Azərbaycanla Türkiyə arasında illərin sınağından keçən qardaşlıq və strateji müttəfiqlik münasibətləri həyatın müxtəlif sahələrində olduğu kimi, əmək və sosial müdafiə istiqamətində də yeni çalarlar qazanır. Bu dəfə iki ölkənin əmək və sosial müdafiə sahəsində əməkdaşlığının gələcək istiqamətləri Bakıda müzakirə olunub.
Əmək və Əhalinin Sosial Müdafiəsi Nazirliyində Türkiyə Respublikasının əmək və sosial müdafiə nazirinin müavini Adnan Ertemin rəhbərlik etdiyi nümayəndə heyəti ilə görüş keçirilib. Görüşdə əmək və əhalinin sosial müdafiəsi naziri Anar Əliyev Azərbaycan-Türkiyə münasibətlərinin qardaşlıq və strateji müttəfiqlik səviyyəsində inkişaf etdiyini vurğulayıb. Nazir qeyd edib ki, iki ölkə arasında digər sahələrdə olduğu kimi, əmək və sosial müdafiə sahəsində də əməkdaşlıq ildən-ilə möhkəmlənir, yeni istiqamətlər qazanır.
Anar Əliyev son illərdə Azərbaycanda həyata keçirilən sosial islahatların nəticələri barədə məlumat verib. Bildirib ki, bu islahatlar çərçivəsində Türkiyənin Əmək və Sosial Müdafiə Nazirliyi ilə qurulan əməkdaşlıq və təcrübə mübadiləsi xüsusi əhəmiyyət daşıyır. Çünki sosial müdafiə yalnız rəqəmlərdən, qanunlardan və sənədlərdən ibarət deyil. Onun mərkəzində insan, onun əməyi, haqqı, gələcəyi və layiqli həyat arzusu dayanır. Azərbaycan və Türkiyənin bu sahədə əməkdaşlığı da məhz insan həyatına toxunan, insanların sosial rifahına xidmət edən bir xətt üzrə inkişaf edir.
Görüşdə iki nazirlik arasında fəaliyyət göstərən Birgə Daimi Komissiyanın əmək və sosial müdafiə sahəsində əlaqələrin inkişafında mühüm rolu qeyd olunub. Müntəzəm təmasların, qarşılıqlı səfərlərin və təcrübə mübadilələrinin iki ölkənin müvafiq qurumları arasında əlaqələri daha da dərinləşdirdiyi vurğulanıb. Türkiyənin əmək və sosial müdafiə nazirinin müavini Adnan Ertem də əməkdaşlığın davamlı inkişafından məmnunluğunu ifadə edib. O, qarşılıqlı təcrübə mübadiləsinin və birgə fəaliyyətin əhəmiyyətini diqqətə çatdırıb.
Görüş zamanı iki nazirlik arasında mövcud əməkdaşlıq gündəliyi, sosial müdafiə sahəsində əlaqələrin daha da inkişaf etdirilməsi və yeni əməkdaşlıq imkanları ətrafında fikir mübadiləsi aparılıb. Belə görüşlər bəzən protokol çərçivəsində keçirilən rəsmi toplantıdan daha böyük məna daşıyır. Çünki Azərbaycanla Türkiyəni birləşdirən yol yalnız siyasət və iqtisadiyyatın deyil, insana verilən dəyərin, sosial ədalətə və layiqli həyata olan ortaq baxışın da yoludur.
İki ölkənin bu sahədə atdığı hər bir addım həmin yolun daha da möhkəmlənməsinə, qardaşlıq bağlarının isə gündəlik həyatın ən vacib məqamlarında özünü göstərməsinə xidmət edir.
“Azərbaycan”
