən T.Mirkişili diqqətə çatdırıb ki, XXI əsrdə isə texnologiya, logistika və innovasiya eyni dərəcədə strateji əhəmiyyət daşıyır: "Məhz buna görə Almaniya ilə iqtisadi əməkdaşlığın genişləndirilməsi xüsusi önəm kəsb edir. Almaniya dünyanın ən güclü sənaye ekosistemlərindən birinə sahibdir. Yüksək texnologiyalar, maşınqayırma, avtomatlaşdırma sistemləri, "yaşıl enerji" və sənaye innovasiyaları sahəsində onun təcrübəsi dünya standartlarını müəyyənləşdirir. Bu əməkdaşlıq yalnız kapital axını deyil, biliklərin, texnologiyaların və yeni istehsal mədəniyyətinin Azərbaycana gəlməsi deməkdir. İqtisadi inkişafın ən mühüm şərti də məhz budur. Çünki zəngin ölkələr yalnız sərvət satmır, onlar texnologiya istehsal edir, innovasiya ixrac edir və yüksək əlavə dəyər yaradırlar. Azərbaycanın qarşısında duran əsas vəzifə də enerji gəlirlərini texnoloji inkişafın maliyyə mənbəyinə çevirməkdir".
Deputat qeyd edib ki, səfərin digər strateji istiqaməti Orta dəhliz ilə bağlıdır. Bir neçə il əvvəl bu marşrut daha çox regional layihə kimi qiymətləndirilirdisə, bu gün Avropa ilə Asiyanı birləşdirən ən perspektivli iqtisadi marşrutlardan biri hesab olunur. "Azərbaycan artıq, sadəcə, tranzit ölkəsi olmaq istəmir, məqsəd tranzitdən dəyər yaratmaqdır. Logistika mərkəzləri, sənaye zonaları, rəqəmsal xidmətlər, istehsal klasterləri və yeni ixrac imkanları məhz bu dəhlizin ətrafında formalaşmalıdır. Bu yanaşma iqtisadi siyasətin keyfiyyətcə yeni mərhələyə keçdiyini göstərir", - deyə o əlavə edib.
T.Mirkişili bildirib ki, diqqətçəkən başqa bir məqam "yaşıl enerji" sahəsində əməkdaşlığın genişlənməsidir. Əgər XX əsrin iqtisadiyyatı neft üzərində qurulmuşdusa, XXI əsrin iqtisadiyyatı elektrik enerjisi və rəqəmsal texnologiyalar üzərində formalaşır. Azərbaycan isə hər iki dövrün üstünlüklərini birləşdirən nadir ölkələrdən biridir. Bir tərəfdən Avropanın enerji təhlükəsizliyi üçün qaz ixrac edir, digər tərəfdən isə Xəzərin külək potensialını gələcəyin enerji bazarına çevirməyə hazırlaşır. Bu isə, sadəcə, enerji siyasəti deyil, həm də gələcəyin iqtisadiyyatına sərmayədir.
Səfərin daha bir mühüm nəticəsinin beynəlxalq investorların baxışı ilə bağlı olduğunu deyən deputat vurğulayıb ki, bir qayda olaraq kapital sabitliyi sevir: "İnvestorlar yalnız bazarın ölçüsünə deyil, siyasi etibarlılığa, tərəfdaşlığın davamlılığına və dövlət institutlarının proqnozlaşdırıla bilməsinə də diqqət yetirirlər. Almaniya kimi Avropanın aparıcı iqtisadi gücü ilə münasibətlərin strateji səviyyədə inkişafı Azərbaycan iqtisadiyyatına olan beynəlxalq etimadı daha da gücləndirir. Bu isə gələcək investisiyalar üçün ən vacib amillərdən biridir".
T.Mirkişili qeyd edib ki, Azərbaycan artıq təkcə enerji ixrac edən ölkə deyil, Avropa ilə Asiyanı birləşdirən yeni iqtisadi arxitekturanın fəal iştirakçısına çevrilir. Enerji, logistika, rəqəmsal bağlantılar, "yaşıl enerji", sənaye və texnologiya - bütün bu istiqamətlər vahid strateji modelin elementləridir. Məhz buna görə Prezident İlham Əliyevin Almaniyaya səfəri gündəlik diplomatik hadisə kimi deyil, Azərbaycanın uzunmüddətli iqtisadi transformasiyasının növbəti mərhələsi kimi qiymətləndirilməlidir. Çünki gələcəyin gücü etibarlı tərəfdaşlıqda, texnologiyada və dəyər yaradan iqtisadiyyatda olacaq. Azərbaycan isə məhz bu istiqamətdə irəliləyir.
Əsmər QARDAŞXANOVA,
"Azərbaycan"
