2 Fevral – Azərbaycan Gəncləri Günü ölkəmizdə gənclərə göstərilən yüksək dövlət qayğısının, uzaqgörən və məqsədyönlü gənclər siyasətinin parlaq təcəssümüdür. Ulu Öndər Heydər Əliyevin 1 fevral 1997-ci il tarixli Sərəncamı ilə fevralın 2-nin Azərbaycan Gəncləri Günü elan edilməsi gənclərin dövlət və cəmiyyət həyatında rolunun strateji əhəmiyyət daşıdığını bir daha təsdiqləmişdir. Məhz bu qərarla Azərbaycan MDB məkanında və Şərqi Avropa ölkələri arasında Gənclər Gününü ilk təsis və təntənəli şəkildə qeyd edən ölkə kimi tarixə düşmüşdür.
Ümummilli Lider Heydər Əliyev gəncləri Azərbaycanın gələcəyi adlandırır, onların bilik və bacarıqlarının inkişafını, vətənpərvərlik ruhunda formalaşmasını dövlət siyasətinin əsas prioritetlərindən biri kimi müəyyənləşdirirdi. Gənclər və İdman Nazirliyinin yaradılması, gənclər forumlarının təşkili, “Gənclər siyasəti haqqında” Qanunun qəbul edilməsi, istedadlı gənclərə dövlət qayğısını əks etdirən “Qızıl kitab” təşəbbüsü bu siyasətin fundamental sütunlarıdır.
Bu strateji xətt bu gün möhtərəm Prezidentimiz cənab İlham Əliyevin rəhbərliyi ilə müasir çağırışlara uyğun şəkildə uğurla davam etdirilir. Gənclərin təhsili, karyerası, sosial rifahı, vətənpərvərlik ruhunda yetişməsi və ictimai-siyasi proseslərdə fəal iştirakı üçün geniş imkanlar yaradılıb. “Gənclər ili”, “Gənclər evi” sosial xidmət müəssisələri, Gənclər Fondu, Gənclərin İnkişaf və Karyera Mərkəzləri, “Yüksəliş” müsabiqəsi və “Gənclər üçün Prezident Mükafatı” bu siyasətin real nəticələridir.
Dövlət başçısının gənclərə etimad və dəstəyə əsaslanan siyasəti nəticəsində Azərbaycan gəncliyi ictimai-siyasi həyatda fəal iştirak edir, beynəlxalq arenada ölkəmizi layiqincə təmsil edir, elm, təhsil, innovasiya, idman və mədəniyyət sahələrində mühüm nailiyyətlər qazanır.
Xüsusilə qeyd olunmalıdır ki, Birinci vitse-prezident, Heydər Əliyev Fondunun prezidenti hörmətli Mehriban xanım Əliyevanın təşəbbüs və rəhbərliyi ilə həyata keçirilən layihələr gənclərin hərtərəfli inkişafında, onların milli-mənəvi dəyərlər ruhunda yetişməsində, elmə, təhsilə, mədəniyyətə və idmana cəlb olunmasında müstəsna rol oynayır. “Bakı-2015” Birinci Avropa Oyunları, “Eurovision-2012” kimi mötəbər beynəlxalq tədbirlərin yüksək səviyyədə təşkili Azərbaycan gəncliyinə yeni üfüqlər açmış, ölkəmizi dünya gənclərinin diqqət mərkəzinə çevirmişdir.
Azərbaycan gəncliyi Vətən müharibəsində göstərdiyi qəhrəmanlıqla öz tarixi missiyasını şərəflə yerinə yetirdi. Rəşadətli Ordumuzun sıralarında döyüşən igid gənclərimiz torpaqlarımızın azadlığı uğrunda misilsiz fədakarlıq göstərərək Şanlı Zəfəri xalqımıza bəxş etdilər. Eyni zamanda informasiya müharibəsində fəal mövqe tutan gənclərimiz Azərbaycanın haqq səsini dünya ictimaiyyətinə çatdırmaqda mühüm rol oynadılar.
Əminliklə demək olar ki, Ümummilli Lider Heydər Əliyevin əsasını qoyduğu, möhtərəm Prezidentimiz cənab İlham Əliyevin qətiyyətlə davam etdirdiyi gənclər siyasəti bundan sonra da Azərbaycan gəncliyinin hərtərəfli inkişafına, dövlətimizin güclənməsinə və milli maraqlarımızın qorunmasına xidmət edəcəkdir.
Bu əlamətdar gün münasibətilə bütün Azərbaycan gənclərini səmimi-qəlbdən təbrik edir, onlara sağlamlıq, uğurlar və Vətənimizin parlaq gələcəyi naminə yeni nailiyyətlər arzulayıram.
Fatma YILDIRIM,
Milli Məclisin deputatı
